Uwe Barschel
![](http://178.128.105.246/content-http-upload.wikimedia.org/wikipedia/commons/thumb/b/b4/Bundesarchiv_B_145_Bild-F065018-0011%2C_Bonn%2C_Konferenz_der_Ministerpr%C3%A4sidenten_cropped.jpg/250px-Bundesarchiv_B_145_Bild-F065018-0011%2C_Bonn%2C_Konferenz_der_Ministerpr%C3%A4sidenten_cropped.jpg)
Uwe Barschel (* 13. Mai 1944 in Glienicke/Nordbahn; † in de Nacht vun’n 10. to’n 11. Oktober 1987 in Genf) weer en düütschen Politiker vun de CDU. Vun 1982 bit 1987 weer he Ministerpräsident vun dat Bundsland Sleswig-Holsteen. As dat bi den Wahlkampf to de Landdagswahl en groten Schandaal geven hett, de later as Barschel-Affäre bekannt wurrn is, dor möss he Bott geven. Korte Tied later is he an’n 11. Oktober in dat Hotel Beau-Rivage in Genf funnen wurrn. He lä doot in’e Balje. De Umstänn vun sien Dood sünd bit up den hüdigen Dag nich ganz klaar.
Leven un Politik
[ännern | Bornkood ännern]Uwe Barschel is in Börnsen bi Hamborg upwussen. He hett bi siene Grootöllern leevt. Vun 1971 af an weer he Afkaat. Al 1960 is he Liddmaat wurrn bi de Junge Union, twee Johr later keem he to de CDU. Vun 1967 bit 1971 weer he Vörsitter vun de Junge Union in Sleswig-Holsteen un vun 1969 af an weer he Vieze vun de CDU in düt Bundsland.
Vun 1971 bit to sien Dood 1987 höör he to’n Landdag in Sleswig-Holsteen. 1979 is he dor Finanzminister wurrn. As Ministerpräsident Gerhard Stoltenberg 1982 as Bundsfinanzminister na Bonn gahn is, dor is Barschel wählt wurrn to’n Ministerpräsidenten. Mit 38 Johren weer he de jungste Ministerpräsident in de Geschicht vun de Bundsrepublik Düütschland.
Uwe Barschel weer vun den 7. Juli 1973 af an mit Freya von Bismarck verheiraat un de beiden hefft veer Kinner mit'nanner harrt.
Waterkant-Affaire
[ännern | Bornkood ännern]De Waterkant-Affäre weer en vun de gröttsten Schandalen in de Düütsche Politik na den Tweten Weltkrieg.
De Medien-Raatgever vun Uwe Barschel, Reiner Pfeiffer, vertell dat Düütsche Wekenblatt „Der Spiegel“, dat he in Barschel sien Updrag den sien politischen Gegenspeler, Björn Engholm vun de SPD utkunkeluurt harr. De scholl Stüern an dat Finanzamt vörbi schummelt hebben. Ok scholl he Afhöörappraten in Barschel sien Telefon inboot hebben, vunwegen dat Barschel de Schuld dorför denn de SPD geven woll. Nadem de Spiegel düsse Saken rutbröcht hett, hett de CDU de Wahlen in Sleswig-Holsteen verloren. An’n 2. Oktober 1987 möss Barschel denn Bott geven.
Wat bi later Unnsersöken rutkamen is
[ännern | Bornkood ännern]En paar Johr later is bi de Unnersöken vun de Schuuvlaad-Affäär rutkamen, dat ok Björn Engholm nich de Wohrheit seggt harr. Sünnerlich is rutkamen, dat Engholm fröher, as he togeven harr, wat wußt hett vun Kontakten vun Reiner Pfeiffer mit Lüde vun de SPD. So hett dat för düsse tweete Affäre wedder en Utschuss geven, de de Sake unnersöken möss. Dorbi möss meist allens, wat vördem rutkamen weer, torüchnahmen weern. Staatsanwalt un Utschuss menen nu, an de Wohrheit vun dat, wat Pfeiffer as „Kroontüge“ vertellt harr, dat geev dat grundsätzlichen Twiefel an. Amenne hett de Utschuss faststellt, dat dat keen Bewiesen dorför geven dö, dat Barschel vun dat, wat Pfeiffer maken dö, överhaupt wat afwüss. Ok nich, dat Barschel dat goot fünn oder dat he de Sake sogor in Gang bröcht harr. Man dat möss nu doch faststellt weern: As dat gegen Barschel güng, dor hett he siene Mitarbeiders nödigt, se schollen verkehrte Utsagen maken, ok unner Eed.[1]
Dood
[ännern | Bornkood ännern]An’n 11. Oktober 1987 hefft twee düütsche Journalisten vun dat Wekenblatt „Stern“ Barschel dood funnen. He lä, vullstännig anplünnt, in en Balje vull Water in Kamer 317 vun dat Hotel „Beau-Rivage“ in Genf. In sien Bloot is dat Slaapmiddel Lorazepam funnen wurrn. Man ok na 20 Johren kann nich faststellt weern, ob sik dat bi sien Dood üm Moord oder um Sülvstmoord hanneln dö. Dat is an un for sik unmööglich, sik bloß mit dat Middel Lorazepam üm to bringen. Man dat sünd nu ok Sporen vun 7 annere starke Slaapmiddels funnen wurrn, dormank ok Barbituraten.
Moordtheorien
[ännern | Bornkood ännern]In Victor Ostrovsky sien Book 'Mossad, de keerzijde van de oorlog' („Mossad, de annere Siet vun’n Krieg“) ISBN 90-410-0015-1, warrt seggt, dat de Geheemdeenst vun Israel, de Mossad, Barschel an de Siet bröcht harr. He woll, meent Ostrovsky, Barschel dor vun afhollen, dat he vun de Geschäften mit Wapen twuschen Israel un den Iran wat vertellen dö.
Belegen
[ännern | Bornkood ännern]- ↑ Afslussbericht vun den Utschuss to'n Unnersöken vun de Affäär: http://www.landtag.nrw.de/portal/WWW/dokumentenarchiv/Dokument?Id=QQD13/3225 (pdf, 38 MB)
Theodor Steltzer | Hermann Lüdemann | Bruno Diekmann | Walter Bartram | Friedrich Wilhelm Lübke | Kai-Uwe von Hassel | Helmut Lemke | Gerhard Stoltenberg | Uwe Barschel | Henning Schwarz | Björn Engholm | Heide Simonis | Peter Harry Carstensen | Torsten Albig | Daniel Günther