Ferovie
![](http://178.128.105.246/content-http-upload.wikimedia.org/wikipedia/commons/thumb/0/0a/Tren_a_las_nubes_cruzando_Viaducto_la_Polvorilla.jpg/200px-Tren_a_las_nubes_cruzando_Viaducto_la_Polvorilla.jpg)
La ferade (o ferovie) e je une struture di traspuart in tiere fate par fâ cori su i trens e par menâ vie oms o robis. Il fier dulà che al côr il tren al è fat cun dôs guidis clamadis sinis poiadis su traviersis che a jerin prin in len di rôl e cumò cuasi dutis in ciment che coventin par tignî su e a la misure juste une di chê altre, chê misure si clame scartament che al è di un fier a di chel altri di 1435 mm in Europe, Cine, Stâts Unîts e Messic. Difarents scartaments a son par esempli in ûs in Spagne, Portugal e Irlande.
Cun traspuart feroviari si intint il puartâ int o robe di un puest a di un altri cuntun sisteme specializât clamât ferovie doprant un mieç di traspuart clamât tren. Si puedin dividi dôs manieris principâls di traspuart sul fier:
· Traspuart di int doprant trens viazadôrs cu lis carocis a pueste che a cambiin daûr de cualitât dal aredament, dal servizi e da la velocitât che a puedin lâ.
· Traspuart di robe (merci) doprant trens midiant cjars feroviariis che a cambiin daûr che a vedin di menâ robe in sorte, se a son vierts o sierâts, e cjârs specializâts (puarte container, par cjamâ autos, cisternis, tramogis e vie indenant).
Storie
[cambie | modifiche il codiç]![](http://178.128.105.246/content-http-upload.wikimedia.org/wikipedia/commons/thumb/f/f0/First_German_Railway.jpg/200px-First_German_Railway.jpg)
![](http://178.128.105.246/content-http-upload.wikimedia.org/wikipedia/commons/thumb/d/de/Ferrovia_del_Frejus.jpg/200px-Ferrovia_del_Frejus.jpg)
La storie de la ferade e tache in Ingletiere, là che prin e vignivin dopradis feradis tiradis di cjavai sedi inte zone da lis minieris, par gjavâ il minerâl, sedi intes grandis citâts pal traspuart public. La prime locomotive a vapôr e je dal 1804, la prime ferade publiche e fo il toc Stockton and Darlington Railway screade intal 1825. Purpûr si use scomençâ la storie da lis feradis cu la gare di Rainhill in Ingletiere par cjatâ la locomotive juste par cori su la linie di Liverpool. L' ing. George Stephenson al à fate la locomotive Rocket intal 1829, che ducj a clamin la prime da lis locomotivis parcè che tache insieme ducj i argagns come la cjalderie tubolâr cul camin. Cun chê Stephenson al è rivât a tocjâ i 48 km/h e i 28 km/h cun daûr cjars tirâts par 17 toneladis. In Ingletiere lis feradis a an dât une man al svilup da la Rivoluzion Industriâl. Di chê volte si è tacât a dâ un non specific a lis relazions tocjadis (linie Liverpool - Manchester). Di chê volte al è restât il fat che i trens su lis feradis a corin a çampe, e i segnai feroviariis a son a çampe dal sens di marce. La prime ferade taliane e fo la Napoli-Portici, intal Regni da lis dôs Siciliis, screade ai 3 di Otubar dal 1839 dal re Ferdinant II Borbon. Chê e jere il prin toc di chê che e vignarà la ferade Napoli - Nocera - Castellammare. Chest prin toc al jere lunc 7.640 metris, cuntune locomotive Bayard che e rivave a la velocitât di 60 km/h (50 km/h tirant daûr un tren).
Aspiets ambientai
[cambie | modifiche il codiç]Il traspuart feroviari al è il mieç di traspuart mecanic par vie tiere plui eficient pal consum di energjie. Lis sinis a dan un supuart plan e salt a lis ruedis dal tren, a fasin in maniere che lis ruedis a puedin rodolâ cun verementri poc freament; cussì che cun mancul pierdite di energjie pal atrît si dopre mancul potence, rispiet a compagns sistemis su gome e vie pes stradis, par tirâ plui cuantitât di pes, int o robe che a sedi. Cun di plui il slis de sine de ferade al rint il moviment plui comut in confront a di chei altris sistemis di traspuart vie tiere. In gjenar, a compagn tonelagjio (o numar di viazadôrs menâts), un tren al vûl dal 50 al 70% di mancul energjie rispiet al traspuart su strade, e viodût che si discjarie il propri pês in tiere, midiant lis traviersinis, dispiardintlu miôr, si à il risultât di podê vê plui pes par ogni cjarpint rispiet al traspuart stradâl.
La produzion de la energjie che e covente pe trazion e po vignì in dôs manieris difarentis: ·Trazion a eletric: l'energjie e ven di une centrâl eletriche, che e à une grande eficience. ·Trazion termiche: i motôrs diesel doprâts pa lis locomotivis a son di ultime gjenerazion che a puartin al mancul la strassarie di carburant.
Ducj e dôi chescj sistemis a son mancul incuinants rispiet ai motôrs dal traspuart su gome dulà ce ogni mieç al à un sô motôr dulà dut il procès e il control al è mancul sot voli. Il traspuart feroviari al dopre miôr il spazi. A timp compagn, une linie feroviarie a dopli binari mene un numar di personis o di toneladis di robe plui grant di une strade a cuatri corsiis. Chest al è il motîf par cui in tancj Stâts che a son plui indenant il traspuart feroviari al è la plui grande forme di traspuart public. Cun di plui la sigurece e je une vore plui alte che rispiet al traspuart su gome.
I prins trens in Friûl
[cambie | modifiche il codiç]Il 27 di Lui dal 1857 l'imperadôr d'Austrie Francesc Josef al screave il toc di Lubiane a Triest, fasint in maniere di podê lâ di Triest a la capitâl Vienne. Pal colegament Udin cun Vignesie, impen, si è scugnût spietâ il 1860. Tal 1879 si è podût lâ di Udin a Pontebe e Tarvis. Subite daspò la Societât Venete e à fat la Udin Cividât. Intal 1906 si è screade la Transalpine, che con un ardît segnât dulin vie la val dal Vipac e dal Lusinç, traviersant Gurize, Piedicuel e Bohinj, si tacave a la rêt che e jere za a Jezenice. A jerin oparis di inzegnerie che pe epoche e jerin un grum indenant, come il puint di Solkan che al à la plui alte arcade di piere intal mont (85 metris) o la galarie di Piedicuel sot da lis Alps Gjuliis lungje plui di sîs chilometris. La Transalpine e je stade une da lis viis plui impuartantis di comunicazion tra la Europe centrâl e il mâr par l'imperi austri-ungaric. Intai ains de Prime Vuere Mondial, a forin fats su diviers tocs di ferade, par plui a scartament a 750mm, par esempli il toc di Cividât a Cjaurêt lunc 28 Km, sierât intal 1932, o chel di Vile di Cjargne a Comelians, lunc 15,13 Km e sierât intal 1935. Une altre linie, la Tumieç Vile Santine, tignude de Societât Venete par agns, e à sierât il sô esercizi viazadôrs; il toc Tumieç Stazion pe Cjargne, ancje se je za ferme di ains, cun cualchi manutenzion straordenarie, al podarès benissim fâ il sô servizi merci. A Triest, in chê che cumò e je la stazion di Campo Marzio, al jere un toc di ferade che si tacave a Erpelle cu la ferade Istriane. E ancje un altri toc clamât la Parenzane che, a scartament ridot, al leve (dal 1902 al 1935) di Triest a Capodistrie-Buje-Visinada-Parenzo. La linie Tarvisio-Fusine-Ratece, intai ains '60, e à planc planc sierât come la Cjasarse Spilimberc-Pinçan. Altris progjets di potenziament, come la gnove Udin Triest cul toc dret di Cormons a Redipuie bandonât in funzion di altris lavôrs ritegnûts plui impurtants come chei dal scali di smistament merci di Çarvignan. Intai agns ’90 al è stât bandonât il toc di S.Zorç a Palme.
La rêt furlane dal dì di vuê
[cambie | modifiche il codiç]La rêt, ven a stâi stazions, implants eletrics, sinis e manutenzions, a stan sot Rete Ferroviaria Italiana. La S.p.A. Trenitalia, e fâs regolâr servizi su lis liniis de la Regjon e cul sô jutori, tant je vere che la Regjon e à contribuît a cjoli materiâl rotabil (par esempli il gnûf “Minuetto”). Lis liniis a dopli binari a son la Triest-Çarvignan-Tisane (par Vignesie), la Triest-Gurize-Udin-Sacîl (Trevîs-Vignesie) e la gnove “Pontebane” di Udin a Tarvis(-Arnoldstein), dutis eletrificadis. La "Pontebane", al moment pôc doprade, e di Cjargne a Tarvis in gran part in galarie o su viadots, e je a dopli binari e a velocitât teoriche fin a 180 Km/h e cun i plui modernis sistemis di sigurece.
Chês a binari sempliç a son la Glemone-Pinçan-Sacil (o "Pedemontane"), la Çarvignan-Palme-Udin, il toc Ronchi Sud-Ronchi Nord, la Gurize Slovenie (-Vrtojba-Nova Gorica), la linie merci ator di Udin e la Triest Campo Marzio-Rozzol-Opicine che e va a tacâsi cun chê a Monrupin (Kreplje-Nova Gorica "Transalpine") e la Vile Opcine-Nabresine.
Son ancje dai tocs par ûs industriâl: la Cjargne-Tumieç, la San Zorç-Puart Noiâr, il toc Monfalcon-puart, il toc Triest Aquilinie-Noghere, un toc a Osôf e cualchidun altri plui piçul (Budoie, Basilian, Tor di Zuin, Gurize, e vie indenant). Par ce che e rivuarde i scalis merci, al si scuen marcâ che tancj puescj doprâts par agns a son stâts sierâts come Tarcint, Cjargne o Cormons. Restin in vore pardabon Osôf, Palme e i puarts di Triest, Monfalcon e alc a Sant Zorç. Il grant implant di Çarvignan fat su intai prins agns ’80 al è nassût za vecjo: al jere stât pensât par un mont dividût tra est e ovest che a nol è plui. Cumò si cjatin, cundiplui dal nestri, smistaments in Austrie dongje Vilac e in Slovenie dongje Lubiane e si robin il lavôr un cul altri. Feroviis e Regjon a stan pensant di doprâ il scali di Çarvignan no plui come smistament ma come scali intermodâl, che al volarès dì meti a Çarvignan gran part de robe furlane che e viaze sul tren.
La linie a alte capacitât
[cambie | modifiche il codiç]La linie dal futûr e je che tal “Curidôr 5“ che e sarès un colegament internazionâl di Lisbone in Portogal al varès di lâ in Ucraine, il segnât al è decidût ma a son discussions e protestis. La gnove linie de basse furlane dal Tiliment fin a Tor di Zuin corarà dongje la autostrade, di Çarvignan al Lusinç vignarà dongje la linie vecje ancje se par slargjâsi nol è tant spazi: tai agns a àn fatis su cjasis fintremai sul ôr de ferovie. Ma a Porpêt la int no je par nuie contente di screâ une linie gnove tal paîs. Alì ator al è dut un davoi di autostrade, scjali merci di Strassolt, stradis e viadots za cumò. Lis previsions a sburtâ la gnove opare a son che intai prossims dîs agns il volum des mercis al sarà plui che dopli, il petroli al costarà masse, e la direzion no sarà tant viers il nord Europe, ma vignarà plui int e robe dal est. Il sisteme futûr (2020) al sarà une linie metropolitane (chê vecje) messedade cun chê (la gnove) ad alte capacitât. Le gnove linie intal toc Monfalcon-Triest, par vie dal Cjars e da lis sôs aghis di sot vie e da la dificoltât di sbusâ il Cjars, in galarie.
I comuns che no son dacuardi e che no àn firmât l'acuardi sul segnât proponût de Regjon F-VG a son chei di Porpêt, Vile Visintine, e chel di Doberdò.
Il prin toc si proviôt che al scomenci i lavôrs tal 2010. La Alte Capacitât daûr di un studi indipendent di une societât inglese, la Scott Wilson, al dîs che podarà gjavâ ae strade nome il 1% dal trafic. Secont une stime chest grues investiment al podarès gjavâ un 2,6% di passizîrs e il 3,7% di mercis. Cumò e tache la sô strade il progjet cu la Valutazion dal Impat Ambientâl, li che varan la pussibilitât di tornâ a fâsi sintî lis Aministrazions locâls ma ancje associazions, comitâts e citadins, par podê marcâ lis lôr osservazions. La V.I.A. e varà dut câs di tignî cont di dutis lis soluzions ancje fûr di chês za aprovadis. Sarà ancje di viodi se la opare e sta in pîts dal pont di viste economic. La opare cjalcje puescj di Impuartance Comunitarie e sot Protezion Speciâl che àn bisugne di valutazion un grum plui grivie par vie di "habitat" delicâts.
La linie Udin Cividât
[cambie | modifiche il codiç]Il 24 jugn dal1886, il prin tren al rivà di Udin inte stazion di Cividât. Il presit di chê prime corse al jere di Udin a Cividât di liris 1.65 pe prime classe, 1.20 liris pe seconde e 0.85 pe tierce. Il 23 novembar dal 1938 a àn cedût dôs arcadis dal puint su la Tor intant che al passave il tren di Udin fasintlu colâ dentri il flum, locomotive a vapôr e trê carocis, causant 13 muarts. Intai ains '50 e à vût il sô moment fuart sedi pai viazadôrs che pes mercis. Lis corieris intai '60 a àn fate une buine concorince che nome cun investiments in gnûf materiâl par sostituì lis vaporieris a àn podût tignì bot. Intai ains '80 a je stade rinovade la stazionute di Remanzâs par podê ancje incrosâ i trenos. Intai ains '90 ven screade une fermade a Butinins al servizi de zone industriâl di Cividât doprade in veretât une vore poc. La societât di gjestion che e jere la Venete, e devente Ferovie dal Nord - Est e daspò prin FUC (Ferovie Udin - Cividât) e di poc e je jentrade te gjestion la Regjon Friûl - Vignesie Julie. Par doprâ miôr i implants cun dute la lôr potenzialitât, sedi par viazadôrs che pe robe, al sarès bisugne di un sburt politic, come che lu à za dut il traspuart public, o di un cost dal traspuart privât mancul convenient.
Servizis pai viazadôrs disabii
[cambie | modifiche il codiç]Midiant dal sô servizi di Assistence presint in 225 stazions, Trenitalia e sigure plui servizis pai clients disabii: la metude a disposizion de cjadree cun lis ruedis, la guide in stazion e l'acompagnament fin al tren, tant la guide fin a le jessude de stazion o a un altri tren che al spiete, la salide e la dissese sui carei elevadôrs, il menâ a man il bagai (nome un cuel) la distribuzion di materiâl di informazion (libretuts, audio cassetis par cui che nol po sintî). I viazadôrs in carocele, interie o di pleâ, a puedin doprâ i trens che an la caroce cun l'imprest par montâ, che si po cognossile de piture internazionâl di pueste (pitogram).
Il tren covenient pai zovins Viazâ cul tren al è convenient pai zovins: i grops di almancul sîs students, cun di fat e àn bon dirit a un tai dal 20% par viazâ cul Eurostar, intes cucetis e tai vagons liet e dal 30% su ducj chei altris trens. I students che son sot dai 12 agns puedin vê la tarife speciâl dai zovins, ven a stâi di un di plui di scont dal 50% sui puescj a sintâsi e dal 30% par lis cucetis e veturis liet. Par ogni 15 students che pain al è juste proviodût un biliet a gratis par cui che al compagne e fin al massim di cinc gratuitâts par grup. I viazadôrs disabii che an il recuisît e puedin vê un tai al biliet (cun Cjarte Blu e concession special III e VIII). Cui che al à bisugne di un di plui di informazions al po cjatâ sul sît www.trenitalia.com inte part Servizis par disabii.