Arjen Robben
![](http://178.128.105.246/content-http-upload.wikimedia.org/wikipedia/commons/thumb/0/0d/2019147183036_2019-05-27_Fussball_1.FC_Kaiserslautern_vs_FC_Bayern_M%C3%BCnchen_-_Sven_-_1D_X_MK_II_-_0196_-_B70I8495.jpg/220px-2019147183036_2019-05-27_Fussball_1.FC_Kaiserslautern_vs_FC_Bayern_M%C3%BCnchen_-_Sven_-_1D_X_MK_II_-_0196_-_B70I8495.jpg)
Arjen Robben (Bedum, Grinslân, 23 jannewaris 1984) is in Nederlânske eardere beropsfuotballer dy't trochstrings as wjukspiler spile. Robben spile tusken 2003 en 2017 96 kear yn it Nederlânsk alvetal, wêrfoar hy sânentritich kear scoarde.
Robben debutearre yn desimber 2000 by FC Grins yn it betelle fuotbal. Nei oardel seizoen ferhuze hy nei PSV, wêr't hy yn 2003 syn earste kompetysje titel wûn en útroppen waard oant Nederlânsk Talint fan it Jier. Yn 2004 ferhuze hy foar achttjin miljoen euro nei Chelsea. Hoewol pleage troch blessueres pakte Robben mei The Blues twa nasjonale kampioenskippen op rige (2005 en 2006).
Nei trije jier by Chelsea gie Robben fuort yn 2007 foar fiifentritich miljoen euro nei Real Madrid. Hy groeide út oant in wichtige spiler yn it alvetal dat yn 2008 de Spaanske titel pakte en spile der mei-inoar mei fiif lângenoaten; Van Nistelrooij, Sneijder, Drenthe, Van der Vaart en Huntelaar. Yn de simmer fan 2009 frege de oankeap fan nije Galácticos him te fuortgean en makke hy de transfer nei Bayern München. Mei de Dútske Rekordmeister wûn hy tweintich prizen, wêrûnder de UEFA Champions League, de UEFA Super Cup en fiif kear de Dútske dûbeld. Robben spile by Bayern tsien jier mei-inoar yn de oanfal mei Franck Ribéry. Sy krigen hjir as twatal de bynamme 'Robbery'.
Robben debutearre yn april 2003 op 'e leeftyd fan njoggentjin yn it Nederlânsk alvetal. Hy fertsjintwurdige syn lân op de Europeeske kampioenskippen fan 2004, 2008 en 2012 en de wrâldkampioenskippen fan 2006, 2010 en 2014. Tidens de WK's fan 2010 en 2014 waard hy nominearre foar de Gouden Bal. Yn 2014 waard Robben as earste fuotballer sûnt Ruud Gullit (1987) keazen ta Nederlânsk Sportman fan it Jier.
Yn july 2021 makke hy bekend definityf te stopjen mei syn fuotbalkarriêre. Op 7 novimber 2021 fûn yn it stadium fan FC Grins in earbetoan oan Robben plak.
Op 25 septimber 2022 waard bekend makke dat de KNVB Arjen Robben beneamd hat ta bûnsridder. De bekendmakking fûn plak op in gearkomste fan âld-Oranje fuotballers yn Seist, foarôfgeand oan de Nations League wedstriid tusken Nederlân en België yn de Johan Cruijff ArenA.[1]
Boarnen, noaten en/as referinsjes: |
![]() |
Ofbylden dy't by dit ûnderwerp hearre, binne te finen yn de kategory Arjen Robben fan Wikimedia Commons. |