Patrick Henry
Patrick Henry | |||
| |||
Fødd | 29. mai 1736 Hanover County | ||
---|---|---|---|
Død | 6. juni 1799 (63 år) | ||
Statsborgar av | USA | ||
Yrke | politikar, advokat, skribent | ||
Mor | Sarah Winston Syme Henry | ||
Far | John Henry | ||
Ektefelle | Sarah Shelton Henry, Dorothea Dandridge Henry | ||
Barn | John Henry, of Red Hill | ||
Alle verv |
Patrick Henry (29. mai 1736–6. juni 1799) var ein amerikansk politikar og fridomskjempar. Henry var son av ein skotsk utvandrar og i 1760 vart han sakførar i heimstaten Virginia. I dette embetet utmerka han seg snøgt som ein dugeleg orator, og skapte seg eit omdøme ved å forsvare skattebetalarane sine interesser i ein rettssak om løningar for prestestanden. I 1765 vart han medlem av den lovgjevande forsamlinga Virginia, og som ein uforsonleg motstandar av den såkalla stempellova, som var ei britisk skattlegging av koloniane, vart han snart leiar for forsamlinga. Det var etter initiativ frå Patrick Henry at den lovgjevande forsamlinga i Virginia fordømde skattlegging utan politisk representasjon som eit trugsmål mot koloniane sin fridom.[1]
Henry gjekk saman med Thomas Jefferson inn for at dei tretten koloniane skulle stå saman i opposisjon til Det britiske imperiet, og Henry spelte ei viktig rolle på kongressen i Philadelphia i 1774 som representant for Virginia. I 1775 føreslo han at Virginia laut opprette ein hær og bu seg på militær konfrontasjon, og heldt i denne samanhengen ein vidgjeten tale han runda av med orda Give me Liberty or give me Death! (no. gjev meg fridom eller gjev meg døden!). I 1776 vart han vald til den fyrste guvernøren av Virginia, og sat seinare ein andre periode i embetet.
Under striden om forfatninga av delstatane i 1788 gjekk Henry inn for dei einskilde statane sine rettar, men tok i sine seinare år eit meir føderalistisk standpunkt.
Kjelder
[endre | endre wikiteksten]- «Patrick_Henry» i Store norske leksikon, snl.no.
- Denne artikkelen baserer seg heilt eller delvis på det danske Salmonsens konversationsleksikon 2. utgåve (1915–1930).
Fotnotar
[endre | endre wikiteksten]- ↑ Keith W. Olson, red. (ca. 1982). An outline of American history. U.S. Information Service. s. 28.
![Spire](http://178.128.105.246/content-http-upload.wikimedia.org/wikipedia/commons/thumb/a/af/P_history.png/20px-P_history.png)