Gato
Gatos domada (Felis catus) es mamales carnivor, peti, e normal pelosa. Los es comun asetada como animales de casa. Los es ance valuada per sua capasia de xasa animales nosiva como muses.
![](http://178.128.105.246/content-http-upload.wikimedia.org/wikipedia/commons/thumb/7/7f/Nagec_cat.jpg/299px-Nagec_cat.jpg)
Los es simil en anatomia a otra felidos, con corpos forte e flexable, reflexes rapida, talones agu e retirable, e dentes cual es bon per mata predas peti. Gatos ave sensas cual aida los como predores noturnal, sua nix ecolojial. Los pote oia sonas tro cuieta o tro alta en frecuentia per oreas umana, como los fada par muses e otra predas peti. Los pote vide bon en oscuria cuasi completa. Los ave vide de colores minimal, e un sensa multe bon de ole.
An si los es xasores solitar, gatos es un spesie sosial. Comunica entre gatos inclui un varia de vosis – miaus, ronronas, vibras, sisas e roncas. Ance los usa feromones e lingua corpal.
Gatos reprodui rapida. Con reprodui controlada, los pote es elevada per crea razas variosa, incluinte linias de sangue "pur". Sin controla de la reprodui de gatos par neutri, e car los es comun abandonada, la cuantia de gatos savaje ia crese multe tra la mundo. Sola en la SUA, on ave sirca 60 miliones gatos savaje.
Car gatos ia es un parte de la relijio de Egipte antica, multe persones crede ce los ia es domada ala. Ma lo es posible ce los ia es domada en tempo tan temprana como la eda neolitica. Un studia jenetical en 2007 ia mostra ce gatos domada ia desende de gatos savaje african (Felis silvestris libica) sirca 8000 aec en Asia sude-ueste.
Gatos es la animal de casa la plu popular en la mundo.