Te se regordet?!

Te se rigordet voj la mia biscin...
Se semm fermaa
lì sora el pont de Gorla a toeu el sorbett
gh'era on bordell de gent, vestii d'estaa
che disnava a l'albergo del Boschètt
Mi ògni tant carezzava la toa man
quell bel manin strengiuu in di guant de pell
ti, intant, che te guardavet vers Milan
te me cercavet el second pontell.
L'era ona fèsta, l'era ona legria
per tutt quell stradon bianch cont i piantònn.
Mi cantava e rideva; e ti Sofia
tutt el stradon te parlaa mal di dònn.
L'è passaa on ann.. N'hoo faa di bej piangiud,
per i contrad de sira de per mì,
quand te m'hee scritt vosandem, nud e crud
de fermatt pù... che gh'era già el marì!
L'altrer, tornand a Sest, me sont fermaa
lì sora al Pont de Gòrla a toeu on sorbett
e sòtta a solasciass cald e sfacciaa
l'era desèrt l'Albergo del Boschett...
L'era ona noia e ona malinconia
per tutt quell stradon bianch con quij piantònn.
S'era invers; e pensand a tì, Sofia!
s'era mì soll... a pensà mal di dònn!...