Guusje ter Horst
Dit artikel is gesjreve (of begós) in 't Valkebergs. Laes hie wie v'r mit de versjillende saorte Limburgs ómgaon.
![](http://178.128.105.246/content-http-upload.wikimedia.org/wikipedia/commons/thumb/7/7b/TerHorst_Dutch_politician_kabinet_Balkenende_IV.jpg/150px-TerHorst_Dutch_politician_kabinet_Balkenende_IV.jpg)
Guusje ter Horst (Deventer, 22 mièrt 1952) ies 'n Nederlandse politica. Saer 22 februari 2007 ies ze minister van Binnelandse Zake en Keuninkrieksrelaties in 't kabinet-Balkenende IV. Ièrder waor ze börgemeister van Nijmege. Ter Horst ies lid van de Partij van de Arbeid.
Ter Horst góng in Den Haag nao 't gymnasium. Daonao sjtudeerde ze psychologie aan de Universiteit van Amsterdam. In 1984 promoveerde zie dao in de sociaal weitesjappe op de vraog wie luuj die noats nao de tandarts goont gesjtimuleerd kènne were um dat toch te doon. Van 1986 tot 1994 waor zie universitair hoofdocent bie de vakgroep Sociale Tandheelkunde, subfaculteit Tandheelkunde van de Universiteit van Amsterdam, later 't Academisch Centrum Tandheelkunde Amsterdam (ACTA).
Ter Horst woort in 1984 lid van de PvdA. Van 1986 tot 1992 zoot ze in de Amsterdamse gemeinteraod. Denao waor ze veurzieter van de universiteitsraod van de Universiteit van Amsterdam. In 1994 woort ze in Amsterdam beneump tot wèthouwer, mèt in häör portefeuille openbaar ruumde, bedrieve, personeelszake, monumentezörg en gezóndheidszörg. Ze initieerde 'n groatsjalige en gefaseerde renovatie van de sjtad, die allewiel nog bezig ies.
Op 15 april 2001 woort Ter Horst beneump es börgemeister van Nijmege. Ze verhuusde eder jaor nao 'n ander wiek um de sjtad beter te lière kènne. In augustus 2006 kaom Ter Horst in 't nuujts naodat ze een maond ièrder bie 'n alcoholcontrole waor betrap op rieje ónder invlood. De politieke partieje in de Nijmeegse raod vónge dat de euvertraejing gein consequenties hoofde te höbbe veur de börgemeister. Ter Horst woort op 8 januari 2007 opgevolg door Thom de Graaf (D66).
In 't veerde kabinet-Balkenende ies Ter Horst minister van Binnelandse Zake en Keuninkrieksrelaties.