Cristołozia
![](http://178.128.105.246/content-http-upload.wikimedia.org/wikipedia/commons/thumb/4/4d/Michelangelo_Caravaggio_053.jpg/220px-Michelangelo_Caravaggio_053.jpg)
La Cristologia la xe la parte de la teologia cristiana che la studia e defenise la natura de Gesù Cristo e la so relasion co Dio Padre e Dio Spirito Santo. La Cristologia la se ga interesa sora-de-tuto a:
- la natura de Gesù, se umana, divina, o tute e do le cose.
- la relasion del Gesù storico – natura umana – co Dio – realtà spirituale.
- el ruolo de Gesù Cristo inte la redenzione del genere umano.
La Cristologia la se ga svilupà inte i primi secoli del cristianeximo par rispondare a le eresie s la natura de Gesù. En modo particolare quele de Ario e de Eutiche. La Cristologia clasica la xe stà aprovà da vari concili ecumenici. I teologi i studia oncora ogi la natura e l’inportansa de Gesù Cristo.
Dispute cristologiche
[canbia | canbia el còdaxe]I vangeli canonici, quei ch ei xe stà aprovà da la Cexa de i primi secoli, i parla de Gesù Cristo e i fa de le afermasioni, ma i no dixxe tuto e i lasa spasio a la discusion teologica. En te i primi secoli del cristianesimo, varie teorie so Gesù le xe vegnù fora e le risciava de spacar la Cexa. Par metar fin a le dispute, i vescovi i sa catà in vari concili ecumenici par studiar el problema e vegnar fora co na dotrina unica so Gesù Cristo. Le eresie pi inportanti le xe stà:
- Ebionismo. El movimento ebionita el xera on movimento giudeo-cristiano del II secolo. El cosinderava Gesù come on profeta, ma sensa considerarlo divino.
- Docetismo. I sostenitori de sta corente teologica i dixea che Gesù el senbrava n’omo, ma el xera na proiesion umana de on esare divino. SO la croxe a morir saria stato Simone de Cirene, dopo che Gesù el se sa trasformà par no farse riconosare da le guardie.
- Adozionismo. Alcuni i pensava che Gesù el xe nato omo e el xe stà adotà da Dio chel ga dato la natura divina al batesimo in tel Giordano.
- Modalismo. Secondo i modalisti, la Trinità no la xe formada da tre persone. Dio el xe uno e el se manifesta in tri modi diversi. Così che Gesù el saria solo che na manifestasion de Dio.
- Arianesimo. Ario (256 – 336) el xera on prete chel ga scrito varie opere par dimostrar che Gesù el xe sta creà da Dio co na natura divina. Gesù nol pol esar consustansiale (de na stesa sostansa) col Padre. Gesù el saria sotomeso al Padre e inferiore a lu.
- Apolinarismo. La teoria de l’apolinarismo la xe stà eleborà da Apollinare di Laodicea (ca 310 – 390) basandoxe so la antropologia aristotelica. Gesù el saria omo e Dio, ma la natura umana la saria inconpleta. La natura divina la saria la so anima rasionale.
- Nestorianesimo. Nestorio (ca 381 - ca 451) el dixea che Gesù el ga do nature e do persone che le xe unie da na unoin morale.
- Monofisismo. Eutiche (ca. 378 - 454) el sostegnea che in Gesù se cata na sola natura, quela divina, che la ga asobio la natura umana (mòne phýsis).
I grandi Concili ecumenici
[canbia | canbia el còdaxe]La Cexa Catolega la ga reagì a ste teorie ciamando i concili ecumenici, che vol dir co i rapresentanti de tute le Cexe locali de l’antichità.
- I. El primo Concilio de Nicea (325). En tel Simbolo Niceno[1] (o Credo curto) Gesù el xe definio consostanziale (omoùsion) al Padre. Gesù el xe de "la stesa sostansa del Padre". Stà afermasion la condana Ario.
- II. Primo Concilio de Costantinopoli (381). Conferma el Concilio de Nicea e scrive el Credo pi longo (Simbolo Niceno-Costantinopolitano)[2] che i cristiani i recita ancò.
- III. Concilio de Efeso (431). Stabilise che Maria (mare di Gesù) la xe "Mare de Dio" (theotocos) e che in Cristo le nature umana e divina le xe unie inte na sola persona. Se condanava così Nestorio, l'adozionismo e il docetismo.[3]
- IV. Concilio de Calcedonia (451). Stabilise che ne l'unica persona (ipostasi o sostanza) dee Gesù se cata le do nature umana e divina "sensa confusion, imutabili, indivise, inseparabili",[4], se condanava così el monofisismo de Eutiche.
- V. Secondo Concilio de Costantinopoli (553). Sto concili el ga riafermà quei precedenti.[5]
- VI. Terzo Concilio de Costantinopoli (680-681). El ga dito che in Gesù se cata la volontà umana e anca quela divina.[6]
- VII. Secondo Concilio di Nicea (787). Sto concili el ga condanà i iconoclasti (quesi che volea distrugere le imagini sacre) dixendo che ci venera n’imagine el venera la persona riprodota. Venerar n’imagine nol vol dir venerar on idolo.[7]
Cristologia catolega
[canbia | canbia el còdaxe]La cristologia catolega la xe stà elaborada inte i primi secoli de la vita de la Cexa, da i Concili ecumenici, ma anca da i studi de i vari teologi aprovadi da la Cexa. Sta cristologia la xe condivisa da le Cexe Catolega, Ortodosa e parte de quele Protestanti. Fondamentale la xe la definision che in Gesù ce cata le do nature – umane e divina – unie ma no confuse tra loro. Le Cexe Orientali le sotolinea che con l’incarnasion de Gesù, elo el ga za salvà la natura umana, che la xera stà rovinà dal pecato originale. Le Cexe Osidentali le sotolinea l’inportansa de la Croxe e de la Risuresion. Le Cexe Copta e Etiopica le xe Cexe monofisite, le segue i insegnamenti eretici de Eutiche.
Note
[canbia | canbia el còdaxe]- ↑ DS n. 125.
- ↑ DS n. 150.
- ↑ DS n. 252-263.
- ↑ DS n. 302.
- ↑ DS n. 421-438.
- ↑ DS n. 550-559.
- ↑ DS n. 600-603;605-609.
Wikimedia Commons el detien imàjini o altri file so Cristologia
Controło de autorità | LCCN (EN) sh85070081 · GND (DE) 4010141-1 · BNF (FR) cb11948144h (data) · BNE (ES) XX526716 (data) |
---|