Johannes Kepler
Dit artikel is gesjreve (of begós) in 't Remunjs. Laes hie wie v'r mit de versjillende saorte Limburgs ómgaon.
![](http://178.128.105.246/content-http-upload.wikimedia.org/wikipedia/commons/thumb/a/a9/Portrait_Confused_With_Johannes_Kepler_1610.jpg/220px-Portrait_Confused_With_Johannes_Kepler_1610.jpg)
Johannes Kepler of Johannes Keppler (Weil der Stadt, 27 december 1571 – Regensburg, 15 november 1630) waas 'nen Duutsen astronoom, astroloog, wiskundige en netuurkundige, dae veural bekènd waerde door zien sjtudie van de hemelmechanica en in 't biezunjer vanwaege de beraekening van de planeetbewaeginge en de dao-euver geformuleerde wètte, de wètte van Kepler. Isaac Newton zów dees óntdèkking door zien algemein wètte van de wèt van de zwaordekrach netuurkundig verklaore. Kepler waas 'ne pioneer van de optica en de kristallografie. Es wiskundige waas t'r 'ne veurluiper van de integraalraekening door zien volumebepaoling van ómdrejjingslichame wie wienvate. Hae heel zich ouch bezig mit kosmologische speculaties en sjreef zelfs vreuge sciencefiction.
Kepler keerde zich taenge de gebroekelike astrologie, meh waas zelf 'nen actieven astroloog. Volges 'm kós astrologie weitesjappelik beoefend waere. Bie zien verklaoring van 't versjiene van de nuuj ster in 1604, SN 1604, noom d'r zien toevlöch tót astrologische ideeje en terminologieje.