Nice
Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.
![](http://178.128.105.246/content-http-upload.wikimedia.org/wikipedia/commons/thumb/b/b7/Nizza-C%C3%B4te_d%27Azur.jpg/220px-Nizza-C%C3%B4te_d%27Azur.jpg)
Nice (Occitaans: Nissa, Italiaans: Nizza) is 'n stad in Fraankriek, in de regio Provence-Alpes-Côte-d'Azur, 't departemint Alpes-Maritimes en 't arrondissemint Nice. Vaan de lèste twie is 't de hoofplaots. De gemeinte mit 71,92 km² en had in 2013 342.295 inwoeners. De stad ligk aon de Azuurkös (Côte d'Azur) op inkel kilometers vaan Monaco en zoe'n twinteg kilometer vaan d'n Italiaanse grens. 't Klimaot trèk sinds jaor en daag väöl strandtoerisme nao de stad. Taol en cultuur doen zier Italiaons aon; 't Occitaans dialek vaan de stad steit kort bij 't Ligurisch en de aw binnestad kint väöl ing getskes mèt witte hoezer en sjoen renaissancearsjitectuur. De stad weurt evels veural gedomineerd door gebouwe oet 't fin de siècle en d'n twintegsten iew, die hei nao de koms vaan 't massatoerisme zien gebouwd.
Nice woort in de vierden iew veur Christus es Griekse kolonie gestiech oonder de naom Nikaia, nao de Griekse godin Nikè. In 154 veur Christus vele de Romeine Nicaea binne, die 't bij hun riek veugde. Nicaea en umgeving woorte, aanders es vaandaog d'n daag, geografisch tot Italië gerekend. Ouch in de middeliewe en laank daonao bleef dat zoe. In de vreug middeliewe vèlt de stad achterein oonder 't riek vaan de Oosgote, 't Oosromeins Riek, 't riek vaan de Longobarde, 't Frankisch Riek en 't Heileg Roems Riek, um ziech in 1108 es rippubliek oonaofhenkelek te verklaore. Nao zwoer gevechte kump Nice dezelfden iew nog oonder Provençaals bewind, welk gebeed later euvergeit in 't hertogdom Savoye. Deze staot geit in 1820 op in 't keuninkriek Sardinië. Nao 't korte oonderbreking oonder Napoleon blijf Nice in Sardijnse han, tot 't in 1860 door Fraankriek weurt geannexeerd. Oonder Frans bewind kump 't massatoerisme op gaank. In d'n Twiede Wereldoorlog weurt Nice door fascistisch Italië bezat. In augustus 1944 maak de stad 'n Amerikaans bombardemint door.
De stad woort op 14 juli 2016 getroffe door 'nen terroristischen aonslaag mèt 'n vrachwage, boebij 86 lui storve.