提示:呢篇文講嘅唔係
叉包。
叉燒包
叉燒包係一種廣東點心。做法一般係將叉燒切細粒,落埋蠔油同其他調味做餡,外面用麪粉團包住,放喺蒸籠入面蒸熟。叉燒包通常有直徑五厘米咁大,一籠通常有三個。正嘅叉燒包會用半肥瘦叉燒做餡,包皮蒸熟後軟滑得啱啱好,裂開少少露出叉燒餡,滲發出陣陣肉香味。叉燒包同乾蒸燒賣、蝦餃、蛋撻合稱為粵式茶樓嘅「四大天王」。
以前茶樓嘅點心師傅蒸包嗰陣會噴水喺包上面令個表面蒸出嚟平滑,但當時物資冇咁好,冇噴水嘅水壺,佢哋通常都係用人口含住水嚟噴,所以好多人食包嗰陣都會先撕咗表面嗰層薄皮。