Frederick Sanger
![](http://178.128.105.246/content-http-upload.wikimedia.org/wikipedia/commons/thumb/f/f8/Frederick_Sanger2.jpg/170px-Frederick_Sanger2.jpg)
Frederick Sanger OM, CH, CBE (* 13. August 1918 in Rendcomb, Gloucestershire; † 19. November 2013 in Cambridge, Cambridgeshire) weer en britisch Biochemiker.
He hörrt to de wenig Lüüd, de tweemal mit en Nobelpries ehrt wurrn: 1958 kreeg Sanger den Nobelpries för Chemie (as alleenig Priesdräger) för dat Opkloren vun de Struktur vun dat Insulin un sien Arbeiten to de Proteinsequenzeeren. 1980 kreeg he nochmals den Nobelpries för Chemie (ditmal tosommen mit Paul Berg un Walter Gilbert), för de Ünnersöken to de Ermittlung vun de Basensequenz in Nukleinsüüren.[1]
Leven
[ännern | Bornkood ännern]School un Studium
[ännern | Bornkood ännern]Frederick Sanger wurr as tweet Söhn vun den Dokter Frederick Sanger senior un Cicely Sanger boren. Ünner den Infloot vun sien Vader un sien een Johr ölleren Bröer Theodore entwickel Sanger all fröh en Interesse för de Naturwetenschapen. Nah de Schoolutbillen an de Bryanston School un an dat St John’s College in Cambridge, wull he oorsprünglich Medizin studeeren, hett sück denn aber för de Biochemie entscheeden, wiel he sück as Naturwetenschapler anners as in den Dokterberop starker up een Themenrebeet konzentreeren un dordör villicht mehr recken kunn. So is Sanger mit dat Studium vun de Biochemie an dat Department of Biochemistry in Cambridge anfungen.
1939 kreeg Sanger sien Afschluss as Bachelor of Arts. Wiel he ut en Quäker-Familie keem, hett he den Kriegsdeenst ut Gewetensgrünnen aflehnt un hett wiels den Tweeten Weltkrieg an sien Dokterarbeit wieder arbeit, de he in dat glieker Institut ünner dat Betrüen vun Albert Neuberger över den Metabolismus vun de Aminosüür Lysin anfertigen dee. Sien Doktertitel kreeg he denn 1943.
Forschenstätigkeit
[ännern | Bornkood ännern]Sanger sien Arbeit wurr van 1944 bit 1951 dör en Beit Memorial Fellowship for Medical Research fördert. 1951 wurr he externer Mitarbeiter vun dat Medical Research Council (MRC).
In dat Johr as he sien Doktertitel maakt hett wurr Albert Chibnall Nahfolger vun Frederick Gowland Hopkins as Baas vun de Biochemie-Afdeelen in Cambridge, un Sanger wurr Liddmaat in de Forschensgrupp vun Chinall. Dat Hööftinteresse vun de Grupp gull de Proteinchemie, besünners de vun dat Insulin. Sanger hett denn en Methood to dat Bestimmen vun de Aminosüürsequenz]] entwickelt, mit deren Hülp he in twalfjohrig Arbeit de Insulinsequenz vullstännig bestimmen dee. 1955 kunn de Sequenz bekannt maakt wurrn, woför Sanger 1958 mit den Nobelpries för Chemie uttekent wurr.
In de Folg bleev Sanger in Cambridge un övernehm de Leiden vun de Afdeelen för Proteinchemie an dat Laboratory of Molecular Biology (LMB). Dit Institut weer 1962 as nee Laborkomplex baut wurrn, nahdem dat Medical Research Council all 1947 in Cambridge en Grupp to de „Erforschung der Molekularen Struktur biologischer Systeme“ inricht harr. Ofschons Sanger bit dorhen kien besünner Interesse an Nukleinsüüren harr, hett he dör de Diskussion mit Wetenschapler as Francis Crick oder Sydney Brenner de Notwennigkeit sehn, ok de Sequenz vun dissen annern Biopolymer to bestimmen. In de folgen Johren hett sück Sanger dorüm mit de Entwicklung vun en wiedere Sequenzeerensmethood befaat, de toletzt to dat „Kettenafbröökverfohren“ führen dee. 1980 wurr Sanger för sien Bidrääg to de Sequenzeeren vun Nukleinsüüren to'n tweeten Mal mit den Nobelpries för Chemie uttekent.
1983 gung Frederick Sanger in den Ruhestand. Toletzt hett he sück gemeensam mit sien Fru Margaret Joan mit sien Hobbys befaat: Gördnern un Segeln. Ut hör Ehe stammen dree Kinner.
Utteknungen
[ännern | Bornkood ännern]- 1951 Corday-Morgan-Medaille vun de Royal Society of Chemistry
- 1954 Fellow vun de Royal Society (FRS).
- 1958 un 1980: Nobelpries för Chemie.[1] In de Historie vu den Nobelpries hebbt dat blots veer Wetenschapler schafft, tweemal disse hööchste Ehrung to kriegen (neben Sanger weern dat Marie Curie, Linus Pauling un John Bardeen. Sanger un Bardeen sünd buterdem de eenzig Minschen, de tweemal mit den Nobelpries in de sülvig Disziplin uttekent wurrn sünd).
- 1963 Orden Commander of the Order of the British Empire (CBE) dör Königin Elisabeth II.
- 1969 Royal Medal vun de Royal Society.
- 1971, 1979 Gairdner Foundation International Award.
- 1979 Albert Lasker Award for Basic Medical Research.
- 1981 Upnahm in den Order of the Companions of Honour (CH).
- 1986 wurr Sanger vun Elisabeth II. in den Order of Merit (OM) upnommen, de sien regulär Liddmaatschap up blots 24 Personen begrenzt is.
- 1988 wurr Sanger korrespondeeren Liddmaat vun de Bayerische Akademie der Wissenschaften.[2]
- 1992 wurr in Cambridge dat nah Frederick Sanger nömmt Sanger Center grünnd, de dat Teel vun de Sequenzeeren un Utforschen vun dat minschlich Genom un Genomen vun anner Organismen hett.
- 1997 wurr de Afdeelen för Biochemie vun de Universität Cambridge wiedermaakt, in de Sanger bit 1962 arbeit harr. Neben dat „Hopkins-Huus“ gifft dat jetzt en tweet, dat „Sanger-Huus“.
Weblenken
[ännern | Bornkood ännern]- Sanger up de Sieden vun den Nobelpries 1958 (engelsch)
- Sanger up de Sieden vun den Nobelpries 1980 (engelsch)
- Wellcome Trust Sanger Institute
- Autobiographie
Enkeld Nahwiesen
[ännern | Bornkood ännern]- ↑ a b http://www.theguardian.com/science/2013/nov/20/dna-pioneer-fred-sanger-dies-genetics, DNA pioneer Frederick Sanger dies aged 95, Alok Jha, The Guardian, engelsch, van’ 20. November 2013, afropen an’ 22. November 2013
- ↑ http://www.badw.de/mitglieder/k_mit/index.html#s, Korrespondierende Mitglieder, Bayerische Akademie der Wissenschaften, afropen an’ 21. November 2013