Watty Vos
Edgar Joaquin (Watty) Vos (☆ 16 di augustus 1937 na Oranjestad - † 6 di januari 2001 na Houston) tabata un politico Arubiano. E tabata minister di Husticia y Salubridad di 1986 te 1989 y minister di Husticia y Obra Publico di 1994 te su fayecimento dia 6 di januari 2001. Previamente e tabata minister di Antias Hulandes i vicepremier den Gabinete Evertsz di 1973 pa 1975.
Biografia
[editá | editá fuente]Watty Vos a nace dia 16 di augustus 1937, na Weststraat 16 den Rancho, un bario historico di Oranjestad. E tabata e di 4 for di 5 yiu di e pareha Salomon y Genoveva Vos-Tromp.[1] Como studiante Watty a bay St. Dominicus College. Despues di caba MULO na 1955 ela drenta servicio di Teritorio Insular di Aruba.[2][3] Vos a continua studia, obteniendo su diploma di adjunct-commies y abogado na 1970.
Den añanan 1950 y 1960 Vos tabata activo den deporte di futbol. E tabata hungado y miembro di directiva di SV Aruba Juniors y internacionalista den e seleccionnan tanto di Aruba como Antias. E tabata forma parti di e seleccion Antiano dia e seleccion a gana na Cuba e medaya di plata despues di Costa Rica y tambe ora el a logra medaya di plata despues di Mexico durante di e Weganan Centroamericano y di Caribe na Puerto Rico.[1]
Na 1993 Vos a casa cu Tibizay Ureña y hunto nan tin dos yiu. El a fayece dia 6 di januari 2001 na edad di 63 aña den un hospital na Houston (Merca). Pa mas di tres aña e tabata sufri di e efectonan di cancer limfatico. Como minister den funcion ela ricibi e honor di un entiero estatal.
Carera politico
[editá | editá fuente]Na aña 1971 Vos ta debuta den politica. E tabata co-fundador di partido MEP, pa cual partido e ta wordo elegi miembro di Conseho Insular na 1971 y miembro di Parlamento di Antias Hulandes na 1973. Di december 1973 te december 1975 e tabata Minister di Husticia y Vice Premier di Antias Hulandes den Gabinete Evertsz, sigui pa diputado di Colegio Ehecutivo di Aruba y alabes miembro di conseho Insular di mei 1976 te februari 1977.[1]
Despues di bandona partido MEP na 1977 Watty Vos ta funda y lidera partido RUBA, cual den eleccion di 1979 ta obtene dos asiento den conseho insular di Aruba. Na 1982 RUBA ta uni cu AVP, partido cu Vos ta keda miembro te su fayecimiento. Vos tabata miembro di Conseho Insular di 1977 te 1985. Desde prome di januari 1986 te 8 di februari 1989 ela fungi como Minister di Husticia di Aruba den Gabinete Henny Eman I y desde prome di september 1994 te 6 di januari 2001 como Minister di Husticia y Obra Publico den Gabinetenan Henny Eman II y III. Entre februari 1989 y september 1994 e tabata miembro di Parlamento di Aruba.
![](http://178.128.105.246/content-http-upload.wikimedia.org/wikipedia/commons/thumb/0/0e/Police_School_Aruba.jpeg/220px-Police_School_Aruba.jpeg)
Honor
[editá | editá fuente]Vos a wordo condecora como Cabayero ("Ridder") den Orden di Leon Hulandes na 1980 y a promove na 1990 pa Comendador ("Commandeur") den Orden di Oranje-Nassau. E scol di polis na San Nicolas den bario di Lago Heights, funda na 1975 pa Watty Vos, ta carga su nomber "Politie Opleidingsinstituut Edgar Joaquin (Watty) Vos".
Fuente, nota i/òf referensia
|