Gunung Kinabalu
| Gunung Kinabalu | |
|---|---|
 Gunung Kinabalu | |
 | |
| Titik pinih duur | |
| Tegeh | 4,095 m (13,435 ft) |
| Rumasuk ring lis | titik paling tegeh ring Malaysia |
| Géograpi | |
| Genah | Sabah, Malaysia |
Gunung Kinabalu inggih punika silih tunggil gunung sané wénten ring Sabah, Malaysia. Tegeh Gunung Kinabalu wantah 4.095 meter. Gunung Kinabalu wantah gunung sané pinih tegeh ring Pulo Kalimantan, pinih tegeh ring Malaysia, miwah sané pinih tegeh kaping lima ring Asia Tenggara. Gunung Kinabalu mawit saking 4 wewidangan inggih punika alas Dipterokarp Bukit, alas Dipterokarp Atas, alas Montane miwah alas Ericaceous utawi alas gunung.
Gunung Kinabalu wantah cihna kaagengan krama sané meneng ring Sabah. Krama Sabah precaya Gunung Kinabalu prasida ngicénin rasa semangat miwah pasikian krama. Krama drika precaya gunung punika wantah genah tapa samadhi atma sané sampun séda.
Gunung Kinabalu kawentuk saking tumbukan litosfera Laut Tiongkok Selatan miwah litosfera sané ngwentuk pulo Kalimantan. Litosfera wantah bagian pinih duur permukaan kerak gumi. Ring tumbukan punika, litosfera Laut Tiongkok Selatan nyangsan kelem ka sor permukaan gumi miwah ngicénin tekanan majeng litofera sané ngwentuk Kalimantan.
Tekanan punika nyorog bongkahan Gunung Kinabalu sané magenah ring sor permukaan gumi menék ka duur permukaan gumi. Sorogan punika ngawinang Gunung Kinabalu maimbuh tegehnyané 5 mm/warsa miwah unduk puniki nénten prasida kacingak antuk panyingakan.[1]
Gunung Kinabalu mawit saking watuan sedimén sané kabelah sawiréh kikisan salami 8 ngantos 12 yuta warsa. Makasami pucak tegeh ring guminé katekepin és tebel ring galah toya watu sané mamargi kirang langkung siki yuta warsa sané lintang, rumasuk Gunung Kinabalu sané ritatkala punika pateh tegehnyané sareng gunung-gunung ring Pegunungan Himalaya. Ritatkala punika pucak Kinabalu katekepin és miwah mamargi pencairan glasier. Pencairan glasier punika prasida kacingak ring wewidangan Pinusok Gravel sané magenah ring pantaraning Kundasang miwah Rana.[2]
- ↑ "Kinabalu Park Geology". web.archive.org. 2007-11-20. Kaarsipin saking versi asli tanggal 2007-11-20. Kaaksés 2024-07-28.
- ↑ "Did it snow on the summit of Mount Kinabalu?". The Star (ring Inggris). Kaaksés 2024-07-28.