Tudorroos
![](http://178.128.105.246/content-http-upload.wikimedia.org/wikipedia/commons/thumb/3/3f/Tudor_Rose.svg/220px-Tudor_Rose.svg.png)
De Tudorroos is dor en Teken för, dat de beiden engelschen Hüser Huus Lancaster un Huus York in dat Huus Tudor tohopengahn sünd.
Na de Slacht vun Bosworth Field hett de engelsche König Richard III. ut dat Huus York de Slacht, sien Leven un de Kroon verloren an Heinrich Tudor. Dat weer de Anföhrer vun de Partei vun dat Huus Lancaster. Man Heinrich is denn süms König wurrn un hett dor de Rosenkriegen mit to Enne bröcht. As engelschen König hett he dat Huus Tudor up den Throon föhrt, wo dat bit 1603 bleven is. Heinrich Tudor hett den Naam Heinrich VII. annahmen.
De witte Roos weer dat Teken vun dat Huus York un de rode Roos stünn för dat Huus Lancaster. De Tudorroos föögt nu beide Rosen tosamen: En rode Roos, in'e Midden witt.
De Tudoorroos is ok hüdigendags noch en Teken för England. Se is in dat Wapen vun dat Vereente Königriek to sehn un ok in dat Wapen vun Kanada.