Pius III.
![](http://178.128.105.246/content-http-upload.wikimedia.org/wikipedia/commons/thumb/9/95/PiusIII.jpg/170px-PiusIII.jpg)
Pius III., börgerlich Francesco Todeschini Piccolomini (* 29. Mai 1439 in Siena; † 18. Oktober 1503 in Rom), weer van' 22. September 1503 bit 18. Oktober 1503 Paapst vun de röömsch-kathoolsch Kark.
Herkunft
[ännern | Bornkood ännern]Francesco Todeschini Piccolomini wurr in de Toskana as tweet Söhn vun den Juristen Giovanni de Todeschini un de sien Ehfru Laodomia Piccolomini, de en Süster vun Paapst Pius II. weer, boren. Bit hüüd gifft dat en Striet tüschen de italieensch Gemeenden Pienza, Siena un Sarteano doröver, welker vun de de Gebortsoort vun den Paapst is. De Mehrheit vun de historsch Borns geiht aber vun Siena ut.
Francesco Todeschini Piccolomini harr fiev Bröers un twee Süsters. All frö harr he de Gunst vun sien Unkel, den lateren Paapst Pius II. De förder sien in bescheeden Verhältnissen upwussen Neffen dör en good Uptrecken un harr för hüm en geistlich Loopbahn vörsehn.
Klerikale Karriere
[ännern | Bornkood ännern]Francesco Todeschini Piccolomini studeer in Wien un Perugia Rechtswetenschapen. He hett sien Studium mit den akademischen Grad vun en Dr. jur. can. in Perugia afslooten. Sien Unkel Papst Pius II. hett hüm nah sien Paapstwahl to'n Domherrn in Siena un 1459 to'n Bischof vun Siena benömmt. An' 5. März 1460 hett hüm Paapst Pius II. to'n Kardinal beropen.
Wiels de Reis vun Paapst Pius II. to dat Bekanntgeven vun den plaanten Törkenkrüüztoog (1464) weer Francesco Todeschini Piccolomini mit de Verwalten vun den Karkenstaat betroot. Dör de Kuntakte in Wien un fördert vun sien Unkel Pius II. hett he de düütsch Spraak lehrt. Dat sull sien Loopbahn in de Kurie entscheedend beleven, un so geev dat völ bruukbor Kuntakte to Düütschland un to de Habsburger. So weer he nah den Dood vun sien Unkel ünner de Pontifikat vun de Paapsten Paul II., Sixtus IV. un Innozenz VIII. mehrfack en Vertreder vun düütsch Interessen in de Kurie ween. De Lüüd ut sien Tiet hemm hüm dorüm ok den Protector Nationis Germanicae nömmt.
1471 reis he as päpstlicher Legat to'n Rieksdag nah Regensburg, wo ehe völ olt Kuntakte upfrischen kunn, ünner annern ok to de Habsburger. 1494 führ hüm en diplomaatsch Mission an den Hoff vun König Karl VIII. vun Frankriek.
Francesco Todeschini Piccolomini weer en grooten Kunstfrüend un Mäzen. So hett he in' Juni 1502 Michelangelo dormit beupdragt, 15 Statuen för den Dom vun Siena to schaffen.
Pontifikat
[ännern | Bornkood ännern]![](http://178.128.105.246/content-http-upload.wikimedia.org/wikipedia/commons/thumb/6/64/C_o_a_Pio_II.svg/170px-C_o_a_Pio_II.svg.png)
An' 22. September 1503 wurr he dör dat Konklave to'n neen Paapst wählt. De Naam Pius III. hett he in' Andenken an sien Unkel wählt. Paapst Pius III. stunn över de strieden Parteien un kann as bewusst wählt Övergangskandidat ansehn wurrn; todem hett he an Gicht leeden un sien labile Gesundheit leet en kört Pontifikat verwachten – womit de Kardinäle recht behollen sullen. De franzöösch Hoff harr völ dorför ünnernommen, dat de franzöösch Kardinal Georges d’Amboise to'n Nahfolger vun Alexander VI. wählt wurr. Achterdreven wurr de Wahl aber dör den Kardinal Ascanio Sforza, de in' Interesse vun de italieensch Herrscherfamilie Sforza weder en Paapst vun franzöösch Afstammen wull, noch en Interesse doran harr, dat de Italiener Giuliano della Rovere as nee Paapst ut dat Konklave hervörgung.
All an' 13. Oktober 1503 weer Pius III. aber an sien Bett bunnen, he wurr vun de Gicht piesackt un kun sien Amt nich aktiv utööven. An de Folgen vun de Gicht is he denn ok an' 18. Oktober 1503 storven. Wiel sien Pontifikat bannig kört weer, keemen Gerüchte up, dat de Paapst vergift wurrn weer, ut hüdig Sicht is dat aber woll nich so.
Pius III. hett sück dör sien persönliche Integrität scharp vun eenig vun sien Vörgänger afhaben. Mit sien Wahl keemen berechtigt Haapnungen up, dat he en Reform vun de Kark an Kopp un Gleeder inleiden kunn. Aber sien Wahl keem för hüm to laat. In sien blots 26 Daag düern Pontifikat kunn he de Kark kien entscheeden Wennen geven.
He funn sien letzt Ruhe neben Paapst Pius II. in Sant’Andrea della Valle.
Literatur
[ännern | Bornkood ännern]- Matteo Sanfilippo: Pio III In: Massimo Bray (Hrsg.): Enciclopedia dei Papi, Istituto della Enciclopedia Italiana, Band 3 (Innocenzo VIII, Giovanni Paolo II), Rom 2000, OCLC 313581724, S. 22–31 (italieensch).
- Christof Dahm: Pius III.. In: Biographisch-Bibliographisches Kirchenlexikon (BBKL). Band 7, Bautz, Herzberg 1994, ISBN 3-88309-048-4, Sp. 661–664.
Weblenken
[ännern | Bornkood ännern]- Indrag in de Catholic Encyclopedia, Robert Appleton Company, New York 1913 (engelsch)
- DNB-Katalog
- Indrag to Pius III. up catholic-hierarchy.org (engelsch)
Vörgänger | Amt | Nafolger |
Alexander VI. | Paapst 1503 |
Julius II. |