Operaçion Uran
ZE-P
|
Sta paggina chie a l'è scrita in zeneize, co' ina grafia tipo quella do Prian do 1745 |
![](http://178.128.105.246/content-http-upload.wikimedia.org/wikipedia/commons/thumb/7/77/Operation_Uranus.svg/250px-Operation_Uranus.svg.png)
Operaçion Uran (in ruscio Операция Уран – Operacija Uran) o l'ea o nomme in codiçe assegnao da-i soviettichi a-a grande ofensciva d'açerciamento sferâ da l'Armâ Rossa pe intrapolâ e forçe da Wehrmacht impegnæ inta region de Stalingraddo, durante a segonda goæra mondiâ. O doggio açerciamento, conseguio da l'Armâ Rossa co' ina gigantesca manœuvra a tenaggia, o çomençò o 19 novembre 1942 e i doi atacchi se conzonsan a sud de Kalač quattro giorni doppo. Questa riuscia e rappida ofensciva a l'ebbe una fonçion deçixiva into complesso di operaçioin militæ che piggian o nomme de bataggia de Stalingraddo, marcando ascì una virata strateggica inreverscibbile a favô de l'Union Sovietica de l'intrega goæra insci-o fronte orientâ[1].
A preparaçion e a strategia
[modìfica | modìfica wikitèsto]Scitoaçion strateggica insci-o fronte orientâ inte l'aotunno 1942
[modìfica | modìfica wikitèsto]A scitoaçion strateggica globâ into setô meridionâ do fronte orientâ a-a meitæ de novembre 1942 a vedeiva i doî ragroppamenti prinçipæ todeschi, o Gruppo d'armæ B a-o comando do generâ Maximilian von Weichs e o Gruppo d'armæ A, dipendente direttamente da l'OKH (Oberkommando des Heeres – ato comando de l'esercito) e quindi da Hitler, doppo a destituçion in setembre do feldmaresciallo Wilhelm List[2], da molte settemañe praticamente fermi e estenuæ da di continnoi combatimenti segge inta region caocaxica, dov'ean in corso di dui scontri inte l'area de Tuapse e insci-o sciumme Terek, segge soviatutto inta region de Stalingraddo dove a 6ª Armâ do generâ Friedrich Paulus a l'ea aprœuvo a dissangoase inutilmente[3].
I scianchi do ragropamento de Stalingraddo, schieræ longo o corso do Don a nord e inta region di laghi sæ a sud da çittæ, raprezentavan di arrie de peigo potençiâ in vista da stagion invernâ, in primmo lœugo pi-a deboleçça di armæ italiañe, rumeñe e ungaize schieræ insce queste poxiçioin e pœu pi-a presença de profonde teste de ponte soviettiche a sud do sciumme da-o quæ o nemigo o l'avieiva posciuo teoricamente contrataccâ. Difæti into meize d'agosto into corso da coscidita primma battaggia difensciva do Don (20-28 agosto 1942) e forçe italiañe aveivan dovuo cede tanto teren a sud do Don a Serafimovič e Verchnij Mamon, mentre di atre teste de ponte ean stæte conquistæ da-i soviettichi a Kletskaja e a Kremenskaja[4]. Doppo e dificortæ di combatimenti d'agosto, o Corpo de spediçion italian o l'ea stæto in parte spostao ciu a nord into setô do meddio e ato Don, lasciando a-a fin de setembre a difeisa da peigoza arria de Serafimovič e Kletskaja a-e divixoin da 3ª Armâ rumeña, apeña arivæ[5].
Effetivamente, da setembre o Stavka (Ato comando soviettico) o l'ea aprœuv'a studiâ e a organizâ un vasto progetto de controfensciva globâ into setô meridionâ pe imbósâ a scitoaçion complesciva e provocâ 'na virata decixiva into conflito[6].
I cen de l'Armâ Rossa
[modìfica | modìfica wikitèsto]In realtæ o Stalin za durante a burascoza conferença de Mosca co-o Winston Churchill do 12-17 agosto 1942 o comunicò a-o Primmo Ministro britannego a so intençion de sferâ una grande ofensciva invernâ, e o mostrò fiduccia e determinaçion nonostante a scituaçion aparentemente despiâ a Stalingraddo[7]; in questa fase tuttavia pâ chi-a pianificaçion do Stavka a se limitesse a ipotizâ e organizâ di limitæ contratacchi tattichi insci-i scianchi do ragropamento todesco do generâ Paulus (coscidito kontrudar – contratacco con obiettivi locali) e, a-o manco stando a-i reizoconti aotobiograffichi di prinçipæ protagonisti, fu solo durante a riunion a-o Cremlin do 12-13 setembre che preize forma o grande progetto de ofensciva globâ con di obiettivi strateggichi[8].
In questa circostança o generâ Georgij Žukov, viçe comandante in cappo de l'Armâ Rossa, e o generâ Aleksandr Vasilevskij, cappo de Stato Magiô generâ, illustron a-o Stalin i modesti rezultæ di atacchi sferæ inte setemañe precedente contra-o scianco scinistro da 6ª Armâ todesca che, sciben ch'o l'avesse impaciao o nemigo, ean terminæ con de pesante perdie d'ommi e mezi coraçæ, e propozan "una nœuva soluçion" pe resciorve a scitoaçion into setô meridionâ do fronte orientâ. I doî generæ prezenton quindi a-a matin do 13 setembre, doppo ina nœutte passâ insemme a-i so conlaboatoî a analizâ e mappe e e forçe de riserva disponibile, o primmo schema generâ d'ofensciva strateggica contempoannia insci-i doi scianchi do fronte de l'Asse into setô do Don e do Volga (coscidita kontrnastuplenie – controfensciva strateggica co-o coinvolgimento de trei Fronti de l'Armâ Rossa), a-o scopo de sbaraliâ e difeize nemighe e ótegnî un açerciamento generâ do ragropamento todesco concentrao a Stalingraddo[6].
Doppo che e forçe todesche prinçipæ do Groppo d'armæ B se concentron a Stalingraddo, i generæ Žukov e Vasilevskij e i so conlaboatoî do Stato magiô generâ (prinçipalmente i generæ Štemenko, Ivanov e Bokov) adoton o cian da manœuvra d'açerciamento a grande distança da-o fronte combatente de Stalingraddo e co-a necescitæ de 'n difiçile traversamento de sorpreiza do Don, pe træ raxoin prinçipæ: 1) atacâ i fronti ciu debboli difeixi da-e truppe rumeñe mâ equipagiæ; 2) ótegnî l'açerciamento de 'na massa ben magiô de forçe de l'Asse e quindi razonze un rizultao decixivo pe-i equilibbri futui da guæra; 3) rende dificortozo un rappido intervento di unitæ meccanizæ da 6ª Armâ, arestæ ancon inganciæ a est do Don inti contorni da çitæ de Stalingraddo e quindi ben lontañe da-i previsti asci prinçipæ de movimento de colonne coraççæ soviettiche[9].
O Stalin, assæ scettico doppo tante deluxoin insce-e capaçitæ do sœu ezerçito d'organizâ e eseguî un cian coscì complesso e ambiçioso, o dette o sœu consenso con rilutança, arestando ansciozo e dubbiozo fin a l'urtimo e, pu mettendo a dispoxiçion e risorse necessaie e agindo co-a so nota energia pe riorganizâ e potençiâ e forçe pe l'iminente ofensciva, o l'organizò de nœuve rœünioin de cianificaçion e o l'inviò in miscion de controllo e coordinamento insci-i fronti interessæ i generæ Žukov, Vasilevskij e Voronov pe controlâ con cua i preparativi e sorvegiâ a coretta esecuçion di ordini[10].
Inti meixi de setembre e otobre i generæ Žukov e Vasilevskij, insemme a nomioxi conlaboatoî, andon ciu votte a-i quartê generæ do Fronte[11] de Stalingraddo (sempre a-o comando do generâ Andrej Erëmenko) e do Fronte do Don (passao a-o comando do generâ Konstantin Rokossovskij), mentre fu organizao (a partî da-o 22 otobre) un nœuvo fronte, o Fronte Sud-Ovest, incaregao de sferâ l'atacco decixivo a partî da-e teste de ponte insci-o Don e afiao a-o comando do zovveno e energico generâ Nikolaj Vatutin. Inte sta longa fase preparatoia o cian "Uran" (nomme in codice da controfensciva) o fu ulteriormente ampliao e cianificao into detallio. Di importanti contributi a-a cianificaçion operativa dette o generâ Erëmenko, ch'o l'aiva za aotonomamente prospetao un scimmile progetto ofenscivo e ch'o l'evidençiò co-i ati comandi a necescitæ de sferâ un atacco concentrao e possente pe sfondâ completamente o fronte nemigo e avançâ subbito in profonditæ co-e colonne coraççæ, e o generâ Vatutin ascì (ex-conlabratô e ommo de fiduccia do Vasilevskij)[12].
A strategia di generæ Žukov e Vasilevskij, condivisa a-a fin da-o Stalin asc,ì che tuttavia o l'arestò sempre ben prócupao pi-a scituaçion a l'interno da çitæ de Stalingraddo, che into meize d'otobre a paiva insci-o ponto de cazze in man todesca, a prevedeiva de ridue a-o minnimo i debboli contratacchi sferæ a partî da-i primmi giorni de setembre, insci-i scianchi do gran saliente da 6ª Armâ, ch'ean tutti completamente falii sciben ch'avessan atiao parte de forçe todesche e disturbao benben o generâ Paulus e o comando todesco. L'ea necessaio invece concentrase insce l'organizaçion metoddica e scistemattica de gren forçe ofenscive da impiegâ in massa insci-i debboli scianchi do ragropamento todesco de Stalingraddo difeixi daprinçippio da-e truppe italiañe, che s'ean dimostræ particolarmente senscibbile a-i violenti atacchi de forçe soviettiche in agosto, e da otobre afidæ a-e truppe rumeñe[13].
A questo scopo o comandante da 62ª Armâ, generâ Čujkov suceduo a Aleksandr Lopatin o 12 setembre[14], e i so ommi avieivan dovuo continoâ a battise tenaxemente in difeiza pe inganciâ e logorâ i todeschi co-o minnimo de rinforçi e rifornimenti pe evitâ de ese sconfiti e recaciæ into Volga e pe guaagnâ o tempo necessaio a organizâ a controfensciva strateggica soviettica. In pratica a 62ª Armâ a l'avieiva dovuo combatte pe portâ a l'ezaorimento a 6ª Armâ todesca, mentre e truppe soviettiche fresche saieivan stæte dœuviæ pe costituî e riserve necessaie pi-a gigantesca operaçion l'obiettivo da quæ, da conseguî co' ina serrie d'ofenscive "planetaie" (con di nommi in coddiçe astronommichi: "Uran", "Saturno", "Marte", "Zœuve") o l'ea foscia a distruçion do fronte de l'Asse segge a sud (Stalingraddo-Caocaso) che inta region çentrâ (Ržev-Vjazma)[15].
![](http://178.128.105.246/content-http-upload.wikimedia.org/wikipedia/commons/thumb/c/c0/RokossovskyKK.jpg/170px-RokossovskyKK.jpg)
In efetti pâ che durante 'na nœuva reunion do Stavka ch'a se tegnì da-o 26 a-o 27 setembre co-o Stalin, Vasilevskij e Žukov non solo fu definitivamente aprovao l'operaçion Uran into setô Don-Volga, da quæ fu previsto o prinçippio inte 'n primmo tempo za pe-o 20 otobre, ma ascì una nœuva grande ofensciva into setô de Ržev (coscidita "operaçion Marte") con l'obietivo in parte d'atiâ l'atençion de riserve todesche lontan da-a region meridionâ do fronte, ma in parte ascì d'ótegnî un sucesso decixivo inta region a ovest de Mosca[16]. A nœuva operaçion (a-a quæ fu assegnao de forçe molto ingente) a fu afiâ da-o Stalin a-a supervixon do generâ Žukov, che tuttavia o mantègne ascì o controllo, insemme a-o generâ Vasilevskij, da cianificaçion e de l'organizaçion de l'operaçion Uran.
Inte conferençe de setembre do Stavka fu ascì discusso di ulterioî gren ofenscive pe sfrutâ i previsti sucesci, e quindi se ipotizò un cian "Saturno" pe completâ a desfæta todesca into setô meridionâ (ch'o saieiva stæto dapœu definio into detaggio tra-o Stalin e-o Vasilevskij o 27 novembre) e foscia un cian "Giove" ascì, pi ampliâ l'atacco insci-o fronte de Ržev. L'operaçion "Marte" a fu daprimma stabilia pe-o 12 otobre mentre "Uran" a l'avieiva dovuo començâ o 20 do mæximo meize, ma e gren dificortæ e i ritardi inta costituçion de forçe ofenscive previste feççan sucescivamente slitâ e dæte de doe ofenscive[17].
Preparativi pe l'ofensciva
[modìfica | modìfica wikitèsto]I preparativi pi-a controfensciva into setô de Stalingraddo (operaçion Uran), che pe-e so impricaçioin strateggiche e politico-propagandistiche ascì a l'arestò l'operaçion ciu importante de l'Armâ Rossa tra quelle cianificæ pi-a campagna d'inverno 1942-43[18], fun complesci e ralentæ da-i problemi logisteghi, da-e carençe organizative soviettiche e da-a necescitæ de mascherâ a-o nemigo e intençioin e i preparativi in corso. Divégne quindi inevitabbile 'na serrie de rinvii da dæta de partença. O generâ Žukov o l'aiva inte 'n primmo tempo recesto quaranteçinque giorni de tempo a-o Stalin pe costituî e forçe necessaie a razonze o sucesso ch'a-a fin diventon doi meixi, da meitæ setembre a meitæ novembre, inti quæ e forçe soviettiche do generâ Čujkov dovettan sostegnî i sangoinenti e dramattichi combatimenti a l'interno da çitæ de Stalingraddo[19].
![](http://178.128.105.246/content-http-upload.wikimedia.org/wikipedia/commons/thumb/e/e0/T34_tanks.jpg/220px-T34_tanks.jpg)
Inte sta faze da guæra, a produçion bellica soviettica, graççie a-o decixivo aporto de fabbriche d'armamenti evacuæ da-e regioin invase e stramuæ a-o seguo inti Urali e inta Scibeia, a l'ea za superiô quantitativamente, e in parte anche qualitativamente, a quella todesca[20] e a l'ea ben sottovaluâ da-i serviççi de informaçioin de l'OKW (Oberkommando der Wehrmacht – ato comando da Wehrmacht)[21]. E riserve meccanizæ de l'Armâ Rossa fun raforçæ e modernizæ co-a constituçion de nœuve armæ coraçæ e de nomioxi corpi cari, meccanizæ e de cavalaja aotonnomi. L'artagiaja ascì, da quæ fu previsto da-o so capaçe comandante Nikolaj Voronov un impiego masciscio pe meniçâ e linnie aversaie, a fu fortemente potençiâ: l'Aministraçion Centrâ de l'Artagiaja de l'Armâ Rossa (il GAU) a se incaregò de l'aflusso di canoin (oltre 9.000 in totâ) e de ciu che 1.000 lançaforgai Katjuša ascì. O trasporto de 'na tâ quantitæ d'armamenti e de relative muniçioin e equipagiamenti o fu reizo ancon ciu difiççile da-a limitateçça de vie de comunicaçioin a dispoxiçion: solo træ linnie feroviaie prinçipæ ean disponibile pe-i trasporti, tutte træ faxenti cappo a-i gren nœui de comunicaçion de Saratov e Kamyšin; ste linnie chì, coordinæ da-o generâ P.A. Kabanov, no ean guæi eficiente e de ciu ean sottoposte a-i costanti atacchi aerrei da Luftwaffe[22].
![](http://178.128.105.246/content-http-upload.wikimedia.org/wikipedia/commons/thumb/3/3c/RIAN_archive_286_Homecoming.jpg/220px-RIAN_archive_286_Homecoming.jpg)
Nonostante queste grave dificortæ o GAU o l'ariescì a fâ afluî i armamenti e i rifornimenti necessai e in setembre e otobre oltre a-i canoin e a-i lançaforgai arivò a-i trei fronti oltre 500.000 scciœuppi, 80.000 armi aotomattiche, 17.000 mitraliatrixi e e muniçioin d'artagiaja da 76, 85 e 122 mm che reizan poscibbile a constante cresciança do coscidito boekomplektij (o quantitativo giornalê de proiettili aotorizao pi ogni canon)[23]. Contempoaniamente continoava l'arivo di reparti organnichi assegnæ de rinforço a-i trei fronti into setô de Stalingraddo: a-a fin o Fronte Sud-Ovest (ativao da-o 22 otobre) o riçevette çinque divixoin fuxilê, trei corpi cari e de cavalaja meccanizâ, una bregadda cari, trezze regimenti de artagiaja e sei regimenti de lanciaforgai; o Fronte do Don træ divixoin fuxilê; o Fronte de Stalingraddo doe divixoin e træ bregadde fuxilê, trei corpi meccanizæ, træ bregadde cari e doi regimenti d'artagiaja[24].
Molto difiççile infin resultò l'atraversamento, da parte de queste forçe mascisce, do Volga e do Don pe razonze e so poxiçioin de schiamento primma de l'atacco; insci-o Fronte de Stalingraddo do generâ Erëmenko, i geniê soviettichi organizon una serrie de "zone d'atraversamento" insci-o Volga insce di ponti de barche che permissan o passaggio di sordatti e de l'equipagiamento leggio, mentre i mezi coraçæ passon o sciumme insce de ciatte e batelli, pe-o ciu de nœutte scin a-o 15 novembre. Con questi mettodi tra-o 1° e o 20 novembre atraversò o sciumme 160.000 ommi, 10.000 cavalli, 430 cari armæ, 6.000 canoin e mortæ, 14.000 veiccoli, mentre insci-o Don l'Armâ Rossa a l'organizò vinti ponti mobbili e vintun traghetti pe trasportâ de la do sciumme inte teste de ponte ommi e mezi assegnæ de rinforço a-o Fronte Sud-Ovest e a-o Fronte do Don[25].
Infin e forçe aeree ascì fun ben rinforçæ sotta a guidda di generæ A.A. Novikov e G.A. Vorožejkin, nœuvi comandanti de l'aviaçion soviettica; a 17ª e a 2ª Armâ aerria fun assegnæ a-o generâ Vatutin, a 16ª Armâ aerea a-o generâ Rokossovskij, mentre a fu ben raforçâ l'8ª Armâ aerea ascì dipendente da-o generâ Erëmenko; equipagiæ con ciu che 1.100 aerei, tra-i quæ di nœuvi caccia e di aerrei d'atacco a-o sœu, pi-a primma votta e forçe aeree soviettiche zugon un rollo davei efficaçe inti operaçioin[26].
Eroî do Hitler e do comando todesco
[modìfica | modìfica wikitèsto]![](http://178.128.105.246/content-http-upload.wikimedia.org/wikipedia/commons/thumb/9/97/Bundesarchiv_Bild_183-B24543%2C_Hauptquartier_Heeresgruppe_S%C3%BCd%2C_Lagebesprechung.jpg/220px-Bundesarchiv_Bild_183-B24543%2C_Hauptquartier_Heeresgruppe_S%C3%BCd%2C_Lagebesprechung.jpg)
Hitler, l'OKW e anche l'OKH decidettan inte l'aotunno 1942, nonostante l'evoluçion strateggica globâ into complesso sfavoeive a-o Terço Reich, de mantegnî e poxiçioin razonte insci-o fronte orientâ e restâ areixæ tenaxemente a Stalingraddo sença predispoñe una retiadda primma de l'inverno insce de poxiçioin ciu aretræ e difendibbile. Tâ reizegoza decixon a no derivò soltanto (comme ha ripetuo pe di anni a storiografia ocidentâ fondâ insce-e reticente verscioin di generæ todeschi sconfiti) da l'ostinaçion hitleriaña, suportâ da-i so fedeliscimi (Göring, Keitel, Jodl), ligâ pe-o ciu a de instançe politiche, ma ascì da de conscideraçioin geostrateggiche, militare e de polittica da guæra condivize in parte da quæxi tutti i membri de l'Ato comando todesco[27].
In detallio, i elementi che spinsan o Comando supremo todesco a mantegnî e poxiçioin fadigozamente razonte drento e in gio a Stalingraddo durante l'inverno fun:
- o convinçimento, difuzo tra di ati ofiçiæ da Wehrmacht (i generæ Halder[28], Zeitzler, sucessô do Halder a-a testa de l'OKH, e o Paulus ascì e Weichs, comandanti rispetivamente da 6ª Armâ e do Groppo d'Armæ B) che l'Armâ Rossa, ancon temibbile in difeiza, a no foise in graddo (anche pe incapaçitæ tecnico-operativa a livello de comando e de conduta de truppe) de architetâ, organizâ e condue una controfensciva de ampieçça strateggica (conceçion aparentemente confermâ da-i ripetui falimenti soviettichi inte controfenscive invernæ e de primaveja 1941-42)[29];
- a convinçion (provegninte prinçipalmente da-i generæ von Weichs e Paulus) che e dificortæ magioî pi-a 6ª Armâ durante l'inverno saieivan stæte soviatutto de natua logistica ciutosto che operativa; fun quindi fæti noteivi sforsci de pianificaçion e organizaçion, a livello de Groppo d'armæ B e de OKH, pe redue queste carençe[30];
- a fiduccia (afermâ da-o Göring, ma ascì da 'n capaçe comandante comme o generâ Wolfram von Richthofen) da parte da Luftwaffe de poei ralentâ e fermâ con di atacchi aerrei l'organizaçion e a conduçion de 'n'ofensciva soviettica sciu grande scaa;
- o convinçimento do Hitler da necescitæ morâ e polittica de 'na rescistença vitoiosa a Stalingraddo pe di motivi de prestiggio personâ (doppo e so ripetue afermaçioin pubbriche de segua vitoia) ma pe mantegnî ascì a coexon de so aliançe (Itallia e Romania in primis) e pe controbançâ a livello internaçionâ i efetti deprimenti da controfensciva anglosassone into Nord Affrica[31];
- e ripetue e otimistiche afermaçioin do Serviççio Informaçioin de l'OKH (guidao da-o generâ Reinhard Gehlen) rigoardanti l'imposcibilitæ pe-i soviettichi de sferâ di ofenscive strateggiche (che pi atro ean previste comme prinçipalmente dirette contra-o Gruppo d'armæ Çentro e quindi o saliente de Ržev, lontan da Stalingraddo[32]).
![](http://178.128.105.246/content-http-upload.wikimedia.org/wikipedia/commons/thumb/9/9a/Map_Battle_of_Stalingrad-it.svg/220px-Map_Battle_of_Stalingrad-it.svg.png)
In efetti pe de setemañe durante i meixi de setembre e otobre i generæ Zeitzler e Gehlen mantégnan un noteive otimismo insci-a scitoaçion generâ e conscidion con scetticismo e poscibilitæ de 'na gran controfensciva soviettica; in particolâ o Gehlen o l'alertò i comandi solo insce di poscibbili atacchi de alengeimento insci-o fronte de Ržev o eventoalmente into setô do meddio Don difeizo da l'8ª Armâ italiaña. O Hitler ascì, temendo un atacco soviettico in direçion de Rostov, segondo o schema za adotao da l'Armâ Rossa into 1920 pe sconfizze o generâ de l'Armâ Gianca Denikin, e avendo scarsa fiduccia insce-e capaçitæ de rescistença de truppe italiañe, o l'aiva prestao particolâ atençion fin da agosto a questo setô ch'o fu quindi oportunamente rinforçao[13]. Fu inviao a sostegno de divixoin italiañe træ divixoin de fantaja todesche (62ª, 294ª e 298ª), inserie inte linie segondo o concetto tattico do Führer de coscidite "stecche de baleña"[33], varri reparti anticaro e sorvetutto a 22. Panzer-Division (22ª divixon coaçâ)[34].
Solo a setemaña primma do començo de l'operaçion Uran, o generâ Gehlen, davanti a-i crescenti concentramenti nemixi into setô rumen do Don, o lançò finarmente l'alarme insci-o fronte de Stalingraddo, spinzendo Hitler e o comando todesco a trasferî d'urgença derê a-o fronte da 3ª Armâ romeña una parte de forçe todesche assegnæ a l'8ª Armâ italiaña, e in particolâ a 22. Panzer-Division (a partî da-o 10 de novembre). Paradossalmente, pâ che proppio o l'Hitler o l'agge avertio magiormente a peigoxitæ da scitoaçion, comme confermao da-i so ripetui ordini diramæ a-e truppe (a partî da-a Direttiva generâ n. 1 do 14 otobre 1942) in vista de 'na dua bataggia difensciva invernâ da condue con tenaxa e discipriña insce-e poxiçioin razonte. Doppo e esperiençe de l'inverno 1941-42, o Hitler o consciderava suicidda una bataggia difensciva invernâ conduta in retiadda a-o scoverto; conscidiaçioin in parte confermæ da l'andamento di opiaçioin e da-a dezastrosa retiadda invernâ de l'ARMIR[35].
Pe de ciu o Führer scin da-o 3 novembre o l'aiva disposto o trasfeimento da 6. Panzer-Division da-a França verso o fronte orientâ, mentre gh'ea in studdio l'invio anche da 11. e da 17. Panzer-Division da-o Groppo d'armæ Centro a-o Grpppo d'armæ B. E deduçioin finæ do generâ Gehlen fun tardive, e anche e dispoxiçioin do Hitler no zonsan pe tempo: o 19 novembre solo a 22. Panzer-Division (con pochi mezi e ciutosto dizorganizâ) a l'ea insci-o posto derê a-o fronte rumen inquadrâ into XXXXVIII Panzerkorps[36] (48º corpo coraçao – formaçion inta quæ o Führer o l'aiva piña fiduccia ma in realtæ ciutosto debbole e co' in scarso nummero de cari armæ), mentre e divixoin coraçæ de riserva de quæ l'ea stæto previsto l'arivo ean ancon ben lontañe da-o fronte menaçao[37].
L'ofensciva soviettica
[modìfica | modìfica wikitèsto]
«Anche inta nostra stradda saiâ festa...» |
(Frase pronunçiâ da-o Stalin o 6 novembre 1942 in ocaxon da ricorença da Rivoluçion d'otobre[38]) |
E forçe soviettiche e a cianificaçion finâ
[modìfica | modìfica wikitèsto]In scintexi o cian de l'Ato comando soviettico o prevedeiva d'ataccâ i doî loei do saliente de Stalingraddo, determinao da-o profondo incuniâse da 6ª Armâ into fronte meridionâ soviettico, e açerciâ o ciu rapidamente poscibbile tutte e forçe de l'Asse schieræ into setô. A rescistença soviettica a Stalingraddo, a parte i aspetti propagandisteghi ligæ a-o nomme da çitæ, a l'ebbe, quindi, doe importante consegoençe. In primmo lœugo, a l'impedì a-a Wehrmacht d'atestâse sâdaménte insci-o Volga, interompindo i conligamenti soviettichi co-i campi petroliffei caocaxichi. In segondo lœugo, a dette a-o Stavka o tempo necessaio a portâ in linnia de forçe adegoæ a-a gran manœuvra programâ[39].
Pe razonze i ambiçioxi risultæ previsti o Stavka o potençiò e forçe meccanizæ destinæ a 'n rollo decixivo inte l'operaçion. I corpi cari e meccanizæ fun fæti afluî da-e riserve strateggiche inte retrovie, comme o 1º e o 26º Corpo cari (assegnæ a-o generâ Vatutin), opù fun freneticamente ricostituii doppo e catastroffiche perdie estive, comme o possente 4º Corpo mecanizao, sciorto da-a trasformaçion e ricostituçion do 28º Corpo cari destruto de luggio e assegnao a-o generâ Erëmenko[40]. Queste formaçioin mobbile fun equipaggiæ co-i moderni cari armæ T-34 e riorganizæ pe condue di avançæ veloxi in profonditæ, sença atardâse inte di scontri parçiæ e sença çercâ de caregâ a-o scoverto contro i canoin anticaro todeschi.
Segondo a nœuva importante direttiva do Stalin (apogiâ da-i ciu asperti comandanti caristi comme i generæ Jakov Fedorenko[41], Pavel Rotmistrov e Michail Katukov) insci-a conduta di opiaçioin con di mezi coaçæ (a n. 325 de l'otobre 1942), o compito di nœuvi corpi mecanizæ, organizæ comme "scagioin de sviluppo do sucesso" (ėšelon razvitija uspecha – ERU[42]), o doveiva consciste into sfrutamento in profonditæ, a-a mascima veloçitæ e a-a mascima distança, di sfondamenti otegnui co-a fantaja e l'intervento de l'artagiaja, disgregando e riserve do nemigo, semenando o pannico e a confuxon inte retrovie e inti comandi aversai.
Queste tattiche benben spericolæ avieivan provocao de forte perdie (e formaçioin doveivan operâ in profonditæ, anche izoæ, into cœu do teritoio nemigo, esposte de votte a-i micidiæ contratacchi de esperte Panzer-Division todesche) e grave dificortæ logistiche (a caoza da carença d'aotocari di soviettichi), ma into complesso rezulton efficaçe e sorpreizan insce-e primme i comandi e e truppe todesche abituæ a-e confuze e dizordinæ carreghe frontale a-o scoverto di coraçæ e de fantaje soviettiche[43].
I concentramenti prinçipæ pe-i atacchi avègnan a circa 200 km a nord-ovest de Stalingraddo e a 100 km a sud da çitæ. A nord-ovest o Fronte Sud-Ovest do generâ Nikolaj Vatutin o l'avieiva sferao a so ofensciva co-a 5ª Armâ coraçâ da Goardia e a 21ª Armâ (mentre a 1ª Armâ da Goardia a l'avieiva protetto o scianco drito contra di poscibbili interventi de l'8ª Armâ italiaña), e o Fronte do Don do generâ Konstantin Rokossovskij o l'avieiva atacao co-a 65ª, 24ª e 66ª Armâ. A sud da çitæ o coscidito Fronte de Stalingraddo (generâ Andrej Erëmenko) o l'avieiva atacao co-a 51ª, 57ª e 64ª Armâ. Segondo i progetti definitivi elaboræ da-o Stato magiô soviettico, l'ofensciva a saiæ començâ primma a nord insci-ô fronte do Don (setoî di generæ Vatutin e Rokossovskij) dovve e forçe coraçæ avieivan dovuo percorî una distança magiô (circa 120 km) e avieivan dovuo anche atraversâ o sciumme primma de razonze l'area a sud de Kalač dovve ea previsto o conzonzimento de tutte e forçe mobbile, mentre o giorno sucescivo saieiva passao a l'atacco a sud anche o fronte do generâ Erëmenko che, dovendo avançâ pe 90 km, o l'aiva bezœugno in teoria de meno tempo pe razonze l'area a sud de Kalač[44].
![](http://178.128.105.246/content-http-upload.wikimedia.org/wikipedia/commons/thumb/a/a5/RIAN_archive_1274_Tanks_going_to_the_front.jpg/220px-RIAN_archive_1274_Tanks_going_to_the_front.jpg)
Végne sottoliniao da-o Stato magiô soviettico e da-i comandanti di trei fronti a necescitæ pe-e forçe coraçæ d'avançâ a-a mascima veloçitæ e de dirizze risolutamente verso i obiettivi previsti, de moddo da concludde l'operaçion co-o conzonzimento di doi ragropamenti ofenscivi a sud de l'ansa do Don entro o terço o o quarto giorno de l'ofensciva, sença dâ tempo a-e forçe nemighe de rischierâ e riserve o de sfuzî a l'açerciamento[45].
E manœuvre de mascheramento (Maskirovka inta terminologia de l'Armâ Rossa) se rivelon eficaxe nonostante 'na serrie de interventi da Luftwaffe insce-e linnie feroviaie, insce-e colonne in avexinamento e insci ponti insci-o Don e insci-o Volga; in particolâ i spostamenti de forçe mecanizæ fun efettoæ into mascimo segretto, a l'urtimo momento, inte l'inminença de l'inandio d'Uran, potençiando a-o mascimo e mezue de segueçça e inganno. Solo pochi giorni primma de l'avio de l'ofensciva i corpi cari traverson d'arescozo o Don pe portâse insce-e poxiçioin de partença inte teste de ponte a sud do sciumme[46].
A sorpreiza a l'ebbe sucesso in parte a caoza ascí do scetticismo todesco insce l'abilitæ soviettica de portâ a terme un'operaçion mai tanto ambiçioza. I todeschi, consaceivi do poscibbile peigo insci-i scianchi, no avendo individoao in tempo a conscistença ofensciva do schieramento nemigo, no valuton corettamente l'entitæ da menaçça chi incombeva insce-e forçe todesco-rumeñe. In particolâ no fu individoao, fin a-i urtimi giorni, a prezença inte l'arria de Serafimovič da 5ª Armâ coraçâ da Goardia do generâ Pavel Romanenko, dotâ de 500 cari armæ – 1º e 26º Corpo cari – e pronta a sbocâ da-a testa de ponte, ni fu ipotizao, fin a-o giorno primma de l'atacco, una poscibbile doggia manœuvra d'açerciamento nemiga[47].
Into complesso avieivan pigiao parte a l'operaçion ciu che 'n mion de sordatti soviettichi, circa 1.500 cari armæ (quattro corpi cari – 1º, 26º, 4º, 16º – trei corpi mecanizæ – 1º da Goardia, 13º e 4º – e doi corpi de cavalaja – 8º e 3º da Goardia), 13.000 canoin e 1.100 aerrei[48]
E difeize todesco-rumeñe
[modìfica | modìfica wikitèsto]I punti d'atacco prinçipæ çernui da l'Ato comando soviettico ofrivan e magioî probabilitæ d'ótegnî di rizultæ poxitivi: i tratti de fronte atacæ, poxiçionæ a-i doi lati do ragropamento todesco impegnao inte l'arria de Stalingraddo (6ª Armâ e parte da 4ª Armâ coraça) ean difeixi da-o meize d'otobre da-e doe armæ rumeñe impiegæ insci-o fronte orientâ. A nord (inscia linnia do Don) a 3ª Armâ rumeña, con a-a so scinistra l'ARMIR italian, a saiæ stæta ataccâ da-e forçe do Fronte Sud-Ovest do generâ Vatutin e da parte do Fronte do Don do generâ Rokossovskij; a sud da çitæ insci-o Volga, inta region di laghi sæ Caca e Barmancak, l'ancon ciu debbole 4ª Armâ romeña a l'avieiva subio l'atacco di armæ do Fronte de Stalingraddo do generâ Erëmenko. Ciu difiççile saieiva risultao invece o compito de forçe prinçipæ do Fronte do Don che doveivan passâ a l'ofensciva into setô do sciumme insci-a drita di romen difeizo da-o ben ciu robusto XI Corpo d'armâ todesco (generâ Karl Strecker) e into coscidito "istmo", l'area compreiza tra-o corso paralello verso sud do Don e do Volga, difeizo da-e doe divixoin de fantaja de l'VIII Corpo d'armâ todesco (generâ Walter Heitz), formaçioin apartegninti a l'aa scinistra da 6ª Armâ[49].
![](http://178.128.105.246/content-http-upload.wikimedia.org/wikipedia/commons/thumb/3/39/Bundesarchiv_Bild_101I-218-0501-27%2C_Russland-S%C3%BCd%2C_rum%C3%A4nische_Soldaten.jpg/220px-Bundesarchiv_Bild_101I-218-0501-27%2C_Russland-S%C3%BCd%2C_rum%C3%A4nische_Soldaten.jpg)
A 3ª Armâ romeña, a-o comando do generâ Dumitrescu, a difendeva, doppo avei in parte sostituio i reparti italien stramuæ ciu a nord, o peigoozo setô do Don co-e teste de ponte soviettiche de Serafimovič e Kletskaja con œutto divixoin d'infantaja e 'na divixon de cavalaja divize inte quattro corpi d'armâ (1º, 2º, 4º e 5º). L'armâ a l'ea schierâ longo 'na linnia de fortificaçioin campale con scarse riserve tattiche e con de limitæ difeize anticaro; ean disponibbili solo 60 canoin anticaro da 75 mm potençialmente efficaçi contro i cari armæ mezen e pezanti soviettichi[50]. O generâ Dumitrescu o l'aiva avertio fin da-a fin de setembre o comando do Gruppo d'armæ B da precaia poxiçion da so armâ davanti a-e teste de ponte soviettiche e o l'aiva proposto de respinze o nemigo de la do Don con l'impiego de forçe rumeñe potençiæ da di reparti todeschi, ma o so cian o l'ea stæto subbito respinto da-o comando todesco, a curto de riserve e a-e preize co-i combattimenti sempre ciu dui a Stalingraddo[51]. Into complesso i 100.000 e passa sordatti inquadræ inta 3ª Armâ romeña gódîvan de bon morâ e combativitæ, aveivan riçevuo rinciaççi (sciben ch' a 13ª e 14ª Divixon de fantaja foisan ancon seriamente debilitae) e ean stæti riequipagiæ e riorganizæ; tuttavia i ommi a dispoxiçion non ean assæ pe crovî adeguatamente a linnia do fronte (circa 20 km pi ogni divixon, o doggio da longheçça racomandâ), miñe e fî spinao ean insuficienti, mentre e scorte de proiettili d'artagiaja ean boñe soo che pe çerti callibri[52].
![](http://178.128.105.246/content-http-upload.wikimedia.org/wikipedia/commons/thumb/b/b4/Bundesarchiv_Bild_101I-218-0518-12%2C_Russland-S%C3%BCd%2C_Generalmajor_mit_Ritterkreuz.jpg/170px-Bundesarchiv_Bild_101I-218-0518-12%2C_Russland-S%C3%BCd%2C_Generalmajor_mit_Ritterkreuz.jpg)
Pezo a l'ea invece a scitoaçion inta quæ versava a 4ª Armâ romeña do generâ Constantinescu, apeña costituia in previxon de inseila, doppo a conquista de Stalingraddo, into nœuvo "Groppo d'armæ todesco-rumen do Don" a-o comando nominâ do dittatô rumen generâ Ion Antonescu de quæ l'ea in corso l'organizzaçion. Questa formaçion a disponeiva into setô di laghi sæ de circa 75.000 sordatti demoralizæ ripartii inte çinque divixoin de fantaja e doe divixoin de cavalaja non ancon potençiæ comme i unitæ da 3ª Armâ e tutte con meno do 50% di efetivi (tranne a 5ª e 8ª Divixon de cavalaja circa a-o 60%; a 18ª Divixon de fantaja a-o 78% e a 1ª Divixon de fantaja a-o 25%[53]) a so votta divize inte doi corpi d'armâ (6º e 7º); o setô afiao a ogni divixon o l'ea ecescivamente ampio e ean disponibbili solo trentaquattro canoin anticaro da 75 mm. A 4ª Armâ romeña a l'ea anche imperfettamente inquadrâ: o passaggio do controllo de relative divixoin da parte da 4ª Armâ coraçâ todesca o l'ea previsto pe-o giorno 21, e o fu antiçipao de sprescia a-o 20 a caoza de l'atacco soviettico[54]. I raporti de questi contingenti "satelliti" co-i reparti todeschi teoricamente in "fratelança d'arme" no ean goæi sollidi[55].
Inte l'atacco soviettico ghe fu mescciao ascì e træ divixoin de fantaja de l'XI Corpo d'armâ todesco (44ª, 376ª e 384ª Divixon fantaja) che difendevan o corso do Don a est de Kletskaja, e e doe divixoin (76ª e 113ª Divixon fanteria) de l'VIII Corpo d'armâ todesco che sbaravan, insce l'aa scinistra da 6ª Armâ, o teren compreizo tra-o Volga e o Don, che fun atacæ da-i armæ do Fronte do Don do generâ Rokossovskij. A-a scinistra da 3ª Armâ romeña gh'ea schierao e forçe do XVII Corpo d'armâ todesco (generâ Karl Hollidt), dipendente da l'8ª Armâ italiaña, co-e divixoin "Pasubio" e "Sforçesca" e a 62ª Divixon de fantaja todesca.
Infin, e riserve mobbile todesche, costituie de sprescia inta segonda setemaña de novembre davanti a-a montante menaçça nemiga into setô reciamando di reparti da Stalingraddo (elementi mecanizæ da 14. Panzer-Division) e transfeindo d'urgença e formaçioin coraçæ stançiæ derê a-o fronte de l'8ª Armâ italiaña (22. Panzer-Division), ean assolutamente insuficiente[56]. Se tratava do XXXXVIII Panzerkorps do generâ Ferdinand Heim con circa 200 cari armæ todeschi e rumen (14. e 22. Panzer-Division – 74 panzer in totâ – e 1ª Divixon coraçâ rumeña – 108 o 105[57] cari armæ de origgine prevalentemente ceca) e de 'na serrie de reparti improvizæ anticaro e Panzerjäger (semoventi cacciacari) ragropæ into Kampfgruppe Simons. Inte retrovie do fronte rumen e fin a-a region de l'ansa do Don ean prezente numioze formaçioin logistiche e aministrative todesche che poeivan a l'ocorença organizâ di reparti difenscivi de blocco. A ciu gran parte di cari da 6ª Armâ (il XIV Panzerkorps do generâ Hans Hube con 84 cari armæ e a 24. Panzer-Division con 58 mezi coraçæ[58]) ean arestæ a est do Don impegnæ direttamente a Stalingraddo, e anche o trasferimento insci-o Don da ben equipagiâ 29ª Divixon motorizzaa, dotâ de 52 cari armæ moderni e schierâ inte retrovie da 4ª Panzeramee comme riserva, o no fu aotorizao da l'ato comando todesco ch'o no l'ea ancon do tutto coscente da menaçça nemiga[59].
Orde de bataggia
[modìfica | modìfica wikitèsto]L'ofensciva insci-o fronte do Don
[modìfica | modìfica wikitèsto]Doppo un nœuvo rinvio o 9 de novembre, se tégne o 13 novembre un'urtima reunion a-a prezença do Stalin inta quæ fu asccejo i urtimi detaggi; Žukov e Vasilevskij prezenton un raporto definitivo evidençiando i noteivi risultæ razonti inte l'organizaçion e into schiamento de forçe, e manifeston ottimismo insci-a riuscia de l'operaçion. O Stalin, pu iritao da-i rinvii de l'atacco e procupao pi-a scituaçion a Stalingraddo, dovve a 62ª Armâ do generâ Čujkov a l'ea sottoposta a di nœuvi, violenti atacchi e a paiva insci-o ponto de crolâ[60], o finì pi aprovâ e proposte di doi generæ e a conferença a se concruze poxitivamente[61]. O Stalin quindi, doppo in'urtima controverscia o 17 novembre aprœuv'a-o pescimismo manifestao inte 'n primmo momento da-o generâ V.T. Volskij (comandante do 4º Corpo mecanizao), o dette via libbera a-i cen do Stato magiô generâ: fu deciso o 19 novembre comme giorno do començo de l'operaçion Uran e o generâ Vasilevskij, ch'o l'aiva dæto prœuva de carma, preparaçion e eficença, o vègne incaregao da-o dittatô de coordinâ insci-o posto i trei fronti di generæ Vatutin, Erëmenko e Rokossovskij[62]. Inti giorni sucescivi quindi o Vasilevskij o se spostò ripetuamente inti varri comandi avançæ insci-o fronte pe soleçitâ a mascima veloçitæ e eficença di operaçioin, mentre, contraiamente a 'na tradiçion stoiografica, inta faze operativa o rollo do Žukov, importantiscimo riguardo a-a parte ideativa e organizativa de l'opiaçion Uran, o fu minnimo, dæto che-o generâ o fu dirotao da-o Stalin insci-o fronte de Ržev pi organizâ e condue l'operaçion Marte ch'a saiæ començâ o 25 novembre e a saieiva terminâ a-i primmi de dexembre co' un costozo falimento[63].
![](http://178.128.105.246/content-http-upload.wikimedia.org/wikipedia/commons/thumb/c/c9/BM_13_and_BM_21_TBiU_7.jpg/220px-BM_13_and_BM_21_TBiU_7.jpg)
L'atacco, confermao definitivamente da l'Ato comando soviettico co-a comunicaçion da paola in codiçe "sireña", o scatò a-e 07:20 do 19 novembre 1942 insci-o fronte do Don, dovve i soviettichi disponeivan de grosse teste de ponte de Serafimovič e Kletskaja, co' ina preparaçion d'artagiaja de 3.500 peççi che però, a caoza da scarsa vixibilitæ provocâ da-a fita neggia, a no l'otégne tutti i rizultæ previsti, mentre 'aviaçion soviettica ascì a dovette rinviâ i so interventi a-a tarda matinâ. Doppo circa 80 menuti de fœugo i fantaje soviettiche da 5ª Armâ coraçâ do generâ Romanenko e da 21ª Armâ do generâ Čistjakov (apartegninti a-o Fronte Sud-Ovest), co-o morale ben ato, sferon l'atacco con grande energia e co-o sostegno di cari armæ, sciben che i rumen, pu scosci da l'imprevista violença de l'ofensciva, daprinçippio se baten ben[64]. Dopo avei superao façilmente a primma linnia difensciva, i sordatti soviettichi subin de forte perdie insci-a poxiçion de rescistença prinçipâ nemiga, mentre anche e postaçioin de l'artagiaja todesco-rumeña, solo in parte neutralizæ da-o fœugo di canoin soviettichi, intervègnan con efficaxa[65].
Inte primme oe, quindi, e divixoin de fuxilê soviettiche do Fronte Sud-Ovest do generâ Vatutin ebban de noteive dificortæ, e solo a 47ª Divixon fuxilê da Goardia into setô de Serafimovič e a 293ª Divixon fuxilê in quello de Kletskaja riescin a avançâ de 2-3 km, mentre i atre divixoin d'assato da 5ª Armâ coraçâ (119ª e 124ª Divixon fuxilê) e da 21ª Armâ (63ª, 65ª e 96ª Divixon fuxilê) feççan pochi progresci. Into setô da 65ª Armâ do generâ Batov, apartegninte a-o Fronte do Don do generâ Rokossovskij, atacon a 304ª e a 76ª Divixon fuxilê e otégnan quarche sucesso avançando inta seiaña de 3-5 km a caoza de l'aspia rescistença da 1ª Divixon de cavalaja romeña e do teren iregolâ. Davanti a-e dificortæ superioî a-o previsto pe sfondâ in profonditæ e linnie rumeñe, o generâ Vatutin o decize, pi aspresciâ i tempi e risolve in moddo definitivo a scitoaçion, d'antiçipâ a mezogiorno l'intervento in massa de so riserve coraçæ, destinæ originaiamente a intrâ in campo solo doppo o completo superamento de difeize nemighe[66].
![](http://178.128.105.246/content-http-upload.wikimedia.org/wikipedia/commons/thumb/9/9c/Uranus42.jpg/220px-Uranus42.jpg)
L'intervento in massa di corpi cari, a partî da-e ôe 12:00, o l'ebbe un efetto decixivo: da-a testa de ponte de Serafimovič avançò in colonne compatte i cari armæ da 5ª Armâ coraçâ do generâ Romanenko (circa 500 mezzi coraçæ in totâ[67]). O 1º Corpo cari do generâ Vasilij V. Butkov, impegnao into setô da 47ª Divixon fuxilê da Goardia, o l'ebbe quarche dificortæ into setô de Blinovskij e solo a 14:00 oe o razonse e linnie nemighe superando quindi a rescistença da 14ª Divixon fantaja romeña avançando, doppo un contratacco da 7ª Divixon cavalaja romeña costreita a retiâse con grave perdie a Pronin, de 4-5 km entro a seiaña, subbito seguio da l'8º Corpo de cavalaja do generâ Borisov ch'o croviva o scianco drito e da-o 26º Corpo cari do generâ Aleksej G. Rodin, sempre apartegninte a-a 5ª Armâ coraçâ, ch'o l'atacò into setô da 119ª e 124ª Divixon fantaja e, divizo inte quattro colonne, o proseguì in avanti pe ciu che 25 km razonzendo o teren libbero a-e spalle de linnie difenscive nemighe ormai destrute[68].
Inta testa de ponte de Kletskaja a 21ª Armâ do generâ Čistjakov a 12:00 oe o portò avanti, into setô da 76ª e 293ª Divixon fuxilê, e so forçe mobbile provocando, doppo quella avegnua into setô da 14ª Divixon rumeña, a segonda breccia do fronte de l'Asse: o 4º Corpo cari do generâ Andrej G. Kravčenko o l'avançò inte doe colonne che sbaragion rapidamente, non sença perdie, a debbole 13ª Divixon de fantaja romeña marciando subbito in profonditæ nonostante o contratacco portao avanti da-a 15ª Divixon fantaja rumena[69]. A colonna de scinistra a l'avançò de ciu che 30 km e quella de drita de 10 km, subbito seguia da-i reparti mobbili do 3º Corpo de cavalaja da Goardia do generâ Pliev[70]. A-a fin do 19 de novembre quindi i corpi cari soviettichi do generâ Vatutin aveivan superao e difeize rumeñe segge a Serafimovič che a Kletskaja e aveivan aperto ampie brecce doppo avei quæxi destruto træ divixoin rumeñe (13ª, 14ª e o scianco drito da 9ª). Da di atre parte l'avançâ de l'Armâ Rossa a l'ea stæta invece contegnua da l'efficaçe rescistença de formaçioin da 3ª Armâ rumeña[71]. Durante a nœutte e formaçioin coraçæ soviettiche, solecitæ da-i so comandanti a no fermâse e a proseguî, continoòn a avançâ a fari açeixi in profonditæ, sença cuâse da scarsa vixibilitæ, do climma e de pericoloze insciddie do teren sorcao da-e profonde e invixibbile balkas[72]. Nonostante di incidenti e un duo contratacco portao avanti inta nœutte da-a 1ª Divixon coraçâ rumeña, i caristi soviettichi mostron grande asbrio e inta matinâ do 20 novembre segge e unitæ meccanizæ da 5ª Armâ coraçâ (1º e 26º Corpo cari e 8º Corpo de cavalaja) che quelle da 21ª Armâ (4º Corpo cari e 3º Corpo de cavalaja da Goardia) dilagavan ormai compatte, soverciando e retrovie todesco-romeñe e semenando o panico inti comandi e inti reparti improvizæ de blocco costituii in coint'e sprescia da-i todeschi[73].
Fallimento di contratacchi todeschi e crollo di rumen
[modìfica | modìfica wikitèsto]E primme notiçie de l'avio de l'ofensciva soviettica insci-o Don fun insce-e primme sottovalutæ da-o comando da 6ª Armâ che defæti o no l'interuppe i so costoxi atacchi inte roiñe de Stalingraddo, mentre alarmon subbito, anche pe-i informaçioin confuze che provegnivan da-o comando rumen, o Groppo d'armæ B che, a 9:30, o l'attivò e riserve coraçæ ordinando a-o generâ Heim de dirizze co-o sœu XXXXVIII Panzerkorps (za in stato d'alarme da l'arba) verso a testa de ponte de Kletskaja dovve paiva avei individoao o centro de gravitæ de l'atacco nemigo. Scarsamente sostegnue da-a Luftwaffe ch'a no poette intervegnî in forçe a caoza do tempo grammo, e riserve mobbile todesco-romeñe (redute a-a 22. Panzer-Division do generâ Eberhard Rodt e a-a 1ª Divixon coraçâ rumeña, dæto che a 14. Panzer-Division do generâ Johannes Baessler a fu subbito levâ a-o generâ Heim e assegnâ a l'XI Corpo d'armâ do generâ Strecker) poco doppo 11 oe riçevettan di nœuvi ordini, provegninti direttamente da l'OKH e da-o Hitler che ordinavan de cangiâ direçion e avançâ verso nord-ovest pe contratacâ e forçe nemighe che paivan progredî pericolosamente da-a testa de ponte de Serafimovič[74].
![](http://178.128.105.246/content-http-upload.wikimedia.org/wikipedia/commons/thumb/f/f9/Bundesarchiv_Bild_101III-Bueschel-090-39%2C_Russland%2C_Grenadiere_der_Waffen-SS_beim_Vorgehen.jpg/220px-Bundesarchiv_Bild_101III-Bueschel-090-39%2C_Russland%2C_Grenadiere_der_Waffen-SS_beim_Vorgehen.jpg)
Tuttavia o XXXXVIII Panzerkorps do generâ Heim, insci-o quæ Hitler o l'aiva pontao tutte e so sperançe d'arestâ l'ofensciva soviettica, efetoando questo cangio de direçion o se desfè durante a nœutte do 19 novembre inte l'oscuritæ pe carença de conligamenti e comunicaçioin. O so elemento coraçao de ponta (o Kampfgruppe Oppeln, costituio da-o Panzer-Regiment 204 da 22. Panzer-Division e goidao da-o capaçe colonnello Oppeln-Bronikowski[75]) o l'incociò a l'orba, inte vexinançe de Pesčanyj e Ust'-Medvedickij, inti reparti coraçæ soviettichi do 1º Corpo cari do generâ Butkov in rappida progrescion, finindo, nonostante a coragioza rescistença e e perdie inflite a-i cari armæ nemixi[76], pe ripiegâ o 20 novembre verso sud doppo avei areizegao de ese circondao da-e numioze colonne coraçæ nemighe che avançavan a-e so spalle[77]. Ancon pezo fu o destin da 1ª Divixon coraçâ rumeña do generâ Gherghe che, priva de conligamenti co-a 22. Panzer-Division, a l'avançò izoâ verso nord in mezo a-e colonne meccanizæ soviettiche e durante a nœutte a fu individoâ e atacâ da-e unitæ do 26º Corpo cari do generâ Rodin che progredivan veloçemente verso sud[75]; l'unitæ romeña a se scontrò o giorno doppo co-i reparti soviettichi atorno Srednecaricynskij e Žirkovskij no riuscindo a incontrâse a est de Blinovskij, comme prestabilio, co-a 22. Panzer-Division, a so votta bloccâ a Pesčanyj, e a 7ª Divixon cavalaja romeña partia da Pronin, costreita però a retiâse de la do Čir o 21 novembre[78].
I reparti coraçæ soviettichi, sença lasciâse inganciâ e arestâ da-i pochi cari armæ todeschi o rumen disponibbili (a 14. Panzer-Division a l'intrò in combatimento a Verchnjaja Buzinovka con 36 cari, a 22. Panzer-Division a l'impegnò a Pesčanyj 38 cari armæ[79]), afronton con solo che 'na parte de so forçe e riserve nemighe, mentre di atre colonne e superon e e agion, menaçando e so comunicaçioin[80]. A caratteristega fondamentâ de l'atacco a fu a gran veloçitæ e potença da progrescion de colonne coraçæ soviettiche insci-o fronte do generâ Vatutin che a-a matin do 20 novembre ean za inte vexinançe do sciumme Kurtlak a Perelazovskij (26º Corpo cari), e do sciumme Krepkaja a Manojlin (4º Corpo cari)[81], doppo avei superao a rescistença de riserve mobbile todesche e romeñe do XXXXVIII Panzerkorps ch'ean aprœuvo a ripiegâ con grave perdie verso o Čir.
Inta a giornâ do 20 novembre crolò definitivamente e difeize todesco-romeñe insci-o Don: e forçe da 1ª Armâ da Goardia do generâ Dmitrij Leljušenko intron in açion, crovindo efficaçemente o scianco drito de forçe mobbile da 5ª Armâ coraçâ che into corso da giornâ proseguin con pin sucesso a so marcia in profonditæ. O 26º Corpo cari do generâ Rodin o sâtò fœua a l'improvista a Kalmykovskij e Perelazovskij, o soverciò completamente o quartê generâ do 4º e do 5º Corpo d'armâ rumen e quindi o l'avançò ancon verso Ostrov, a pochi chilommetri da-o Don, mentre o 4º Corpo cari do generâ Kravčenko, doppo avei conquistao Manojlin, o l'ebbe di grosci scontri contro e riserve todesche, ma o l'ariêscì pægio a ócupâ, in cooperaçion con o 3º Corpo de cavalaja da Goardia do generâ Pliev, Verchnjaja Buzinovka[82]. Do tutto izoæ e sença comunicaçioin co-i quartê generæ di rispetivi corpi d'armâ dispersci da l'atacco soviettico a Perelazovskij, træ divixoin romeñe (5ª, 6ª e 15ª Divixon fanteria) e i resti d'atre doe (13ª e 14ª Divixon fanteria) fun açerciæ inta sacca de Raspopinskaja da-a manœuvra a tenaggia completâ da-e 119ª e 124ª Divixon fuxilê da 5ª Armâ coraçâ e da-a 293ª e 76ª Divixon fuxilê da 21ª Armâ[83]. E forçe romeñe açerciæ, a-o comando de l'energico generâ Michail Ascăr, organizon a rescistença e se batten con ostinaçion respinzendo i primmi atacchi nemixi, ma a so scitoaçion a l'ea despiâ in mancança d'agiutti da l'esterno[84].
Mentre o comando todesco o çercava d'organizâ un nœuvo schieramento difenscivo insci-o Čir co-i resti de arcuñe divixoin romeñe e con l'aflusso de doe divixoin todesche do XVII Corpo d'armâ do generâ Hollidt (62ª e 294ª Divixon fantaja), sotræte precipitozamente a l'8ª Armâ italiaña, Hitler in persoña a seja do 20 novembre o dette a-o generâ Heim, ch'o l'aiva apeña ripiegao co-i resti do sœu XXXXVIII Panzerkorps, o difiççile incarrego de ripartî a-o contratacco e sblocâ e truppe romeñe do generâ Ascăr açerciæ inta sacca de Raspopinskaja[85].
O 21 novembre quindi a 22. Panzer-Division a çercò de avançâ, completamente izoâ, verso nord-est, ma a fu rapidamente bloccâ e açerciâ a ovest de Perelazovskij da-i cari armæ da 5ª Armâ coraçâ[86] mentre o tentativo da 1ª Divixon coraçâ romeña de stabilî un contatto co-a divixon coraçâ todesca o fu vanificao a sud-ovest de Žirkovskij da l'8º Corpo de cavalaja soviettico[87]. Questo falimento o marcò o destin do "groppo Ascăr" inta sacca de Raspopinskaja: doppo un vivaxe contrasto d'opinioin tra-i comandi todesco e rumen e tra o l'Hitler e l'Antonescu ascì, insce-e responsabilitæ da desfæta e insce-e scelte operative, fu finalmente aotorizao 'na sciortia a nœutte do 22 novembre da-o Führer, ma i generæ Ascăr e Sion (comandante da 15ª Divixon rumeña) aivan za decizo aotonomamente o depoîdisnâ do 22[88]. A manœuvra de ripiegamento de truppe açerciæ a se resciorse in dezastro[89]: circa 30.000 rumen cazzén prexonê, tra-i quæ o generâ Ascăr mæximo, gran parte de divixoin fun destrute, e solo 7.700 sordatti ariescin a sfuzî a-a cattua. 3.700 de questi ean da 15ª Divixon romeña e se riconzonsan co-i resti da 22. Panzer-Division che-o generâ Heim o l'ariescì o 24 novembre a recondue derê a-o Čir, doppo avei perso ciu chi-a meitæ di so cari armæ, assemme a l'ormai anientâ 1ª Divixon coraçâ romeña ch'a l'aiva contegnuo l'8º Corpo de cavalaja soviettico inti operaçioin de traversamento do sciumme e a-i urtimi 800 sordatti da 15ª Divixon rumeña[90].
Ritegnuo o responsabbile da disfæta a caoza do falimento di so contratacchi, o generâ Heim o fu subbito destituio da-o comando do XXXXVIII Panzerkorps, degradao e serao inta prexon de Moabit a Berlin pe ordine do Hitler, vegnindo o becco espiatoio do crollo do fronte do Don[91].
L'açerciamento
[modìfica | modìfica wikitèsto]Avançâ soviettica verso Kalač
[modìfica | modìfica wikitèsto]![](http://178.128.105.246/content-http-upload.wikimedia.org/wikipedia/commons/thumb/1/1c/Carristi_sovietici.jpg/170px-Carristi_sovietici.jpg)
Mentre e forçe mobbile do Fronte Sud-Ovest do generâ Vatutin sbaragiavan e divixoin romeñe e avançavan in profonditæ fin da-o primmo giorno, ben ciu difiççile s'aprezentava a scitoaçion pe-i soviettichi into setô do Fronte do Don do generâ Rokossovskij: davanti a-e robuste difeize de divixoin todesche de l'XI e de l'VIII Corpo d'armâ, i progresci fun limitæ e e perdie pezante. A 65ª Armâ do generâ Batov a l'avançò pe quarche chilommetro into setô difeizo da-a 1ª Divixon cavalaja rumeña, ma a no riuscì, a caoza de l'aspia rescistença de l'XI Corpo d'armâ do generâ Strecker (sostegnuo ascì da di reparti meccanizæ da 14. Panzer-Division), a progredî verso a çittadiña de Vertjačij dovve i todeschi aivan construio un importante ponte insci-o Don, mentre a 24ª Armâ do generâ Galanin, ch'a doveiva atacâ longo a riva scinistra do sciumme pe çercâ de tagiâ fœua a ovest do Don e truppe do generâ Strecker, nonostante l'intervento do 16º Corpo cari a fu subbito blocâ. Inoltre anche a 66ª Armâ do generâ Žadov, ch'a doveiva sferâ un atacco diverscivo inte l'istmo Don-Volga, a no feççe arcun progresso contra-e doe divixoin de l'VIII Corpo d'armâ todesco do generâ Heitz[92].
Pi atro o 20 e o 21 novembre a scitoaçion de l'XI Corpo d'armâ todesco a s'agravò conscidieivemente; e truppe do generâ Strecker difendettan con ostinaçion e so poxiçioin, ma fun menaçæ insci-o so scianco scinistro da l'avançâ de colonne coraçæ soviettiche do generâ Vatutin (3º Corpo de cavalaja da Goardia e 4º Corpo cari) ch'aivan respinto doppo di dui scontri i pochi panzer da 14. Panzer-Division a-o comando do magiô Angkeit, e quindi dovettan començâ a recegâ con dificortæ verso sud-est in direçion do ponte de Vertjačij pe mantegnî a coexon e no perde o contatto co-o grosso da 6ª Armâ schierao a est do Don[93].
Inta tarda seiaña do 19 novembre o generâ von Weichs, comandante do Gruppo d'armæ B, o l'aiva avertio finarmente o generâ Paulus da difiççile scitoaçion insci-o Don e do crollo di rumen; a caoza de questi inateixi sviluppi, quindi, a 6ª Armâ a doveiva sospende subbito ogni atacco a Stalingraddo e deximpegnâ de forçe mobbile da inviâ a ovest do sciumme pe crovîse e spalle e frenâ a marcia do nemigo ch'o menaçava e retrovie e e comunicaçioin de l'armâ[94]. O XIV Panzerkorps do generâ Hans Hube o ragropò quindi a 16. Panzer-Division e a 24. Panzer-Division (equipagiæ in doe con soli 86 Panzer[95]) e o se diresse verso o ponte de Vertjačij pe traversâ o sciumme e intervegnî a sostegno de l'XI Corpo d'armâ. Ralentæ da-e dificortæ logistiche e da-e carençe de carburante, e divixoin do generâ Hube intron in açion con grave ritardo e inti giorni seguenti descipon e so debbole forçe inte 'n setô segondaio, senç'ariêscî a ótegnî arcun risultao de relevo e sença poei intervegnî contro a ben ciu peigooza avançâ di cari armæ soviettichi di generæ Rodin e Kravčenko in direçion de Kalač[96].
![](http://178.128.105.246/content-http-upload.wikimedia.org/wikipedia/commons/thumb/1/11/Kalac_Novembre_1942.jpg/220px-Kalac_Novembre_1942.jpg)
O 21 novembre, mentre o 1º Corpo cari e l'8º Corpo de cavalaja scorivan i resti da 22. Panzer-Division verso o sciumme Čir, i atri doi corpi cari soviettichi do Fronte Sud-Ovest, o 4º e o 26º, doppo avei conquistao Perelazovskij e Verchnjaja Buzinovka, avei stravotto a 1ª Divixon coraçâ romeña e respinto verso est a 14. Panzer-Division, ean za pericolosamente vexin a-i ponti insci-o Don. Queste formaçioin, coverte a-o scianco scinistro da-o 3º Corpo cavalaja da Goardia, âdreitûa menaçavan, doppo una rappida avançâ verso sud-est, o Posto comando tattico da 6ª Armâ do generâ Paulus a Golubinskij.
O generâ e o so Quartê generâ, pigiæ de sorpreiza da-a comparsa do 4º Corpo cari do generâ Kravčenko, s'asprescion a transfeise a Gumrak, a est do Don.[82][97]. Inta nœutte, doppo avei avuo notiççia di sucesci do Fronte Sud-Ovest, o generâ Vasilevskij o poè inviâ a Stalin un raporto ottimistego insci-i favoeivi sviluppi da scitoaçion[82].
O 22 novembre, in circostançe particolarmente confuze, e truppe coraçæ soviettiche do 26º Còrpo cari conquiston co' in córpo de man o fondamentâ ponte de Berezovskij, inti presci de Kalač, e traverson o Don. O generâ Rodin, comandante do 26º Corpo, o l'organizò un destacamento avançao con di elementi da 14ª bregadda motorizâ da colonello Filippov e da 19ª bregadda cari do tenente colonello Filippenko ch'a 6:15 da matin o mosse aodaçiozamente inte l'oscuritæ a fari açeixi verso o ponte, pigiando a-a cheita o posto de guardia ch'o scangiò i mezi soviettichi pe de colonne meccanizæ todesche in adestramento. E difeize todesche fun superæ, o destacamento mobbile soviettico o l'ócupò o ponte intatto e o traversò o sciumme constituindo una primma testa de ponte.
Inta giornâ, nonostante di tentativi todeschi de contratacâ, a preçiosa poxiçion a fu consolidâ con l'arivo di atre formaçioin do 26º Corpo cari e de bregadde do 4º Corpo cari do generâ Kravčenko, che da Golubinskij aivan deviao verso Kalač pe traversâ a so votta o Don. Into depoidisnâ do 22 novembre anche a çittadiña de Kalač, a sud do sciumme, a cazè in man soviettica doppo di dui scontri contra-e debbole forçe todesco-romeñe prezente insci-o posto[98]. E forçe coraçæ soviettiche poettan quindi, a-a matin do 23 novembre, avançâ verso sud pe reconzonxise co-e colonne mobbile do Fronte de Stalingraddo do generâ Erëmenko e completâ a gran manœuvra d'açerciamento[99].
L'atacco a sud de Stalingraddo
[modìfica | modìfica wikitèsto]Mentre o generâ Vatutin o proseguiva a so inarestabbile avançâ verso sud, a partî da-o 20 novembre o fronte do generâ Erëmenko ascì o l'aiva sferao a so ofensciva into setô di laghi sæ a sud de Stalingraddo, difeizo da-e debbole forçe da 4ª Armâ rumeña. Doppo ina serrie de rinvii dovui a-a scarsa vixibilitæ caozâ da-a neggia e doppo di aspi contrasti tra l'impaçiente Ato comando soviettico a Mosca e o generâ Erëmenko, o sbaramento d'artagiaja o çomençò a 9:30 (con doe ôe de ritardo insci-i cen) e o l'ótègne di noteivi efetti destrutivi insce-e difeize nemighe; doppo 45 minuti passò quindi a l'atacco e fantaje da 57ª Armâ do generâ Tolbuchin e da 51ª Armâ do generâ Trufanov[100].
In questo setô a rescistença romeña a fu ancon ciu debbole e o fronte o fu rapidamente soverciao into setô tra-a 20ª e a 2ª Divixon de fantaja romeña apartegninte a-o VI corpo d'armâ[101]: tra i laghi Sarpa e Caca avançò a 422ª Divixon fuxilê e a 15ª Divixon fuxilê da Goardia da 57ª Armâ, sostegnue da-i cari do 13º Corpo meccanizao, mentre tra i laghi Caca e Barmancak passò a l'atacco a 126ª e 302ª Divixon fuxilê, apogiæ da doi regimenti cari. A 12:00 e linnie nemighe ean ormai crolæ, i sordatti rumen recegavan into pannico e inta confuxon, e o generâ Erëmenko o poè impegnâ subbito i so corpi meccanizæ pe sfrûtâ o sfondamento e avançâ in profonditæ in direçion de doe importantiscime linnie feroviaie che rifornivan a 6ª Armâ todesca a Stalingraddo[102]. Nonostante a scitoaçion favoeive, l'avançâ de forçe coraçæ assegnæ a-o Fronte de Stalingraddo a fu dificortoza: o 13º Corpo mecanizao do generâ Trofim I. Tanaščšin, impegnao into setô da 57ª Armâ e diretto verso Nariman, o fu ralentao da-e carençe logistiche e da-a mancança d'aotocari. Inoltre o fu contratacao de moddo inaspetao da l'asperta 29ª Divixon motorizzâ todesca do generâ Leyser (dotâ de 'na çinquanteña de cari armæ moderni) che, fæta intervegnî da-o generâ Hoth (comandante da 4ª Armâ coraçâ) a 10:30, a-o corpì a-a cheita inta neggia e insce-e primme a misse in dificortæ o corpo soviettico sarvando momentaniamente o scianco drito da 20ª Divixon de fantaja rumeña[103].
O 4º Corpo meccanizao do generâ Vasilij T. Volskij (ponta de diamante da força de sfondamento mobbile do generâ Erëmenko e reparto coraçao ciu possente de l'intrego schieramento soviettico, equipagiao con ciu che 220 cari[104]) invece o l'intrò in açion, insemme a-o 4º Corpo de cavalaja do generâ Šapkin, into setô da 51ª Armâ stocando a linnia difeiza da-a 18ª e 1ª Divixon fantaja rumeña[105], ma inte 'n primmo momento, trategnuo da-o prudente Volskij, o de' de nazo intœu 'n di pochi campi minæ rumen[105] e o l'avançò in ritardo, lentamente e co' ina çerta confuxon dovua ascì a-a mancança de 'n nummero suficente de stradde insce-e quæ fâ marciâ e so træ bregadde[106]. In realtæ, nonostante questi problemi, primma de nœutte i soviettichi feççan di progresci e i cari do 4º Corpo meccanizao avançon ciu che 20 km e razonsan Plodovitoe, doppo avei disperso a 18ª Divixon fantaja rumeña[106]. O 13º Corpo meccanizao ascì o l'ariêscì a avançâ a ovest de Tondutovo e a contegnî i contratacchi da 29ª Divixon motorizâ che piatro, doppo avei otegnuo quarche sucesso, a fu prematuamente retiâ da-o comando todesco do Gruppo d'armæ B (foscia pe 'na mancâ perceçion di vei obietivi de l'ofensciva soviettica) e schierâ in poxiçion difensciva pe crovî o recegamento verso nord-ovest do IV Corpo d'armâ todesco e constitoî una poxiçion de covertua insci-o scianco meridionâ de forçe da 6ª Armâ schieræ a Stalingraddo[107].
Inta nœutte o 4º Corpo meccanizao o continoò a avançâ caotamente verso ovest pi ordine do viçe-comandante do Fronte de Stalingraddo, generâ Markian M. Popov, e a l'arba do 21 novembre e colonne coraçæ soviettiche ocupon a çitadiña de Zety, e l'importante staçion de Abganerovo, interompindo in questo moddo a linnia feroviaia pe Kotel'nikovo, mentre o 4º Corpo de cavalaja do generâ Šapkin o progredì verso sud-ovest pe crovî o scianco scinistro do corpo meccanizao do generâ Volskij[108].
O generâ Hoth, comandante da 4ª Armâ coraçâ, arestao sença truppe a dispoxiçion doppo l'assegnaçion da 29ª Divixon motorizâ e do IV Corpo d'armâ a-a 6ª Armâ do generâ Paulus, o l'abandonò precipitozamente o so quartê generâ de Verchne Caricynskij, menaçao da-i cari armæ do 4º Corpo mecanizao, e o razonse Nižne Čirskaja, dovve l'ea aprœuvo a confluî un gran nummero de reparti in rotta de retrovie todesco-romeñe[109]. Inta giornâ do 21 novembre o generâ Volskij, pe timô di poscibbili atacchi insci-o so scianco drito da parte da 29ª Divixon motorizâ, o l'arestò a so avançâ doppo avei razonto Zety e Abganerovo, concentrando e riorganizando e so forçe pe frontezâ de menaççe nemighe. O generâ Erëmenko, iritao da queste exitaçioin e solecitao da-o Stavka a açelerâ o movimento pe riconzonzise co-e forçe do Fronte Sud-Ovest do generâ Vatutin provegninte da nord, o l'intervègne energicamente imponendo un rapiddo repiggio de l'avançâ[110].
A matin do 22 novembre o 4º Corpo meccanizao o ripartì in avanti, coverto a o scianco scinistro da doe divixoin de fuxilê; o generâ Volskij o l'organizò un destacamento avançao co-a 36ª Bregadda meccanizâ do colonello Rodionov ch'a l'avançò rapidamente inte un'unnica colonna insce una sola stradda, a-a mascima veloçitæ e sença soste, pe 25 chilommetri co-o scianco drito scoverto, dæto che o 13º Corpo mecanizao, contrastao da-a 29ª Divixon motorizâ, o l'ea in ritardo e o no l'aiva mantegnuo o contatto. Inta giornâ i cari soviettichi razonsan a staçion de Krivomužinskaja, interompindo coscì anche a segonda linnia feroviaia de conligamento da 6ª Armâ e into primmo depoidisnâ ocupon, doppo di scontri con di reparti todeschi, Sovetskij ascì, çitadiña piciña poco a sud de Kalač, dove a bregadda a se fermò pi-a nœutte[111]. Into mæximo giorno o 4º Corpo de cavalaja ascì o feççe di progresci trovando solo che a rescistença de l'8ª Divixon cavalaja rumeña, superâ piatro o giorno sucescivo[112]. A nœutte tra o 22 e o 23 novembre o VI Corpo d'armâ rumen o l'ea ormai destruto e in retiadda derê a-o sciumme Aksaj[113].
A notiççia de l'ócupaçion de Krivomužinskaja a fu riferia inta nœutte da Erëmenko a-o Stalin ch'o mostrò gran sodisfaçion e o comunicò a-o generâ o proscimo arivo da nord de forçe do generâ Vatutin, za a sud do Don[114].
Mentre se desgugeiva a marcia di corpi meccanizæ di generæ Vatutin e Erëmenko, o Fronte do Don do generâ Rokossovskij o l'aiva continoao i so atacchi in direçion de Vertjačij e into coridô Don-Volga, guaagnando teren, ma sença riuscî a impedî a retiadda de truppe todesche de l'XI Corpo d'armâ e do XIV Panzerkorps, che recegon a est do Don pe riunîse a-o resto da 6ª Armâ blocao a Stalingraddo. Mentre a 65ª Armâ do generâ Batov a l'avançò con dificortæ verso Golubinskij e Vertjačij, davanti a l'aspia rescistença de retrogoardie todesche, a 24ª Armâ do generâ Galanin, ch'o l'aiva o compito de atacâ in direçion de Peskovatka pe tagiâ fœua l'XI Corpo d'armâ, o falì inta so miscion. O 16º Corpo cari, frenao da-e dificortæ do teren e da di campi minæ ben disposti, o no riuscì a sfondâ e quindi i todeschi completon con sucesso, nonostante e pezante perdie d'ommi e materiæ o so receigo[115]. Inte l'istmo Don-Volga l'VIII Corpo d'armâ do generâ Heitz o respinse i atacchi da 66ª Armâ soviettica, stabilizando o lao setentrionâ da sacca de Stalingraddo.
A ciuza da tenaggia
[modìfica | modìfica wikitèsto]A matin do 23 novembre i caristi da 36ª Brigâ meccanizâ do colonello Rodionov (4º Corpo mecanizao) areston a Sovetskij in ateiza de l'arivo de forçe do Fronte Sud-Ovest da nord e ebban di ræi scontri con di reparti todeschi provegninti da Marinovka che tentavan de contratacâ[116]. Into primmo depoidisnâ finarmente fu individoao a nord de formaçioin coraçæ in movimento e i reparti do 4º Corpo meccanizao començon a sparâ di forgai de segnalaçion verdi pe evitâ di eroî d'identificaçion e façilitâ o riconzonzimento tra-e doe forçe[117].
![](http://178.128.105.246/content-http-upload.wikimedia.org/wikipedia/commons/thumb/6/6c/Chiusura_della_sacca.jpg/220px-Chiusura_della_sacca.jpg)
E colonne de cari aparse a nord apartegnivan a-a 45ª Brigâ cari do tenente colonello Židkov (componente do 4º Corpo cari do generâ Kravčenko) ch'aivan traversao o Don a Kalač insci-o ponte conquistao da-o 26º Corpo cari; i nœuvi arivæ rispozan con di atri forgai de cô verde. Quindi, continoando a scangiâse e segnalaçioin luminoze, i reparti coraçæ soviettichi do Fronte Sud-ovest e do Fronte de Stalingraddo finarmente se conzonsan a 14 oe a Sovetskij tra-e gren manifestaçioin de gioia[118]. L'evento o fu coscì subitannio e rappido da no dâ tempo manco a-e compagnie de propaganda soviettiche de filmâ l'abraçço tra-i colonelli Rodionov e Židkov e-e scene d'esultança tra i caristi co-i festoxi scangi de vodka e sâsiççe[119] (a scena a saiâ ripetua ciu tardi a scopo propagandistego con l'enfaxi retorrica de questo tipo de documentaçioin cinematograffiche[120]). Inta giornâ do 23 novembre arivò di atri reparti coraçæ soviettichi apartegninti a-o 26º Corpo cari e a-o 13º Corpo meccanizao che raforçon e poxiçioin a Sovetskij e completon definitivamente o çercio in gio a-e truppe todesche da 6ª Armâ[121].
Completamente inefficaçe rizultò o tardivo e disorganizao intervento di elementi mobbili da 6ª Armâ a-o comando do generâ Hube, diximpegnæ de sprescia da Stalingraddo. A 16. Panzer-Division a l'arestò into setô de Vertjačij e a poette solo che crovî a dificortoza e caottica retiadda de l'XI Corpo d'armâ todesco a est do Don pe reconzonxise co-o resto de l'armâ, primma de ripiegâ a so votta o 26 de novembre de là do sciumme[122], mentre a 24. Panzer-Division e a 3ª Divixon motorizzâ çercon tardivamente de fermâ l'avançâ nemiga a sud de Kalač e impedî o riconzonximento de tenagge coraçæ nemighe, ma fun façilmente respinte e poettan solo schierâse difenscivamente into setô de Marinovka, crovindo e spalle da 6ª Armâ ormai açerciâ[123].
A tenaggia a s'ea serâ: a 6ª Armâ e gran parte da 4ª Armâ coraçâ todesche ean aoa açerciæ tra o Don e o Volga; e truppe romeñe ean completamente disgregæ e non ciu utilizabile, e riserve mobbile todesche za ezaorie; i comandi e i reparti de retrovia in fuga into pannico. O generâ Paulus o l'ea arestao drento a sacca, i generæ Zeitzler, von Weichs, Hoth, Hollidt e Wenck[124] çercavan de improvizâ coù ina serrie de Kampfgruppe un nœuvo schieramento difenscivo insci-o Čir e insce l'Aksaj[125], mentre o l'Hitler, ch'o l'assonse un attezamento de imperturbabilitæ davanti a-a serrie de sconfite e de fiduccia inte poscibilitæ de rifornî l'armâ e de sblocâla co' ina controfensciva da l'esterno, o l'ea aoa a-e preize co-e decixoin fondamentæ da pigiâ[126].
Inte quattro giorni o Stalin (soventi nervozo, ansciozo e in continno contatto con Vasilevskij pi avei de notiçie agiornæ inti giorni de l'ofensciva[127]) e l'Armâ Rossa aveivan finarmente otegnuo a virata decixiva da guæra da 'n ponto de vista strateggico-operativo, ma sotto l'aspetto morâ e politico-propagandistico ascì[128]. Inte l'atmosfea euforrica da nœutte do 23-24 novembre inta quæ o generâ Vasilevskij o comunicò telefonicamente a-o Stalin o conzonzimento de tenagge e o riuscio açerciamento de tutto o ragroppamento todesco de Stalingraddo, i dirizenti soviettichi ipotizon otimisticamente de poei destrue inmediatamente e truppe nemighe açerciæ e sferâ in tempi brevi a segonda faze de l'ofensciva (operaçion Saturno)[129]. A questo scopo quindi o generâ Vasilevskij o diramò i ordini a-i generæ Rokossovskij e Erëmenko de repigiâ i atacchi longo o perimmetro da sacca da 6ª Armâ e da pœu o se recò subbito, co' in movimentao viægio in aerrio, a nord pe conferî co-o generâ Filipp Golikov, comandante do Fronte de Voronež, incaregao de l'atacco insci-o medio Don contra-i italien[130].
In realtæ, nonostante o decixivo risultao razonto con l'operaçion Uran, a bataggia a saieiva stæta ancon longa e incagnia; e forçe açerciæ (ben ciu numeroze de quanto previsto da-o comando soviettico) se saieivan battue validamente insci-a difensciva e avieivan respinto, tra-o 27 novembre e o 4 dexembre, o primmo aspresciao tentativo di generæ Rokossovskij e Erëmenko de sciacâ a sacca de Stalingraddo, mentre-o comando todesco o no l'avieiva renonçiao a çercâ a rivinçita con l'aflusso de riserve, creando de nœuve procupaçioin a-o Stalin e a-o Stavka e ritardando a vitoia definitiva de l'Armâ Rossa[131].
Epillogo e conseguençe
[modìfica | modìfica wikitèsto]
«Into spaçio de pochi giorni, da-o 19 a-o 23 novembre 1942, l'imposcibbile, impensabbile, l'inimmaginabbile s'ea verificao insci-o fronte orientâ...[132]» |
Sciben che pigiao de sorpreiza da l'andamento rapidamente disastrozo di operaçioin, Hitler, oltre a ordinâ i falimentæ contratacchi do XXXXVIII Panzerkorps do generâ Heim, za o pomeriggio do 21 novembre o l'aiva comunicao a-o generâ von Weichs (comandante do Groppo d'armæ B) e a-o Paulus de restâ insce-e poxiçioin "nonostante o peigo de 'n tempoannio açerciamento"[133]. Rasseguao da-o generâ Hans Jeschonnek, cappo de Stato Magiô da Luftwaffe e doppo da-o Reichmarshall Hermann Göring insci-a fattibilitæ de 'n ponte aerreo pe rifornî e truppe eventoalmente açerciæ, o Führer, ben lontan da l'ipotizâ una retiadda, o contava de imbósâ a scitoaçion e ótegnî un nœuvo successo, e a questo scopo sempre o 21 novembre o reciamò da-o fronte de Leningraddo o prestigiozo feldmaresciallo Erich von Manstein pi assegnâghe o comando de 'n nœuvo Groppo d'armæ Don con l'incarrego de ristabilî a scitoaçion inte l'area[134].
![](http://178.128.105.246/content-http-upload.wikimedia.org/wikipedia/commons/thumb/8/88/German_pows_stalingrad_1943.jpg/220px-German_pows_stalingrad_1943.jpg)
Nonostante i ripetui apelli do generâ Paulus, sostegnui da-o generâ von Weichs e anche da-o generâ de l'aeronaotica Wolfram von Richthofen (comandante da 4ª Luftflotte), Hitler, zonto a Rastenburg o 24 novembre seja, o pigiò a decixon definitiva e o diramò a-a 6ª Armâ o so "Ordine tasciativo" (Führerbefehl – letteralmente "ordine do Führer") co-o quæ o confermava a decixon de no abandonâ Stalingraddo e o fronte insci-o Volga. O dittatô o l'ordinava de costituî 'na gran sacca difensciva a 360 graddi, de organizâ un ponte aereo pe asseguâ rifornimenti adeguæ, de concentrâ un nœuvo ragropamento strateggico (con l'aflusso de riserve) pe sferâ una controfensciva e liberâ e truppe açerciæ[135].
A scitoaçion de forçe de l'Asse into setô meridionâ a l'ea però ben ciu grave do previsto e, nonostante l'otimismo de Hitler e insce-e primme do von Manstein ascì, i operaçioin ebban un'evoluçion sempre ciu sfavoeive a-i todeschi e a-i so alliæ. O 16 dexembre 1942, l'operaçion Picceno Saturno (variante con di obietivi ciu limitæ de l'originâ operaçion Saturno) a l'avieiva provocao o colasso e a retiadda do grosso de l'8ª Armâ italiaña e a definitiva sconfita do fronte sud de l'Asse, sugelando ascì o destin da 6ª Armâ do generâ Paulus circondâ inta sacca de Stalingraddo[136].
L'açerciamento de ciu che 250.000 sordatti de l'Asse[137] (reston intrapolæ co-i todeschi circa 13.000 rumen ascì e dótræ çentanæa de croati, ungaixi e italien[138]) o se saieiva dramaticamente prolongao pi atri doi meixi fin a-a reiza finâ do 2 de frevâ 1943. Quello giorno quello ch'arestava da 6ª Armâ, conscistente de circa 91.000 sordatti (i atri prinçipalmente moin o fun dispersci, a parte circa 25.000 ferii, specialisti e di ati ofiçiæ evacuæ pe via aeria) a se reize a-i soviettichi. O Paulus, insemme a-a ciu gran parte di generæ comandanti, o condivize a reiza di superstiti e o refuò o taççito invio do Hitler a-o suiçiddio[139].
L'operaçion Uran a marcò indubiamente a virata decixiva da longa bataggia de Stalingraddo e da goæra insci-o Fronte orientâ[140]; e forçe coraçæ soviettiche completon con noteive abilitæ e energia, in soli quattro giorni, a gran manœuvra a tenaggia e ótègnan un rizultao sorprendente, inateizo da-o nemigo e supeiô a-e mæxime previxoin do Stavka, portando a termine un'ofensciva de açerciamento gigantesca paragonabbile inta stoia da segonda goæra mondiâ solo a-o Fall Gelb e a-e sacche de Kiev e Vjazma, eseguie da-a Wehrmacht inti anni precedenti[141]. A propaganda soviettica a l'ha delongo parlao de 'na battaggia de Canne moderna[142] e, in efetti, pe-e dimenscioin, e conseguençe strateggiche e morale e politiche ascì, l'operaçion Uran a g'ha un'importança foscia ancon ciu grande di atre gren manœuvre d'açerciamento da stoia; gh'è di aotoî chi-a consciddian in assoluo o ciu gran açerciamento militâ de tutti i tempi[143].
Notte
[modìfica | modìfica wikitèsto]- ↑ Bauer, p. 129
- ↑ Osers, pp. 1048-1058
- ↑ Osers, pp. 1077-1100
- ↑ Valori, pp. 467-474
- ↑ Schlemmer, p. 123
- ↑ 6,0 6,1 Erickson, The Road to Stalingrad, pp. 388-389
- ↑ Churchill, pp. 608 e 615
- ↑ Erickson, The Road to Stalingrad, pp. 401-402
- ↑ Erickson, The Road to Stalingrad, pp. 426-432; Samsonov, pp. 282-291.
- ↑ Erickson, The Road to Stalingrad, pp. 390 e 423
- ↑ Inta struttua organizativa de l'Armâ Rossa o "Fronte" o l'ea un gran ragropamento operativo, sotta-o comando de 'n quartê generâ, costituio da varrie armæ, corpi cari, corpi meccanizæ e corpi de cavalaja, rinforçao eventoalmente con di reparti de riserva e schierao inte 'na determinâ area geografica do fronte orientâ. O raprezentava l'equivalente di Groppi d'armæ todeschi anche se in genere o l'ea formao da meno unitæ. In: Glantz, p. 76.
- ↑ Erickson, The Road to Stalingrad, pp. 388-389 e 422-435; Glantz, p. 199.
- ↑ 13,0 13,1 Erickson, The Road to Stalingrad, p. 389
- ↑ Overy, p. 182
- ↑ Insci-i vei scopi globæ da segonda ofensciva invernâ soviettica o dibattito o continnoa da tempo, sorvetutto pe-o stimmolo de l'œuvia revixonista do D. Glantz, Zhukov's greatest defeat, Kansas, 1999. O storrico militâ statunieize o l'interpreta l'operaçion "Marte" non comme sempliçe ofensciva de diverscion soviettica, ma comme un riâ atacco falio, con scopi e forçe impiegæ atretanto grandioxi do cian Uran. Contra sta interpretaçion chie a repplica polemmica ruscia, prezempio in V.V. Gurkin, Mars v orbie Urana i Saturna, VIZ n. 4, 2000. Dettaggi in Bellamy, pp. 610-614 e in Scotoni, pp. 169-171.
- ↑ Bellamy, pp. 610-611
- ↑ Bellamy, pp. 611-613
- ↑ Scotoni, p. 171
- ↑ Boffa, pp. 98-99
- ↑ Pe i detaggi insci-o transfeimento de mandœuvia, macchine e atreççatue soviettiche lontan da-o fronte s'amie Overy, pp. 180-181.
- ↑ Osers, pp. 897-903
- ↑ Erickson, The Road to Stalingrad, pp. 430-431
- ↑ Erickson, The Road to Stalingrad, pp. 431-432
- ↑ Erickson, The Road to Stalingrad, pp. 446-447
- ↑ Erickson, The Road to Stalingrad, pp. 448-449 e 457
- ↑ Scotoni, pp. 172-173
- ↑ Osers, pp. 1084-1097
- ↑ Irving, p. 613; pâ che into periodo de so dimiscioin (23 setembre 1942) Halder o l'ostentesse ottimismo e fiduccia inta possança de l'exerçito todesco e insce l'indebolimento inreverscibile do nemigo soviettico.
- ↑ Osers, pp. 1118-1119
- ↑ Osers, pp. 1090-1095
- ↑ Osers, pp. 1095-1096
- ↑ Osers, pp. 1119-1120
- ↑ Carell, p. 687
- ↑ Osers, pp. 1117-1118
- ↑ Osers, pp. 1114 e 1121-1122
- ↑ Inta Wehrmacht ean scriti proppio coscì i numeri pe distingoe i corpi coraçæ, pertanto a scritua a no l'è un erô.
- ↑ Osers, pp. 1120-1122
- ↑ Boffa, p. 99
- ↑ Boffa, pp. 96-97
- ↑ Una descriçion da ricostituçion, da riorganizzaçion e de l'impiego de questo corpo meccanizao soviettico in Erickson, The Road to Stalingrad, pp. 430-431.
- ↑ O generâ Fedorenko o l'ea o cappo do GABTU, a direçion generâ de truppe motocoaçæ, e o fu l'arteffiçe prinçipâ da renascita e do raforçamento de forçe coraçæ soviettiche; Scotoni, p. 80.
- ↑ Scotoni, p. 129
- ↑ Analixi detagiâ in Scotoni, pp. 384-390, inta quæ s'atrœuva ascì o testo da direttiva do Stalin insce l'impiego de truppe meccanizae.
- ↑ Glantz, pp. 199-200
- ↑ Erickson, The Road to Stalingrad, pp. 445-446
- ↑ Erickson, The Road to Stalingrad, pp. 448-449
- ↑ Erickson, The Road to Stalingrad, p. 454; Gerlach, pp. 13-16; Osers, pp. 1122-1123.
- ↑ Pe di dæti quantitativi agiornæ: Osers, p. 1104.
- ↑ Osers, pp. 1105-1110
- ↑ Osers, pp. 1107-1113
- ↑ Görlitz, p. 231
- ↑ Axworthy, pp. 86-89
- ↑ Axworthy, p. 85
- ↑ Axworthy, p. 101
- ↑ Sciu quest'urtimo ponto e insci-o resto s'amie Osers, pp. 1111-1114; Axworthy, pp. 85 e 101.
- ↑ Bauer, pp. 266-267
- ↑ Axworthy, p. 89
- ↑ O XIV Panzerkorps o fu rinforçao subbito pe tentâ de contratacâ da-a 24. Panzer-Division ch'a dipendeiva in precedença da-o LI Corpo d'armâ; in Osers, p. 1106
- ↑ Osers, pp. 1106-1108
- ↑ Erickson, The Road to Stalingrad, pp. 460-461, o generâ Čujkov o l'arestò a-o scuo di cen do Stavka e o fu avertio telefonicamente solo a-a nœutte do 18 novembre de l'inandio da gran controfensciva generâ insci-o fronte de Stalingraddo; in Overy, p. 188.
- ↑ Erickson, The Road to Stalingrad, pp. 458-462
- ↑ Boffa, p. 99
- ↑ Bellamy, pp. 613-614
- ↑ Durante a bataggia arestò morti trei di quattro generæ rumen comandanti de corpo d'armâ e ogni compagnia a perse o proppio comandante; in Irving, p. 637.
- ↑ Scotoni, pp. 174-175
- ↑ Erickson, The Road to Stalingrad, pp. 464-465
- ↑ Samsonov, pp. 337-339
- ↑ Scotoni, p. 175; Axworthy, pp. 91-92.
- ↑ A 13ª Divixon romeña a riuscì a destrue vintiçinque cari nemixi primma de ese soverciâ. In Axworthy, p. 91.
- ↑ Scotoni, pp. 175-176
- ↑ Axworthy, p. 92
- ↑ Insci-a marcia de colonne coraçæ soviettiche: Erickson, The Road to Stalingrad, pp. 464-465; Beevor, pp. 274-275; Samsonov, pp. 308-310.
- ↑ Erickson, The Road to Stalingrad, pp. 465-466
- ↑ Erickson, The Road to Stalingrad, pp. 464-466; Bauer, pp. 272.
- ↑ 75,0 75,1 Erickson, The Road to Stalingrad, pp. 466
- ↑ A 22. Panzer-Division a rivendicò a destruçion d'aomanco 26 mezi coraçæ nemixi, in Carell, p. 694.
- ↑ Osers, p. 1123; Ziemke, p. 54; Carell, pp. 694-695.
- ↑ Axworthy, pp. 92-95
- ↑ Osers, p. 1108. L'é ben nota a dezaventua da 22. Panzer-Division i cari da quæ saieivan stæti danezæ da di ratti penetræ inte strutue interne de macchine, aroinando i circoîti elettrichi, in Carell, pp. 689-690.
- ↑ Ziemke, pp. 56-57
- ↑ Osers, p. 1123
- ↑ 82,0 82,1 82,2 Erickson, The Road to Stalingrad, p. 468
- ↑ Görlitz, pp. 235-236; Scotoni, pp. 189-190.
- ↑ Görlitz, p. 236
- ↑ Görlitz, p. 236. O 23 e o 24 novembre intervègne ascì pe raforçâ o scianco scinistro do schieramento de l'Asse insci-o sciumme Čir doi groppi de intervento de divixoin italiañe "Sforzesca" e 3ª "Celere"; in Scotoni, p. 174.
- ↑ Görlitz, p. 236
- ↑ Axworthy, p. 95
- ↑ Axworthy, p. 97
- ↑ Görlitz, pp. 269-275
- ↑ I superstiti da 15ª Divixon romeña fun posti da-a 22. Panzer-Division, o 23 novembre, a-a difeiza de Bol'šaja Donschinki subindo de gravi perdie tra-e quæ quella do comandante Sion. Sciu questo e insci-o resto s'amie Görlitz, pp. 236-237; Axworthy, pp. 98-100.
- ↑ Bauer, p. 291
- ↑ Bauer, p. 272
- ↑ Beevor, pp. 280 e 286-287
- ↑ Osers, p. 1123-1124
- ↑ Osers, p. 1106
- ↑ Ziemke, p. 56-57
- ↑ I generæ Paulus e Arthur Schmidt (cappo de stato magiô da 6ª Armâ) inte 'n primmo tempo andon in xœuo a-o quartê generâ de Nižne Cirskaja, fœua da sacca, ma, sciu ordine diretto do Hitler, tornon subbito in seiaña a Gumrak pi assumme o comando de truppe açerciæ, in Carell, p. 699.
- ↑ Beevor, pp. 284-285; Erickson, The Road to Stalingrad, p. 469; Carell, pp. 700-701.
- ↑ O 26º Corpo cari o saiva stæto rinominao da-o Stalin, l'8 de dexembre, 1º Corpo cari da Goardia "Donskij" pi-a conquista riuscia do ponte insci-o Don a Kalač; in Sharp, p. 42.
- ↑ Erickson, The Road to Stalingrad, pp. 466-467
- ↑ Axworthy, pp. 101-102
- ↑ Erickson, The Road to Stalingrad, p. 467; se tratava da linnia Beketovka-Kotel'nikovo e da linnia Stalingraddo-Lichaja.
- ↑ Carell, pp. 696-697; Axworthy, p. 102.
- ↑ Erickson, The Road to Stalingrad, p. 430
- ↑ 105,0 105,1 Axworthy, p. 101
- ↑ 106,0 106,1 Erickson, The Road to Stalingrad, p. 467
- ↑ Carell, pp. 697-698
- ↑ Erickson, The Road to Stalingrad, pp. 467-468
- ↑ Osers, p. 1126
- ↑ Erickson, The Road to Stalingrad, p. 468
- ↑ Erickson, The Road to Stalingrad, pp. 468-469
- ↑ Axworthy, pp. 103-104
- ↑ Axworthy, p. 104
- ↑ Erickson, The Road to Stalingrad, p. 469. Fu solo a nœutte do 22 novembre che l'Ufiççio informaçioin soviettico (Sovinformburo) o diramò o primmo comunicao ofiçiâ riguardo l'ofensciva in corso, riferindo de l'interuçion de linnie feroviaie da 6ª Armâ e di gren risultæ razonti, in Werth, pp. 488-489. Inti primmi giorni de l'ofensciva fu mantegnuo un streito riserbo e o Stalin mæximo o l'inviò una scarna comunicaçion a-o Churchill o 20 novembre dixendo solo che: "l'ofensciva a no va mâ..."; in URSS, p. 605.
- ↑ Scotoni, pp. 176-177
- ↑ Erickson, The Road to Stalingrad, p. 469
- ↑ Mentre i soviettichi dœuviavan di forgai de segnalaçion verdi, e truppe coraçæ todesche impiegavan di forgai de cô gianco, p.e. durante a battaggia de Kiev, in Erickson, The Road to Stalingrad, pp. 208-209.
- ↑ Erickson, The Road to Stalingrad, pp. 469-470
- ↑ Beevor, pp. 284-285; Grossman, p. 624-625.
- ↑ Beevor, p. 285
- ↑ Erickson, The Road to Stalingrad, p. 470
- ↑ Beevor, pp. 287-292
- ↑ Carell, pp. 700-701
- ↑ O generâ Walther Wenck o fu nominao cappo de Stato magiô da 3ª Armâ romeña in desfaçimento e o l'ariescì a ricostituî un fronte insci-o sciumme Čir con l'agiutto di reparti de segonda linnia todeschi; in Carell, p. 717.
- ↑ Carell, pp. 714-717
- ↑ Irving, pp. 639-641
- ↑ Erickson, The Road to Stalingrad, pp. 470-471
- ↑ Erickson, The Road to Berlin, pp. 1 e 43-44
- ↑ Boffa, pp. 98-99
- ↑ Erickson, The Road to Stalingrad, pp. 471-472; l'aereo con a bordo o generâ Vasilevskij, che inte comunicaçioin a-o vertiçe o l'aiva o nomme in coddiçe "Michailov", mentre o Žukov o l'ea "Konstantinov", Vatutin "Fedorov", Rokossovskij "Dontsov", Erëmenko "Ivanov" e Stalin "Vasilëv", o perse l'orientamento e o dovette effetoâ un aterraggio de emergença, costrenzendo l'ato ofiçiâ (pe quarche oa dæto pe disperso) a razonze o quartê generâ insce 'n aotocaro requixio.
- ↑ Boffa, pp. 99-100
- ↑ Erickson, The Road to Berlin, p. 1
- ↑ Irving, pp. 638-639
- ↑ Bauer, pp. 282-283
- ↑ Bauer, pp. 278-279
- ↑ Scotoni, pp. 226-231
- ↑ Bauer, pp. 251
- ↑ Beevor, p. 478
- ↑ Insce-e faze finæ da longa bataggia: Beevor, pp. 410-432; Erickson, The Road to Berlin, pp. 35-38.
- ↑ De Tomasi, pp. 110-111
- ↑ De Tomasi, p. 111
- ↑ Werth, p. 540
- ↑ Bellamy, p. 619
Bibliografia
[modìfica | modìfica wikitèsto]- (EN) Ewald Osers, John Brownjohn e al., The Global War, in Germany and the second world war, vol. 6, Oxford, Oxford University Press, 13 seténbre 2001, ISBN 0-191-60684-7.
- (IT) G. De Tomasi, In marcia verso Stalingrado, in Il terzo Reich, vol. 6, Bresso, Hobby & Work Publishing, 1993, ISBN 88-713-3187-7.
- (IT) AA.VV., 1942, Dalla ritirata a Stalingrado, in L'URSS nella seconda guerra mondiale, vol. 2, Compagnia Edizioni Internazionali, 1978.
- (EN) Mark Axworthy, Cornel I. Scafeș e Cristian Crăciunoiu, Third Axis, Fourth Ally: Romanian Armed Forces in the European War, 1941-1945, Arms & Armour, 1995, ISBN 1-854-09267-7.
- (IT) Eddy Bauer, 1942, in Storia controversa della seconda guerra mondiale, vol. 4, Novæa, Istituto Geografico De Agostini, 1976.
- (IT) Antony Beevor, Stalingrado: La battaglia che segnò la svolta della Seconda guerra mondiale, 3ª ed., Milan, Biblioteca Universale Rizzoli, 2013, ISBN 88-586-4531-6.
- (IT) Chris Bellamy, Guerra assoluta. La Russia sovietica nella seconda guerra mondiale, Turin, Einaudi, 2010, ISBN 88-061-9560-3.
- (IT) Giuseppe Boffa, 1941-1964, in Storia dell'Unione sovietica, vol. 3, Romma, L'Unità, 1990.
- (IT) Paul Carell, Operazione Barbarossa 21 giugno 1941 / 18 novembre 1942, Milan, Rizzoli, 2000, ISBN 88-172-5902-0.
- (IT) Winston Churchill, Parte IV: La svolta fatale, in La seconda guerra mondiale, vol. 8, Segrate, Mondadori, 1951.
- (EN) John Erickson, The Road to Stalingrad: Stalin's War with Germany, vol. 1, Londra, Cassel, 2003, ISBN 0-304-36541-6.
- (EN) John Erickson, The Road to Berlin: Stalin's War with Germany, vol. 2, Londra, Cassel, 2003, ISBN 0-304-36540-8.
- (IT) Heinrich Gerlach, L'armata tradita, Milan, Rizzoli, 29 seténbre 1999, ISBN 88-171-1931-8.
- (IT) David M. Glantz e Jonathan House, La grande guerra patriottica dell'Armata Rossa 1941-1945, 1ª ed., Gorìçia, Editrice Goriziana, 2010, ISBN 88-610-2063-1.
- (DE) Walter Görlitz e Friedrich Paulus, Paulus: "Ich stehe hier auf Befehl!", Francoforte in scio Men, Verlag für Wehrwesen Bernard & Graefe, 1960.
- (IT) Vasilij Grossman, Vita e destino, 1ª ed., Milan, Adelphi, 2008, ISBN 88-459-7339-5.
- (IT) David Irving, La guerra di Hitler, vol. 2, Massa, Edizioni Clandestine, 2010, ISBN 88-957-2051-2.
- (IT) Richard J. Overy, Russia in guerra 1941-1945, 3ª ed., Milan, Il Saggiatore, 2011, ISBN 88-565-0259-3.
- (IT) Aleksandr M. Samsonov, Stalingrado fronte russo, Milan, Garzanti, 1961.
- (EN) Charles C. Sharp, The soviet order of battle, volume II: school of battle, Lakewood, George F. Nafziger, 1995.
- (IT) Thomas Schlemmer, Invasori, non vittime: La campagna italiana di Russia 1941-1943, Bari, Editori Laterza, 2009, ISBN 88-581-4048-6.
- (IT) Giorgio Scotoni, L'Armata Rossa e la disfatta italiana (1942-43), Milan, Editrice Panorama, 2007, ISBN 88-738-9049-0.
- (IT) Aldo Valori, La campagna di Russia: CSIR-ARMIR: 1941-1943, vol. 1, Romma, Grafica nazionale editrice, 1951.
- (IT) Alexander Werth, La Russia in guerra, Segrate, Mondadori, 1966.
- (EN) Earl F. Ziemke, Stalingrad To Berlin - The German Defeat In The East, 4ª ed., Auckland, Pickle Partners Publishing, 15 agósto 2014, ISBN 1-782-89320-2.
Âtri progètti
[modìfica | modìfica wikitèsto]Wikimedia Commons a contêgne di files in sce Operaçion Uran