Per la sua poesia a M. Fabio Varese

E' m'allegher con ti, Fabj Vares,
citara sbottascià, ghitarra rotta,
che per drovà sta lengua adré la potta
no gh'è on par tò su tutt el milanes.
Par tì porta Comasna e porta Asnes
fan parì la toscana ona gasgiotta,
e la Crusca non sa quel che s' barbotta
su i tû sonitt tant hin lor ben destes.
Che 'l sia la verilà l'hó sentù a dì
dal Petrarca, dal Tass e da costor
che con mì hin tutt scisger e buell.
Tal che te pû aspeccià ch'on de sti dì
Apoll deliberà da fatt onor
metta la bria e 'l bast al Pegasnell
e vegna co' i musell
e co' i poitt e tutta la brigà
a incoronatt de verz e scervellà.
Risposta del Varese
Ringrazia da mia part quel Mont cortes,
poetta muff dalla darera cotta,
vioron da incordà nomà 'na botta
per el coll su tri legn longh e destes.
Per ti quij della Vedrà e porta Asnes
paresgien de fà fest e corr in frotta
a vedett a menà in d'ona casotta
accompagnà da i nobil milanes.
Perchè fin d'Elicona e' sent a dì
t'hé bolgirà i musell tugg anca lor
e al poverasg Apoll scarpà 'l buell.
De mûd s' te vegnaré con lor anch tì
el prestin bianch del zert vûr fatt onor
de fassenn d'ona mitria e d'on asnell,
con scrigg in su 'l cappell
«Quest'è 'l fin d'i poetta c'han drovà
alla roversa i verz col cervellà ».