Meanderbord
![](http://178.128.105.246/content-http-upload.wikimedia.org/wikipedia/commons/thumb/9/9a/Women_altar_MGEt_Inv34585.jpg/220px-Women_altar_MGEt_Inv34585.jpg)
Meanderbord eller berre meander er i kunst og arkitektur eit mønster eller ornament forma av liner som slynger seg i rette vinklar, mykje nytta i antikk kunst og arkitektur. Då ornamentet finst i stor mon på antikk gresk keramikk, vert det ofte òg kalla à la grecque, fransk for på gresk vis, sjølv om meander-ornamentet une grecque i fransk samanheng seiast å skilja seg i detaljane frå det som på fransk kallast meander (méandre).
Meanderen fekk eit nytt liv under stilretninga nyklassisismen, som gjorde seg gjeldande i Europa på slutten av 1700-talet og byrjinga av 1800-talet.
Nemninga meander har opphav i namnet på den sterkt slynga elva Menderes eller Büyük Menderes, antikkens Maiandros (latin: Mæander) i Anatolia i Tyrkia. Men det er ikkje sjølvsagt at nett denne elva er opphavet til sjølve mønsteret, då liknande slyngande mønstre er å sjå på gjenstandar frå yngre steinalder og bronsealderen andre stader i Europa.