Oxford
Ch't' articl'ye fut c'menchie en Jèrriais
|
![](http://178.128.105.246/content-http-upload.wikimedia.org/wikipedia/commons/thumb/1/11/Oxford_-_Oxfordshire_dot.png/220px-Oxford_-_Oxfordshire_dot.png)
Oxford est eune ville en Angliétèrre. S'lon lé r'censement d'2001 la ville a eune populâtion d'134,248 pèrsonnes.
Histouaithe
[amendaer | modifier le wikicode]L'histouaithe d'la ville est coumme chennechîn: au 8e siècl'ye Sainte Frideswide êtablyit san monastéthe auprès d'la plianque au boeu ("Oxenaforda" - où'est qu'les boeux crouaîsaient la Riviéthe dé Londres). Au 10e siècl'ye la ville 'tait d'împortance militaithe sus la frontchiéthe entré les rouoyaumes dé Mèrcie et d'Wessex.
I' sembl'ye qu'des êtudgiants lus assembliaient dans la ville d'vant l'12e siècl'ye - v'là tch'est l'originne d'l'Unnivèrsité d'Oxford. Oxford fut la preunmié ville unnivèrsitaithe en Angliétèrre. Les preunmié collèges fûtent fondés au 13e siècl'ye. L'églyise du monastéthe dé Frideswide dévînt la cathédrale tch'est au tchoeu du collège Christ Church.
En 1258 un parlément à Oxford oblyigit l'rouai d'atchilyi l'pouver des barons.
En 1355 à la Saint Scolastique y'eut du hèrtchîn entre les villais et l's êtudgiants. La meunicipalité eut à r'nonchi des drouaits en faveu d'l'unnivèrsité tch'avait du gouvèrnément dé sé.
En 1642, l'Rouai Charles II fit d'la ville sa capitale duthant la Dgèrre Civile Angliaîche. Lé Parlément Angliais (ou pustôt la partie louoyale au rouai) assembliait là 1644-1645. L'Parlément r'vînt à Oxford pouor raîque eune s'maine en 1681.
Au 19e siècl'ye Oxford 'tait l'lieu d'ardguments r'ligieurs entouor l'Anglio-Catholicisme et l'êvolution.
Au 20e siècl'ye, l'îndustrie arrivit à Oxford. L'înmprînm'thie avait fait du conmèrce dans la ville d'pis longtemps, mais William Morris (pus tard l'Vicomte Nuffield) êtablyit eune mannifactuthe dé vaituthes à l'Êst d'la ville dans l'quartchi d'Cowley. Pouor l's années 1970 dans les 20,000 ouvrièrs travaillaient dans les mannifactuthes d'la ville.
La Polytechnique d'Oxford dévînt l'Unnivèrsité d'Oxford Brookes en 1991 - la deuxième unnivèrsité d'la ville.
Tchultuthe
[amendaer | modifier le wikicode]La littéthatuthe à Oxford est r'présentée par Lewis Carroll, C. S. Lewis, J. R. R. Tolkien et d'aut's.
La Holywell Music Room est la pus vielle salle dé concèrt en Angliétèrre. La musique des chapelles et des collèges d'Oxford est fanmeuse.
Lé Musée Ashmoléen est l'pus vièr musée publyi en Grande Brétangne.
La Riviéthe dé Londres a nom Isis à Oxford, et la riviéthe Cherwell coule dans l'Isis à Oxford étout. La nag'gie d'batchieaux à nagi est un sport hardi populaithe à Oxford, sustout auve l's êtudgiants. Pouor lé ji, nou nage des bachots avaû les riviéthes.