Bohmeh Bouxwnq
Dah lwgdaih Siujsez doeg gauhcungh.
Dah lwgngeih Siujguiz doeg cuhcungh.
Dah lwgsam Siujyez doeg siujyoz haj nienzgaep.
Miz vah naeuz: Bouxhoj bin faex mbouj deng nga, gyoengqlwg neix seng youq 20 sigij 70、80 nienzdaih, haeuj- hag lij aeu gyau ngaenzhag ngaenzsaw daengj. Ngoenzcog couh haihag lo, Bohdahsez yaep fwngz baenz geq, aeu miz 2000 maenz ngaenz baedauq gyoengq lwg cij ndaej bae doegsaw, ngaenz gwn ngaenz sawjyungh gvaq- laeng caiq menhmenh ra.
Seizneix hangz haw it gaen haeuxyangz 8 gak ngaenz, ndaw ranz dawz okdaeuj gaeuq gwn gvaq bi le, lij ndaej gai cien gaen roxnaeuz 800 gaen haeuxyangz, couhsuenq gai haeux- yangz ndaej 800 maenz ba.
Ndaw ranz miz cibgeij duz yiengz, cungj dwg yiengzlwg caeuq yiengzmeh, vahsug naeuz: Iek gaej gwn haeux gyaj, ngah gaej gaj gaeq- meh. Yiengzmeh dwg ciengx daeuj seng yiengzlwg, mbouj hab gai, seizneix feiz doek gwnz din, Bohdahsez baenzlawz hix ndaej gai song duz yiengzmeh, gai yiengz couhsuenq ndaej cien maenz baedauq.
Lij miz song bak lai sam bak maenz cij comz gaeuq ngaenz, baenzlawz suenq? Bohdahsez naengh youq bakdou, song fwngz daeux gemj, naemj saeh sibsib.
Siujsez roxsoq, Siujguiz coeng- mingz, Siujyez lingzleih, seizneix cingq dwg seiz dajsou, gyoengqde boux hung guh hong naek, boux iq guh hong mbaeu, sam beixnuengx dox- ciengj bae bang bouxgeq guhhong.
Siujsez naeuz:“Boh, mboujnex, gou mbouj bae hag lo, gou okbae dajgoeng, lainoix hix ndaej bang ndaw ranz rom di ngaenz.” Bohdahsez hat naeuz:“Mbouj ndaej, mwngz mbouj ndaej miz aen siengjfap neix, saw itdingh aeu bae doeg!”
Siujguiz naeuz:“Boh, mboujnex, gou mbouj bae doegsaw lo, gou youq ranz ndaej bang sou guhhong, mbouj aeu gyau ngaenz saw hix ndaej bang ndaw ranz mbaet di ngaenz.” Boh- dahsez hat naeuz:“Mbouj ndaej, mwngz mbouj ndaej miz aen siengjfap neix, saw itdingh aeu bae doeg!”
Siujyez naeuz:“Boh, mboujnex, gou mbouj bae hagdangz lo, gou youq ranz ndaej bang sou dajcawj, mbouj aeu gyau ngaenz saw hix ndaej bang sou guh saeh.” Bohdahsez hat naeuz:“Mbouj ndaej, mwngz mbouj ndaej miz aen siengjfap neix, saw itdingh aeu bae doeg!”
Ranz gwnz Bohdaegcangh miz ngaenz, bingzseiz Bohdahsez gaenj yungh ngaenz couh bae ra de ciq, aen haggeiz gonq hix ciq de aeu 500 maenz hawj gyoengqlwg bae hag, seizneix lij caengz boiz hawj de.
Bohdahsez caen siengj bae ciq Bohdaegcangh moq, youh naemj daengz caiq gaeuq lij caengz boiz, baenzlawz youh bae ciq caiq moq. Bohdahsez mbouj gamj yamqdin bae ra Bohdaegcangh.
Ranz Lungzgoemj ngoenzlwenz ngamq gai song duz mou hung, wnggai lij miz di ngaenz, Bohdahsez daeuj daengz ranz Lungzgoemj, naeuz yienghneix yienghneix. Lungzgoemj naeuz:“Gou caen mbouj rox baenzlawz gangj ndei, gai mou yienznaeuz ndaej cien lai maenz ngaenz dahraix, boiz caiq cungj mbouj gaeuq dem, lij ra ngaenz cawx mou iq daeuj ciengx cungj mbouj miz ni.”
Ranz Liuznaenj geij ngoenz gonq gai cwz lo, bae ra de yawjyawj. Raen daengz Liuznaenj, Bohdahsez naeuz yienghneix yienghneix. Liuz- naenj naeuz:“Hei, bouxhoj bin faex mbouj deng nga, ma iek ra haex mbouj deng congh. Duz cwz gou cij gai ndaej 500 lai maenz, ngoenzcog naemj bae cawx duz cwz iq he daeuj ciengx, ngaenz caen mbouj miz, mbouj miz banhfap bang mwngz lo.”
Vunz mbanj ciemhciemh ninz lo, ndaw mbanj miz di caem, Bohdahsez daeuj daengz ranz Bohdaegcangh, naeuz yienghneix yienghneix, Boh- daegcangh naeuz:“Gou naeuz mwngz daegnuengx, raeuz seng miz lwgmbwk, couhdwg bang vunz ciengx bawx, lwgmbwk caiq coengmingz hix aeu haq vunz, lwgmbwk doegsaw caiq lai, hix dwg vih bouxwnq doeg, gou yawj mwngz bibi ciq ngaenz hawj gyoengqde doegsaw, mbouj dij, gou dwg mwngz, couh mbouj hawj gyoengqde doeg baenzlai saw lo.”
Bohdahsez naeuz:“Mbouj ndaej, goulau gou dai bae, mboujnex, gyoengq lwg gou itdingh aeu bae doegsaw, gou aeu soengq gyoengqde daengz gauj mbouj hwnjbae veizcij.”
Bohdaegcangh naeuz:“Yiengh- neix couh caih mwngz lo, ngaenz mbouj ndaej caiq ciq hawj mwngz lo, mwngz lingh siengj banhfap ba.”
Vunzmbanj ninz caem lo, Boh- dahsez ciq mbouj ndaej ngaenz, ndawsim miz saeh ninz mbouj ndaek, ukgyaeuj lumj aen muh muhhaeux nei baenq mbouj dingz: Ngoenzcog caiq gai duz yiengzmeh he ba, gvaqlaeng caiq dajsuenq lo.
Caet bet nyied fwn lai, ngoenz doek raq dem raq, aen ranz Bohdahsez dwg ranzvax, fwn baez doek couh roh raemx sasa, ndaw ranz seiqlengq cumx raemx, gyangding aeu bat ciep raemxfwn, ranzdajcawj aeu doengj ciep, doengjdoengj batbat baij rim ndaw ranz caez.
Bohdahsez roxnyinh baenz guh ranz moq lo, de hix mbouj nyienh aen ranz swhgeij yienghneix ngoenz nit dangj mbouj ndaej rumz, ngoenz fwn dangj mbouj ndaej raemx, cijdwg seizneix sim naemj guh mbouj daengz.
Gyoengq lwgnyez cungjsuenq bae hagdangz lo, Bohdahsez lij mbouj ndaej soeng heiq, ngaenz gwn ngaenz yungh lwgnyez lij caj de soengq, lij aeu ra ngaenz ce haggeiz laeng dem. Naemj daengz gijneix, Bohdahsez ce ranz hawj Mehdahsez guenjgoq, de couh okbae dajgoeng, de gag naemj, mbwn miz lwgda, baenzlawz hix mbouj rox hawj de byaij roen mbouj miz loh ba.
Lwgmbwk Dahliuj 18 bi couh haq vunz.
Lwgngeih Daegcangh cuhcungh bizyez couh bae dajgoeng.
Lwgsam Daegyin doeg sat siujyoz couh dauqranz ciengx cwz.
Ranz Bohdaegcangh suenq dwg lwg youq rim ranz, ganq ndaej hong youh ganq ndaej ngaenz.
Miz lauxsae daengz ranz daeuj gienq Bohdaegcangh naeuz:“Mbouj hawj lwg doegsaw, yienghneix mbouj deng bw, ciuhvunz raezrangrang, gaej ngamq yawj lajda, ngoenzcog lwg majhung, cungj mbouj rox geijlai cih, daengz seizhaenx mwngz ienq couh mbouj gib lo. Mwngz couh hawj gyoengq lwg mwngz bae hagdangz ba!”
Bohdaegcangh naeuz:“Doegsaw doegsaw, yied doeg yied saw. Ciuhlaux roengzdaeuj, mbanj dou mbouj miz bouxlawz doegsaw ndaej dang hak gvaq, saw doeg daengz gaeuq yungh couh ndaej, lwgmbwk daengz seiz okhaq couh okhaq, lwgsai habseiz aeu yah couh aeu yah, lwgnyez lij dwg youq ranz guhhong ndei gvaq.”
Hix miz vunz daeuj gienq Boh- daegcangh:“Seizneix mbouj rox saw, ok haw vunz mbouj nyiengh, lwg mwngz cij doeg di saw neix, lauheiq lauq ciuh gyoengqde bw.”
Bohdaegcangh naeuz:“Miz ngaenz ndaw daehbaeuz, mbouj you gwn you daenj, danhfanz ra ndaej ngaenz, mbouj lau lauq ciuhvunz.”
Youq Gvangjdungh aen gungh- cangj cibuh ndeu, aen gunghcangj neix miz bak lai boux vunzhong. Gunghcangj 5 caengz laeuz, caengz daih’it dwg aencang, caengz daih- ngeih dwg dieg ding lwggaet, caengz daihsam dwg dieg caiz buh, caengz daihseiq dwg dieg senj baengz, caengz daihhaj dwg ranz bouxdaeuz banh- goeng. Hong Daegcangh dwg nyumx baengz, nyumx baengz aeu yungh feiz daeuj cienq yw, miz oenq youh ndat, gij yw nyumx baengz uq fwngz uq ndang. Moix baez Daegcangh roengz- ban, cungj dwg buh cingh bienq buh raiz, naj hau bienq naj ndaem. Caeuq vunz caemh gunghcangj guhhong, vunz roengzban, swiq fwngz couh ndaej gwn haeux, de aeu swiq ndang cij ndaej okrog.
Daegcangh ndwen ndaej 5000 lai maenz, de ndwenndwen geiq 3000 maenz hawj daxboh. Bohdaegcangh lai miz faenh souhaeuj neix, donqdonq miz laeuj miz noh, caeuq Meh- daegcangh bouxboux daenj buh moq vaq moq.
Haidaeuz, Daegyin ciengx 4 duz cwzmeh, de ngoenzngoenz langh cwz hwnj bya bae, ngoenz ndit youq laj gofaex ndoj raemh, ngoenz fwn youq laj gamj ndoj fwn, miz ngoenz aeu di fwnz, miz ngoenz aeu di nywj, miz ngoenz maz cungj mbouj aeu. Bohdaegcangh naeuz:“Ciengx ndei cwz couh baenz, gij wnq mbouj yungh guh.” Gij saedceij Daegyin gvaq ndaej cwxcaih youh vaiqvued.
Lajmbanj bya sang ndoeng moengj, ciengx cwz ciengx vaiz maj vaiq youh ndang cangq, gij cwz Daegyin duzduz ga hung ndang biz. De ciengx daengz bi daihngeih, gij cwz de couh laebdaeb roengzlwg lo, 4 duz cwzmeh 4 duz lwg. Bi dem bi, ciengx daengz ndaw ranz miz 20 geij duz cwz le, Bohdaegcangh couh bibi gai 4 duz cwz, yienghneix, ranz de couh bibi lai ndaej faenh souhaeuj ndeu.
Miz vunzmbanj caeuq Daegyin gangjriu naeuz:“Mwngz gai cwz ndaej ngaenz lai, couh vaiqdi aeu yah lobw.”
Daegyin mbouj hoizvah, cim coh boux mbanj haenx riuriu, yien cwz bae langh faenh de.
Bohdaegcangh ndaejnyi gij vah boux mbanj neix lo, de hix naemj daengz gienh saeh neix miz di youqgaenj: Daegyin 18 bi lo, baenz ra yah hawj de dahraix.
Ngoenz ndeu, Bohdaegcangh ra daengz mehmoiz ndeu, naeuz baenz- neix baenzneix, lij hawj mehmoiz dab ngaenz he.
Bohdaegcangh lij coz seiz hix mbouj doeg geijlai saw, boh de couh de boux lwg dog, miz vah naeuz: Goek govangh mbouj maj faexnyienq, dwg gimhenj mbouj rox bienq myaex diet. Ranz de daj cojcoeng roengzdaeuj, couhdwg dajciengx baenz gya, daxboh de couh ce miz bang yiengzbya hawj de, mbouj lwnh vunz mbouj rox, ranz Bohdaegcangh seizneix gaenq ciengx miz 60 geij duz yiengz, boux- buenqyiengz haeuj mbanj daeuj, mbouj yungh cam bouxlawz miz yiengz gai, cigsoh bae ranz Bohdaegcangh cawx couh baenz.(caengz sat)