Unvez gwereañ
![](http://178.128.105.246/content-http-upload.wikimedia.org/wikipedia/br/thumb/9/9f/Unv-gwerea.jpg/220px-Unv-gwerea.jpg)
Anvet e vez skramm pe unvez gwereañ trobarzhell gwereañ an urzhiataer. Daou rizh unvez gwereañ a zo :
- Unvezioù gwereañ skrammoù katodek enne (CRT - Cathod Ray Tube). Diamzeret e teuont da vezañ tamm ha tamm. Ec'honek ha pounner int hag ouzhpenn e vez dispignet kalz tredan gante.
- Unvezioù gwereañ skrammoù strinkenoù liñvel pe skrammoù kompez enne. Aveet e vez an urzhiataerioù hedoug gante pe c'hoazh an ameilerioù hiniennel (PDA), al luc'heilerezioù arnevez, ar luc'hskeudennerezioù niverel hag muioc'h mui a urzhiataerioù burev.
Aroueziadurioù kalvezel
[kemmañ | kemmañ ar vammenn]![](http://178.128.105.246/content-http-upload.wikimedia.org/wikipedia/br/thumb/7/74/Keflu-gwerea.png/220px-Keflu-gwerea.png)
- An despizadur : niver poentoù e c'hell ur skramm gwereañ eo. Pikseloù e vez graet eus ar poentoù-se. Gavaelet e vez an despizadur etre 640 x 80 piksel (640 piksel evit an uhelder, 680 piksel evit al ledander) ha 2048 x 1536 piksel.
Setu un daolenn a ro da anavezout gant peseurt despizadur aliet e c'heller kefluniañ ur gwereadur war ur skramm hervez e vent (sellit a-is). Da c'houzout eo e c'heller kefluniañ gwereadur ur skramm gant meur a zespizadur hervez e c'hallusterioù kalvezel da lavaret eo e c'heller kefluniañ un daspizadur izeloc'h eget an hini aliet pe vrasoc'h o c'houzout ma ne vefe ket tu neuze gwereañ kement a livioù (SVGA da skouer e Modoù kevregañ.
Treuzvegenn (e meutadoù) | Despizadur (e pikseloù) |
15" | 800 x 600 |
17" | 1024 x 768 |
19" | 1280 x 1024 |
19" 16/10vet | 1440 x 900 |
21" | 1600 x 1200 |
- Ar vent : o vuzuliañ treuzvegenn ar skramm eo e vez anavezet e vent. Dewerzhet e vez e meutadoù (").
Setu mentoù skouer ar skrammoù, e meutadoù (") hag e kantimetradoù (cm) :
" | cm |
---|---|
14 | 36 |
15 | 38 |
17 | 43 |
19 | 48 |
21 | 53 |
23 | 58 |
- Ar skar maskl ("dot pitch") : esaouder etre div dreluc'huzenn eo. Seul vihan eo-he seul resisoc'h eo ar gwereañ. Gallout a reer kuzuliañ ur skar maskl a 0,25 mm evit ur skramm ; ur skar maskl brasoc'h eget ar werzhad-se e vez roet ur gwereañ fall gante e-keñver pezh a c'hellomp gortoz ouzh ar skrammoù arnevez.
- An diarunusted : niver a bikseloù dre werzh c'horread eo, dewerzhet e pikseloù dre meutad linnenek (e "Dot per inch" e saozneg - DPI). Da skouer un diarunusted a 200 DPI a dalvez kement a 200 piksel a-zremm dre 200 piksel a-zerc'h war ur meutad karrez ; pezh a ra 40000 piksel war ur meutad karrez.
- Un unvez gwereañ a zo bet ergrafet d'arverañ ur mod kevregañ eleze eo en araez da wereañ munudoù ur skeudenn hervez an despizadur ha niver al livioù e c'hell ober gante. Skoueriegezhioù eo ar modoù kevregañ evel da skouer VGA, SVGA, UXGA, QXGA ....
Reoladoù espern ar gremm hag ar skinad
[kemmañ | kemmañ ar vammenn]Revoud a ra ur bern reoladoù evit an unvezioù gwereañ a-benn espern ar gremm dispignet gante (rediañ ar genderc'herien da vevennañ beveziñ tredan o ardivinkoù) hag a-benn bevennañ ar skinad ganet gante (dreist-holl evit ar skrammoù kathodek).
Ur reolad anvet MPR1 a oa bet danzeet e dibenn ar bloavezhioù 80 gant ur bennadurezh eus Sveden. Deut e oa da vezañ ar reolad MPR2 e 1990 ha anavazet ent etrebroadel abaoe (muzuliañ an ec'hodadurioù skinad eus an ardivinkoù a vez oc'h oc'hodiñ gwagennoù tredansavel).
Ar skoueriegezh TCO a oa bet danzeet gant ar Swedish Confederation of Professional Employeers e 1992. Ganti e veze didermenet al live ec'hodiñ skinad uc'hek e c'hellfe an trevnad mont en e vetek (gant ar reoladoù MPR e veze savelet kentoc'h al live surentez izek).
Daskemmet e oa bet ar reolad TCO e 1992 e 1995 hag e 1999 da zanzen ar reoladoù TCO92, TCO95 ha TCO99.
Gant ur bodad kenderc'herien aveadoù stlennegel (VESA - Video Electronics Standards Association) e oa bet danzeet ar reolad DPMS (Display Power Management Signalling). Gant ar reolad-se e vez savelet pevar live arc'hwel evit an ardivinkoù a heuilh anezhañ :
- en arwaz ;
- war c'hed ("standby") o veveziñ leioc'h eget 25 W ;
- en astal o veveziñ leioc'h eget 8 W. Er mod-se e vez lazhet kavn ar gorzenn gathodek ;
- en arsav.