Antonio Ramos Varela
Biografía | |
---|---|
Nacemento | 27 de outubro de 1903 Ferrol, España |
Morte | 19 de xaneiro de 1945 (41 anos) Santiago de Compostela, España |
Causa da morte | tuberculose |
Datos persoais | |
País de nacionalidade | España |
Actividade | |
Ocupación | escritor , sindicalista , político |
Lingua | Lingua castelá |
Antonio Ramos Varela, nado en Ferrol o 27 de outubro de 1903 e finado en Santiago de Compostela o 19 de xaneiro de 1945, foi un escritor, sindicalista e político galego.
Traxectoria
[editar | editar a fonte]Fillo de Marcelino Ramos López, coronel de Infantaría de Mariña de Ferrol. A familia trasladouse a Santiago de Compostela cando Antonio era moi novo. Acadou o título de bacharel en 1922 e matriculouse na Facultade de Ciencias da USC. Volveu a Ferrol e regresou a Compostela cara 1930, comezando a súa amizade con Cesáreo Briones Varela. Colaborou en ¡Despertad!. Durante a Segunda República frecuentou os faladoiros do Café Español con Luís Manteiga, Luís Seoane e Carlos Maside. De ideoloxía anarquista e militante da FAI compostelá, escribiu a obra teatral Un suceso en los arrabales, publicada en 1933 por Ediciones Resol. Formou parte das Misións Pedagóxicas que recorreron Galicia entre agosto e decembro de 1933. Co golpe de Estado do 18 de xullo de 1936 estivo agochado, pero foi detido o 14 de decembro. Xulgado en Compostela por rebelión militar o 30 de decembro de 1936, foi condenado a pena de morte, pero a sentenza foi conmutada por cadea perpetua grazas á intervención de Santiago Montero Díaz. Permaneceu no presidio de Santiago até que o 15 de decembro de 1938 foi trasladado á Coruña. O 16 de febreiro de 1943 foille conmutada a pena por seis anos de prisión menor e o 6 de marzo quedou en liberdade provisional. Ao saír da cadea morreu de tuberculose en 1945.
Obras
[editar | editar a fonte]- Un suceso en los arrabales (estampa dramática en un acto), 1933.
- "Notas en torno a Sören Kierkegaard: el concepto de la angustia y la categoría psicológica de la ambigüedad" in Boletín de la Universidad de Santiago de Compostela, Ano 5, nº 17 (1933), 155-166.
Véxase tamén
[editar | editar a fonte]Bibliografía
[editar | editar a fonte]- Fernández, Eliseo; Pereira, Dionisio (2004). O anarquismo na Galiza. Santiago de Compostela: Positivas. p. 208. ISBN 84-87783-79-1.
- Otero Urtaza, Eugenio (2008). Universidade de Santiago de Compostela, ed. "Antonio Ramos Varela. Noticia dun intelectual libertario esquecido" (PDF). Boletín Galego de Literatura (39-40): 297–316. Arquivado dende o orixinal (PDF) o 04 de marzo de 2016. Consultado o 16 de agosto de 2013.
- Otero Urtaza, Eugenio (2010). Universidade de Santiago de Compostela, ed. "Antonio Ramos Varela. Textos políticos". Boletín Galego de Literatura (43): 235–258. Consultado o 14 de novembro de 2023.
Ligazóns externas
[editar | editar a fonte]- Antonio Ramos Varela na base de datos do proxecto Nomes e voces.
- Apuntamentos para unha enciclopedia histórica do anarquismo galego (R)