Scream
C'l artìcul chè 'l è scrit in
Miranduléś |
![]() | ||
![]() Ghostface e la Barrymore in na figùra dal film | ||
Sîg 1996 | ||
---|---|---|
Regìa: Wes Craven | ||
Scritōr: Wes Craven • Kevin Williamson | ||
Atōr: Neve Campbell • Courteney Cox Arquette David Arquette • Drew Barrymore • Wes Craven Henry Winkler • Jamie Kennedy • Matthew Lillard Liev Schreiber • Rose McGowan • Joseph Whipp David Booth • Frances Lee McCain • Skeet Ulrich | ||
Müsica: Marco Beltrami | ||
Léngua: Ingléś | ||
Dürä dal film: 107 minüt | ||
Nasiōṅ: Stat Unî |
Scream (Sîg) 'l è 'n film ad scarésa americàṅ dal 1996 ad Wes Craven scrit insém a Kevin Williamson.
Custâ 15 migliòṅ ad dòlar, al 'n à pò purtâ a cà 173, dvintànd òṅ di più grand sucès a i butghèṅ dal cìnema ad c'l an lè. 'L à vins al prim prèmi a i Saturn Awards dal 1997 e muciâ sù anc tri séguit: Scream 2 dal 1997, Scream 3 dal 2000 e Scream 4 dal 2011.
Sunt
Campàggna ad Woodsboro. La śóvna Casey Becker (Drew Barrymore), méntar l'è drē a métar sù di popcorn, la ricév na ciamàda a 'l telèfun 'd òṅ ch'l à śbaliâ nùmar. Ma a n è briśa acsè parchè quàl là al tórna a ciamàr-la soquànti vòlti faghénd-ag capìr ch'al sà chi l'è e anc dal dmandi su di film ad scarésa ch'a lē i gh piàśan dimóndi. Sōl s'la rispónd bèṅ la pōl sprar ad scampàr. A s capìs ch'al fà dabòṅ, ch'al gh vōl far dal mâl, a lē e a 'l sò muróś Steve Orth (Kevin Patrick Walls) ch'l è ligâ pîṅ ad sangṿ in sna scrana lè 'd fóra. Quànd i genitōr dla baghéta i tórn'n a cà però i i càtan mòrt parchè la Casey l'iva śbaliâ a numinàr al sasèṅ ad Venardè trédas, dgénd ch'l éra Jason Voorhees invéci ad sò màdar. Al killer dal telefunèṅ, ciamâ Ghostface, 'l è òṅ ch'al s vistìs ad négar cun na mascra bianca adòs ch'la fà gnir in mènt al quàdar "Al Sîg" 'd Edvard Munch.
La nòt dòp Ghostface al próa a masàr a cà sua anc la Sidney Prescott (Neve Campbell), na cumpàgna ad scóla dla Casey, ma al n gh la cava briśa. Subìt dòp a riva lè al sò murōś, Billy Loomis (Skeet Ulrich), ch'al gh dà 'n abràs ma, faghénd acsè, al fà cascàr par tèra al sò telefunèṅ ch'a pâr pròpria qvél dal sasèṅ. Par cal mutìṿ lè chi lò al finìs in parśòṅ.
La Sidney la sa stablìs p'r un pôc a cà dla sò amìga Tatum Riley (Rose McGowan), surèla dal sierìf in secónda e minga tant a pòst Linus dit Lenny (David Arquette). In cal méntar Billy al vèṅ mandâ lìbar dòp ch'la pulisìa l'iva dâ n'uciàda a 'l sò ciamàdi a 'l telèfun e capî ch'al n éra mia stâ lò.
Al caś di masamènt ad Woodsboro 'l è tgnû 'd òć anc da la televiśiòṅ, specialmènt da la giurnalìsta Gale Weathers (Courteney Cox Arquette).
Culòna sunóra
La culòna sunóra dal film, gnuda fóra in dal 1996, la gh'à dèntar ùndas braṅ.
- Youth of America - Birdbrain
- Whisper - Catherine
- Red Right Hand - Nick Cave and the Bad Seeds
- (Don't Fear) The Reaper - Blue Öyster Cult
- Artificial World [Interdimensional Mix] - Julee Cruise
- Better Than Me - Sister Machine Gun
- Whisper to a Scream (Birds Fly) - Soho
- First Cool Hive - Moby
- Bitter Pill - The Connells
- School's Out - Alice Cooper
- Original Motion Picture Score - Marco Beltrami