Jour d'la Libéthâtion
Ch't' articl'ye fut c'menchie en Jèrriais
|
Lé Jour d'la Libéthâtion ( Jour d'la Libéthâtion) dans des pays est eune fête pouor mèrtchi la libéthâtion du pays d'un otchupant.
En Jèrri et en Dgèrnésy nou fête la libéthâtion des Îles d'la Manche en 1945.
Ès Îles Falkland nou fête la libéthâtion d'l'otchupâtion des forches Argentinnes (14 d'Juîn 1982).
Au Liban l'Jour d'la Libéthâtion l'25 d'Mai fête la fîn en 2000 d'l'otchupâtion du Sud du pays par l'Israël.
En Jèrri
[amendaer | modifier le wikicode]![](http://178.128.105.246/content-http-upload.wikimedia.org/wikipedia/commons/thumb/1/19/Libethes_inscription_St_Helier%2C_Jersey.jpg/220px-Libethes_inscription_St_Helier%2C_Jersey.jpg)
Lé Jour d'la Libéthâtion (9 d'Mai) est, s'lon l'Bailli et bein d'aut's, la journée nâtionnale dé l'Île même si l'jour n'a pon 'té dêcliathée d'même. D'pis l'înnaudguthâtion d'la Pièche d'la Libéthâtion en 1995 (chînquantchième annivèrsaithe d'la Libéthâtion), chutte pièche a 'té quâsiment un thiâtre pouor la ramémouaith'thie d's êvénements d'1945.
Ch'est en tchi ayant ouï l'annonche sus l'radio par Winston Churchill qué "nos chiéthes Îles d'la Manche sont étout pouor êt' libéthées aniet" lé 8 d'Mai, lé monde espéthaient l'arrivée des soudards Britanniques.
Quand les soudards d'sembèrtchîtent lé matîn du 9 d'Mai nou haûlîndgit la couleu d'la f'nêt' dé l'Office du Hâvre épis à l'Hôtel Pomme d'Or endrait. Ch'est chutte haûlîngu'thie tch'est rapp'lée dans la stchulptuthe d'la Libéthâtion dans la pièche au jour d'aniet, et châque année des soudards èrprésentent l'arrivée et la haûlîngu'thie dans l's unniformes du temps pâssé.
Lé Bailli fait un discours dans la pièche et y'a un sèrvice d'Actions d'Grâces auve lé Douoyen d'Jèrri et l's èrprésentants d'aut's églyises et fouais d'Jèrri.
Eune pathade dé soudards et d'vièrs boulants finnit la partie officielle d'la journée. Les célébrâtions en Jèrri n'ont pon 'té si jouaiyeuses avaû l's années qu'en Dgèrnésy mais à ches drein nou-s'a tâchi d'ajouôter un festival l'arlévée du Jour d'la Libéthâtion auve d'la musique, des fricots et un thème des années 1940.
-
Les couleurs haûlîndgies en 2006 à l'Office du Hâvre à Saint Hélyi
-
Eune pliaque tchi raconte l'histouaithe des couleurs
-
Eune partie d'la pathade militaithe en 2007 - des soudards et soudards r'tithés en unniformes dé 1945
-
Eune partie d'la pathade militaithe en 2007 - d'l'êtchipage du navithe d'la Reine Tyne
En Guernési
[amendaer | modifier le wikicode]Ès Îles Falkland
[amendaer | modifier le wikicode]Lé 14 dé Juîn 2007 y'eut un sèrvice dans la cathédrale dé Port Stanley pouor mèrtchi l'vîngt-chîntchième Jour d'la Libéthâtion. Messire Rex Hunt, Gouvèrneux des Falklands à chu temps-là, et l'Comte dé Ouessex y 'taient. Y'eut eune pathade en ville auprès.