Intestin spesa
![](http://178.128.105.246/content-http-upload.wikimedia.org/wikipedia/commons/thumb/6/62/Blausen_0603_LargeIntestine_Anatomy.png/220px-Blausen_0603_LargeIntestine_Anatomy.png)
La intestin spesa es la parte final de la duto gastrointestinal. La intestin spesa es composada de la seco (liada con la apendis), colon, reto, e canal anal. Acua e sal es asorbeda par la intesin spesa e la dejetada restante es retenida como feces ante espulsa par feci. Lo es ance la loca en cual fermenta, aidada par baterias e otra microbios, de materia nonasorbada.
En umanas, la intestin spesa comensa en la rejion destra de la ilio de la pelvis, a o su la taie, do lo es juntada a la fini de la intestin magra a la seco, via la valva ileosecal. Lo alora continua como la colon asendente longo la adomen destra, e supra la vasta de la caveta adominal como la colon traversal. Final, lo deveni la colon desendente longo la adomen sinistra, la colon sigmoide (nomida per sua forma de un S), la reto e ultima a la ano.
La intestin spesa en adultes umana es sirca 166 cm per omes e 155 cm per femes, cual es sirca un sinci de la longia de la duto gastrointestinal. La diametre promedia de la seco es 8.7 cm, la colon asendente 6.6 cm, la colon traversal 5.8 cm, la colon desendente (e colon sigmoide) 6.3 cm, e la reto prosima a la junta con la sigmoide 5.7 cm.