Craps
![](http://178.128.105.246/content-http-upload.wikimedia.org/wikipedia/commons/thumb/3/3f/Craps_game_at_military_camp_in_1918.jpg/300px-Craps_game_at_military_camp_in_1918.jpg)
![](http://178.128.105.246/content-http-upload.wikimedia.org/wikipedia/commons/thumb/a/a3/Marines_and_sailors_attended_5th_annual_Casino_Royale_event_130928-M-WI309-003.jpg/300px-Marines_and_sailors_attended_5th_annual_Casino_Royale_event_130928-M-WI309-003.jpg)
Craps (o crapes) es un jua de dados en cual juores aposta sur la resultas de un rola o serie de rolas, de du dados. Juores pote aposta mone contra lunlotra ("craps de la strada"), o contra un banco ("craps de casinos" o "craps de table") Car lo no nesesa multe aparatos (la du dados), lo pote es juada en situas nonformal.
Craps ia developa en la SUA de un simpli de la jua de Europa ueste nomida hazard ("risca"). Hazard ia es prima notada en la "Naretas de Canterbury" par Geoffrey Chaucer, de la sentenio 14. Lo ia veni a Nova Orleans, Louisiana sirca 1805 par Bernard Xavier Philippe de Marigny de Mandeville, un apostor e eritor de un familia de imobilores en Louisiana colonial. Hazard e craps no ia es conoseda par americanes de la clase alta, cual resulta en de Marigny introduinte sua jua nova a la suclase local. laborores de cultiverias e portones ia instrui sua amis ci ia porta la jua norde sur la Rio Mississippi e sua afluentes. Per selebra la susede de la jua, de Marigny ia dona la nomi "Rue de Craps" a un strada de sua sudivide nova en Nova Orleans.
En la Gera Mundal 1, la popularia de craps ia esplode cuando omes joven american de cada clase sosial ia entra la militar. La varia de strada de craps ia es popular entre soldatos, ci ia jua frecuente sur un covreleto (per permete asconde rapida de dados e mone cuando ofisiores ariva). Sua memorias de la gera ia resulta con craps deveninte la jua dominante de casinos en Las Vegas e la Caribe. Pos 1960, alga casinos en Europa, Australia, e Macau ia comensa ofre craps, e pos 2004, casinos enlinia ia estende lo global.
La regulas per la jua simple (acc "craps de strada")
- Si un juor rola 7 o 11, la rolor gania e continua jua. Un rola de 2, 3, o 12, la juor fali, ma es permeteda per continua jua;
- Si la juor rola 4, 5, 6, 8, 9, o 10, el pote rola ancora. Si el rola la mesma cuantia, el gania. El pote repete asta el ateni sua gol, ma si el rola un 7, el fali e el debe pasa la dados a la juor seguente;
- Cada ves ce la juor gania, el continua rola la dados.
Juores aposta ante cada rola, e mone es intercambiada pos cada rola.
Craps ave su propre "lingua" (traduida o en la engles orijinal):
- Un rola de 2 es nomida "oios de serpente" (snake eyes);
- Un rola de 4 es nomida "Jo peti" (little Joe);
- Un rola de 12 es nomida un "vagones" (boxcars).
Rolas de 4, 6, 8, e 10 es nomida "difisil" (hard) si los es composada de du de la mesma cuantia (pd 2-2, 3-3, 4-4, 5-5); cualce otra composa en nomida "fasil" (easy)
En casinos, crapes es juada sur un table, marcada con multe posibles de aposta. Lo ave multe regulas (tipal fundida sur la probablias) e la casino (la "casa" o house) prende proportios de apostas nonrealida. La espresa cual resulta es ce "la casa nunca fali".