Partido Baath
![](http://178.128.105.246/content-http-upload.wikimedia.org/wikipedia/commons/thumb/f/f3/Flag_of_the_Ba%27ath_Party.png/220px-Flag_of_the_Ba%27ath_Party.png)
L Partido Baath ye un partido pan-árabe que eisiste ne l Eiraque (al qual pertenecie l ex-persidente Saddan Hussein), ne l Lhíbano i na Síria (al qual pertenecie l ex-persidente Hafez al-Assad i l atual persidente, Bashar al-Assad).
L Baath (tamien Ba'las ó Ba'ath, an detreminadas trasliteraçones) ye ua eideologie baseada ne l nacional-socialismo, adatados a la cultura árabe i a la sociadade eislámica. An cuntradiçon cula maiorie de l gobiernos monárquicos i fuortemente anfluenciados pula religion ne l Ouriente Médio i ne l Magrebe (cumo la Arábia Saudita, Omana, Bahrein, Kuwait, Catar i l Marrocos), ls baathistas son defensores de l secularismo, de la modernizaçon andustrial i de políticas de bien-star social cun anterbençon statal na eiquenomie, percipalmente ne l setor de petrólio. Ls Baath, desta maneira, son adbersairos ferozes tanto de ls lhiberales pró-Oucidentales quanto de ls fundamentalistas (cumo la Al Qaeda i l Hizbolá). La eideia de "Baath", que quier dezir "renacimiento" ó "ressurreiçon", fui zambolbida a partir de l pensamiento de Michel Aflaq, percipalmente an sou lhibro Subre l Camino de la Ressurreiçon. Alguns analistas oucidentales pénsan que l Partido Baath ten ciertas semelhanças a la eideologie facista por sue mensaige populista, sou nacionalismo panarabista que quaije torna-se spansionismo i por sues tendéncias a ser na prática de la dreita política.
Outros lhíderes socialistas, nacionalistas i seculares de l mundo árabe son ó fúrun Gamal Abdel Nasser ne l Eigito, Ahmed Ben Bella na Argélia i Muammar al-Gaddafi na Líbia, ambora nanhun de ls trés seia propiamente Baath.
Durante la Guerra Frie, l Baath tubo l apoio de la Ounion Sobiética, yá que repersentaba las corrientes de squierda contra ls capitalistas de l oucidente ouropeu i ls amaricanos. Al chegáren al poder na Síria (1963) i ne l Eiraque (1963, 1968), ls baathistas nacionalizórun las ampresas de petrólio i cumbatírun las multinacionales de ls Stados Ounidos de la América, Reino Ounido i Fráncia. An 2003, cula ambason de l Eiraque i l derrube de l gobierno de Saddan Hussein, l Partido Baath fui formalmente banido, cumo ua de las purmeiras medidas tomadas.
L mobimiento Ba'ath pertendie inda a ounificaçon de ls árabes sob un único Stado, l que fui tentado nas ouniones antre la Síria i l Eigito (República Árabe Ounida i antre la Síria i l Eiraque). La einiciatiba até hoije reflite-se nas bandeiras parecidas destes países. Las partes eiraquiana i síria éran, até recentemente, ribales.