Schaamhoor
![](http://178.128.105.246/content-http-upload.wikimedia.org/wikipedia/commons/thumb/e/e4/Female_pubic_Hair_%28natural%2C_untrimmed%29_01.jpg/200px-Female_pubic_Hair_%28natural%2C_untrimmed%29_01.jpg)
As Schaamhoor (lat.: Pubes) warrt de Hoor betekend, de bi Froens- un Mannslüüd an de Geslechtsdelen un de Rebeden ümto wasst. Dat Wassdom vun de Schaamhoor as Deel vun de Liefhoor fangt an, wenn dat mit de Pubertät losgeiht. Dat warrt dorüm ok as sekundäär’t Geslechtsmarkmol ansehn. Dat Tohopenfallen vun das Wassdom vun de Schaamhoor un dat Woort Pubertät is nich tofällig. Beids leidt sik vun dat latiensch pubes af, wat „Schaam“ bedüüdt.
Struktur
[ännern | Bornkood ännern]De Schaamhoor sünd tomeist starker un düsterer as de Kopphoor, man bi Swatt-, Root- oder bannig Hellblondhoorte sünd de faken ok vun lieke Klöör. Bi de Europäers sünd Schaamhoor faken krüllt oder krüselig, bi Afrikaner düchtig eng krüselt un bi Asiaten un de amerikaanschen Oorinwahners mehr glatt un anliggend. Ok de Dicht vun dat Hoor un woneem se överall wassen doot hangt vun de Gene af, dat is dorüm ok teemlich ünnerscheedlich. Aver de Hoor, de na achtern rut üm den Mors wassen doot, warrt nich mehr to de Schaamhoor rekend.
Sinn
[ännern | Bornkood ännern]Bioloogsch sehn, hebbt de Schaamhoor den lieken Sinn as de Hoor ünner de Arms, un schüllt de Verdunsten vun Sekreten ut de Ruchdrüsen föddern, de för den geslechtstypschen Liefruch in’t Schaam- un Liestenrebeet goot is. Dat is seker noch wat ut de Vörtiet vun de minschlich Entwickeln, as de Ruch – as bi nichminschlich Primaten un annere Söögdeerten ok vundaag noch – en gröttere Bedüden harr. Bito schuult se ok gegen Frömdkörpers un Krankmakers, un regelt gliektietig ok de Warms.
Utprägen
[ännern | Bornkood ännern]Schaamhoor fangt mit de Pubertät an to wassen, dat is bi Deerns ungefäähr af dat teihnte Levensjohr, bi Jungs üm dat twölfte rüm. De Hoor verdeckt de buteren (groten) Schaamlippen un den Venusbult. Bi Froenslüüd sütt de Form vun dat Hoor as en op’n Kopp stahnd Dreeeck ut. Bi Jungs wasst de Schaamhoor op den Klötensack un üm de Peniswörtel rüm. De Form sütt bi Mannslüüd mehr ut as en Trapez, aver de Hoor wasst manchmol ok in en grade Lien na’n Buuknavel hooch. Je na geentsch Anlaag kann sik dat Hoor bit na’n Mors utbreden.
Kulturell Bedüden
[ännern | Bornkood ännern]Schaamhoor warrt vundaag vör allen bi de jüngeren Lüüd ut hygiensch oder kleedsom Grünnen wegmaakt.
In verscheeden öllere Kulturen in de Süüdsee, Afrika (Pygmäen) un Melanesien staht de Schaamhoor as Teken för Fruchtborkeit un dorvör, dat een nu heiraden kann[1]. Ok in Japan gellt veel Schaamhoor bi Froen as Teken för Wieflichkeit. Froen mit wenig Schaamhoor dergt dor mitünner sogor Prüken ut Kopphoor, de in Japan as „Bloom vun de Nacht“ begäng sünd[2].
In annere Kulturen, as t. B. ’n Islam, gellt Schaamhoor dorgegen as unhygiensch un warrt wegmaakt. De Reinlichkeit weer ok de Hööftgrund, dat in’t Middelöller in Europa ok faken de Schaamhoor wegmaakt weern. Hüüt steiht aver mehr dat ästhetsch Geföhl in’n Vördergrund, wat to dat Verbreden vun’t Schaamhoorwegmaken föhrt hett.
Bornen
[ännern | Bornkood ännern]- ↑ Das Geschlechtsleben der Wilden in Nordwest-Melanesien von Bronisław Malinowski
- ↑ Margarete Payer: Internationale Kommunikationskulturen. -- 10. Kulturelle Faktoren: Kleidung und Anstand. -- 4. Teil IV: Körpergestaltung. -- Fassung vom 13.05.2001