John Belushi
John Adam Belushi (* 24. Januar 1949 in Chicago; † 5. März 1982 in West Hollywood) weer en US-amerikaanschen Singer un Filmschauspeler vun albaansche Afkunft. He weer de Broder vun den Bluesmusiker un Schauspeler James Belushi.
Leven
[ännern | Bornkood ännern]John Belushi is in Wheaton (Illinois) opwassen. Al wiel sien Tiet op’n College hett he in Theaterstücken mitspeelt. Sien Talent as Komiker weer al to de Tiet to sehn, wat sik in Form vun Stand-up-Comedies wiest hett. Af End vun de 1970er Johren hett he tohopen mit Dan Aykroyd in de Musikband The Blues Brothers speelt. Belushi is USA-wiet bekannt worrn dör sien Optreden bi de Feernsehshow Saturday Night Live. Disse Comedyreeg weer för veele Schauspeler de Anfang vun jemehr Hollywood-Loopbahn.
Sien eerste Filmrull harr John Belushi 1978 in de Kummedie Animal House, man sien gröttsten Spood keem mit de Musik-Kummedie Blues Brothers vun Speelbaas John Landis. Mit den Film is he tohopen mit Dan Aykroyd to en Kultfigur worrn. Tohopen hebbt se nich blots in den beropen Film de Blues Brothers "Joliet" Jake un Elwood Blues speelt, man se geven ok Konzerten in de lieken Rullen. 1981 hebbt se en LP rutbrocht, worop se live as de Bluesbrothers de bekannten Leder ut den Film, un dorto en poor Bluesleder un egene Kompositschonen inspeelt hebbt. Belushi hett ok geern den bekannten Rythm ’n’ Blues-Musiker Joe Cocker namaakt un is sogor mol mit em tosamen optreden.
John Belushi hett lange Johren Drogen nahmen, wat em denn to’n Verhängnis worrn is. Na en düchtige Drogenparty is he 1982 in’n Öller vun blots 33 Johren in en Bungalow vun’t Chateau Marmont Hotel in West Hollywood an de Naklapp vun en Speedball (en Injekschoon vun Kokain un Heroin) dood bleven.
Dat Graff vun John Belushi liggt in’t Abel’s Hill Cemetery vun Chilmark, Martha’s Vineyard, Massachusetts. Sien Graffsteen hett de Inschrifft „I may be gone, but Rock and Roll lives on“, dat heet: „Ik mag woll gahn wesen, man Rock and Roll leevt wieter“. He leet sien Fro Judy Jacklin torüch.
Filmografie (Utwahl)
[ännern | Bornkood ännern]Johr | Titel | Synchroonsnacker |
---|---|---|
1975-79 | Saturday Night Live, Feernsehreeg | |
1975 | Tarzoon, la honte de la jungle; Tekentrickfilm, Stimm dt.: Schande des Dschungles |
|
1978 | Animal House dt.: Ich glaub mich tritt ein Pferd |
Wolfgang Pampel |
1978 | Goin’ South dt.: Der Galgenstrick |
Wolfgang Pampel |
1979 | 1941 dt.: 1941 – Wo bitte geht’s nach Hollywood |
Manfred Lehmann |
1980 | The Blues Brothers dt.: Blues Brothers |
Rainer Basedow |
1981 | Neighbors dt.: Die Verrückten Nachbarn |
Rainer Basedow |
1981 | Old Boyfriends dt.: Meine alten Freunde |
Gerd Potyka |
1981 | Continental Divide dt.: Zwei wie Katz und Maus |
Manfred Lehmann |
Utteken
[ännern | Bornkood ännern]In sien korte Tiet, de he aktiv wesen kunn is John Belushi liekers för eenige Priesen nomineert wesen un hett twee Priesen ok wunnen:
- 1977: den Emmy in de Kategorie Best Dreihbook in en Kumemdie oder Musik-Serie för Saturday Night Live.
- 2004: sien Steern op’n Walk of Fame.
Literatur
[ännern | Bornkood ännern]- Woodward, Bob: Überdosis. (Belushi-Biografie). Hannibal-Verlag, 1986, ISBN 3-85445-026-5
Weblenken
[ännern | Bornkood ännern]![](http://178.128.105.246/content-http-upload.wikimedia.org/wikipedia/commons/thumb/4/4a/Commons-logo.svg/20px-Commons-logo.svg.png)
- John Belushi in de Internet Movie Database (engelsch)
- Bild vun Belushis Graffsteen