Patrick Riguelle
![](http://178.128.105.246/content-http-upload.wikimedia.org/wikipedia/commons/thumb/4/4b/Patrickr675.jpg/220px-Patrickr675.jpg)
Patrick Riguelle (Ukkel, 1962) is e Vlamsche muzikant en zanger.
Ost 'n an zyn zes joar als astmapatiënt noa 't Preventorium in Den Hoane most, verhuusde hêel de familie van Ukkel noa Blanknberge.
In 't Preventorium kwam Riguelle in contact met de Kuifjestrips van Hergé en je was gefascineerd deur de figeure van kapiting Haddock. Ook films lik 20.000 Leagues Under The Sea en Moby Dick, me Gregory Peck, werktegen ip zyn imaginoatie en je wilde zelve ook kapiting wordn. Me zyn moatn giengt 'n zeiln in Blanknberge.
Ost 'n Pete Townshend, gitarist van The Who, ip tv bezig zag, was 't droomn van e job ip 't woater al met e ki gepasseerd en de muziek kwam in de plekke. Zyn liefde vo de zêe is wel gebleevn.
Muziekcarrière
[bewerkn | brontekst bewerken]- Riguelle was zanger by de folkgroep Kadril. In 1994 kwam de cd Nooit met krijt uut en in 1996 Kadril Live.
- In 1997 wierdn Patrick Riguelle en Jan Hautekiet gevroagd in 't Gemêenschapscentrum Candelaershuys in Ukkel vor e duoconcert te speeln me repertoire van Jacques Brel. Binst speeldegen z'ook nummers van hunder favoriete songwriters, lik Costello, John Cale, Peter Hammill...
- In 1998 kwam A Minor Thing uut, e cd met hunder lievelingsnummers, allêne me stemme en piano.
- In 2001 volgde Red Harmony met e rocksound in plekke van chansons.
- In 2002 maktegen ze Dielectric Union, e cd vul met eign werk.
- Vanof september 2008 zyn Jan Hautekiet en Patrick Riguelle ip tournee met de show Un Premier Amour. De titel verwyst noa 't lied met de zelfste noame van Isabelle Aubret, woamee dat de zangeresse in 1962 vo Frankryk 't songfestival gewonn het. Riguelle & Hautekiet briengn een ode an 't Fransche chanson, in al zyn facettn me liedjes van zangers lik Jean Sablon, Johnny Hallyday, Bourvil, Charles Aznavour, Henri Salvador, Boris Vian, Patachou, Mistinguette, Arletty moar ook Michel Polnareff, Robert Charlebois, Jacques Dutronc, Daniel Balavoine en Serge Gainsbourg.
Riguelle is sedert 1999 de belangrykste zanger van De Laatste Showband, 't vast orkest van De Laatste Show, e talkshow ip de Vlamsche televisiezender één.
Externe koppelienge
[bewerkn | brontekst bewerken]![]() |
Ofbeeldiengn die ier by passn ku je vien in de categorie Patrick Riguelle van Wikimedia Commons. |