Eric Wiebes
Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.
![](http://178.128.105.246/content-http-upload.wikimedia.org/wikipedia/commons/thumb/e/ef/Eric_Wiebes_2015_%281%29.jpg/220px-Eric_Wiebes_2015_%281%29.jpg)
Eric Wiebes (Delf, 12 miert 1963) is politicus en d'n huidege Nederlandse minister vaan Economische zake en klimaot in 't Kabbinèt-Rutte III sinds 26 oktober 2017. Wiebes is lid vaan de liberaol-conservatieve polletieke partij VVD, die op EU-niveau deil oetmaak vaan de conservatievere vleugel vaan de EU-partij ALDE (de partij boe ouch de Nederlandse D66, de Belzje Open Vld en MR en de Duitse FDP bis behure).
Wiebes studeerde aon de Technische Universiteit Delft, boe heer tot ingenieur is opgeleid. In ziene studentetied woort heer lid vaan de VVD. Daonao runde Wiebes ouch 'n opleiing in bedriefskunde aof. In de tachteger en negeteger jaore waor Wiebes werkzaom bij de bedrieve Shell, McKinsey en OC&C.
Vaan 2010 bis 2014 waor heer Wèthawwer in Amsterdam. Tijdens 't wèthawwersjap, in 2013, waor heer 'nen deilnummer vaan de adviescommissie die staotssikertaris Wilma Mansveld samestèlde nao aonleiing vaan de probleme roond de Italiaonse Fyra-treine. Nao die carrière waor Wiebes vaan 2014 bis 2017 staotssikkertaris vaan Financië. Dit had heer euvergenomme vaan Frans Weekers, naotot Weekers waor aofgetroje op 30 jannewarie 2014. Weekers trooj aof naotot versjèllende Nederlandse en Bölgaorse tèllevisieprogramme hadde aongetoend tot Weekers al e jaor op de huugde waor vaan belastingfraude die gepleeg woort door Bölgaorse börgers in Nederland.
In 't naojaor vaan 2016 raakde Wiebes in polletieke probleme. Heer had de Twiede Kamer bewös neet geïnformeerd euver de probleme en euversjrijinge bij de vertrèkrangatie veur wèrknummers bij de Belastingdeens. In miert 2016 waor Wiebes heieuver al geïnformeerd. Wijer waor heer stèl euver 't vreugpensioenkarakter vaan de rangatie in de Kamer en dit woort häöm in jannewarie 2016 al gemeld. Wijer waor, tege de procedures in, gein advies gevraog aon 'n speciaal kemissie die mós advisere euver de reorganisatie.