Jeremy Teela
Jeremy Scott Teela (* 28. November 1976 in Seattle) is en ehmalger US-amerikaansch Biathlet. Jeremy Teela fung 1993 mit den Biathlonsport an un hörr siet 1997 to dat US-Natschonalteam. He is Sportsuldat un leevt in Heber City. Bit 2009 weer he mit de Biathletin Denise Teela verheiraadt. Sien Debüt in‘ Biathlon-Weltcup geev he 1997 bi en Sprint in Ruhpolding. Hööchtpunkte vun sien Weltcup-Karriere weern en Platz 10 in‘ Sprint in de Saison 2002/03 in Chanty-Mansijsk un en Platz 9 in‘ Sprint in de Saison 2000/01 in Pokljuka. Beid Platzeeren reck he bi de to glieker Tiet utdragen Biathlon-Weltmeesterschapen. Bi Weltmeesterschapen weer he van 1997 bit 2009 immer dorbi. 2002 in Salt Lake City un 2006 in Turin is he bi Olympisch Winterspelen antreeden. Bi de Spelen in sien Heimatland is he in all veer Rennen antreeden un keem in dat Eenzel up en gooden 14. Platz. In Sprint und Verfolgung reck he de Platzen 20 bzw. 23.
![](http://178.128.105.246/content-http-upload.wikimedia.org/wikipedia/commons/thumb/c/c5/Torino_2006_Jeremy_Teela_skiing.jpg/220px-Torino_2006_Jeremy_Teela_skiing.jpg)
Siet Midden vun de 2000er-Johren kunn Teela blots noch selten good Ergevnisse recken, Top-20-Resultate reck he lang Tiet nich mehr. In de Saison 2008/09 wunn he bit to de Weltmeesterschapen een mickrigen Punkt un wurr vun den Verband för den letzten Weltcup in Chanty-Mansijsk nich mehr nomineert. Teela reageer mit en Trotzreaktschoon un leep in da teerst Rennen nah de WM, en Eenzel in Vancouver-Whistler, achter den unverwachten Sieger Vincent Jay un Daniel Böhm up den darten Platz. Dormit reck he sien eerst Podiumsplatzeeren un sien dart Top-Ten-Resultat. In den Eenzel-Gesamtweltcup vun dat Johr reck dann dordör to Platz 27. Jeremy Teela nehm an de Olympisch Winterspelen 2010 deel. Sien best Resultat weer de 9. Platz in‘ Sprint. Mit de Staffel keem he up Rang 13.
In‘ Gesamtweltcup weer sien best Platzeeren an dat Enn‘ vun de Saison Platz 48 in de Saison 2002/03.