校服
|
校服(粵拼:haau6 fuk6)係學校規定畀學生着嘅制服,校服有校徽嘅,每間學校嘅規矩都唔同,有啲學校規定女仔條裙要遮住大髀,有啲學校規定要着黑皮鞋,有啲學校係冇校服嘅,即係冇限住啲學生着乜嘢。有啲學校有分冬季校服同夏季校服,學生要去學校或者去校服舖訂,要畀錢。
唔同國家或地區啲校服
[編輯]喺中國大陸,中小學着校服嘅規定都唔一樣,但都以運動服為主。喺小學,部分學校要求凈限禮拜一着,亦有相當一部分學校限制禮拜一到五着。而初中、高中、中專、技校都係有規定要求禮拜一到五着校服。亦有部分沿海城市啲學校會另外派發禮儀服或制服。重有啲正式場合,少先隊員會被規定要佩戴紅領巾或少先隊徽。得好少學校規定要求着校鞋返學。由於冇規定話指定場合要着邊種校服,所以好多時喺體育堂出現學生着禮儀服上堂或隆重儀式場合出現學生着運動服開會嘅情況。中國大陸之所以會揀運動服做校服,係因為喺1993年,中華人民共和國教育委員會出咗《城市中小學生統一著裝》份文件[1],嗰時雖然中國大陸嘅服裝業比較多,但由於人工比較少,加上嗰時啲禮儀服成本比較貴,而且運動服造價比較平,所以中國教委揀咗運動服做校服,目的係消除鬥名牌同減輕經濟負擔[2]。
高級學校除咗警察學校、軍校、旅遊學校之外,其他學院或大學機構都冇規定要求着校服。中小學除咗部分沿海城市有禮儀服,少數民族地區有當地民族特色嘅校服外,其他地區基本上冇禮儀服。
禮儀服方面,男仔圍繞T恤或西裝、西褲;女仔圍繞T恤或西裝、裙為主,亦有部分學校啲禮儀服出現吊帶褲或吊帶裙品種。喺少數民族地區都有自己當地啲民族特色校服。
喺香港,絕大多數幼稚園、小學、中學都要着校服。校服有分為:夏季校服、冬季校服、夏季運動校服同冬季運動校服。小學規定,如果嗰日有體育堂、旅行、戶外活動等,要着運動校服,其他平日上堂一定要着普通校服。中學規定,要體育堂先可以着運動校服,其他堂一定要着普通校服,如果嗰日有體育堂,要另外帶運動校服喺上體育堂之前換,上完體育堂之後要換返普通校服。而某啲學校為方便學生或者減少感染風險就放寬規定,可以畀學生喺有體育堂嗰日可以着運動校服回校,以及着運動校服離校。
香港嘅校服偏向西式,夏季校服,男生多數都係短袖恤衫、西褲、白襪、皮鞋,小學係短西褲,中學係長西褲。女生嘅款式比較多,大部分學校嘅校服係八幅裙,亦有啲學校嘅校服係水手衫、恤衫、西裙、旗袍等。運動校服通常都係男女生同款,亦有學校根據屬社分做唔同顏色。有學校規定衫尾一定要楔入褲或裙裏面,亦有學校衫尾可以唔使楔。大部分學校規定普通校服要着皮鞋,運動校服要着全白運動鞋。
冬季校服,男生多數係長袖恤衫、長絨西褲,有部分名校小學係短絨西褲、長襪,加上V領冷衫或V領單排扣紐冷衫或校褸,多數學校都要打呔。90年代之前嘅校褸多數都係西裝式褸,而家呢款校褸已經好少見,逐漸以風褸式嘅多功能校褸取代。女生冬季校服嘅款式都係比男生多,不過多數都係要着裙,加上冷衫或校褸,天氣凍可以着襪褲或肉色絲襪。
註
[編輯]![](http://178.128.105.246/content-http-upload.wikimedia.org/wikipedia/commons/thumb/4/4a/Commons-logo.svg/30px-Commons-logo.svg.png)
- ↑ 关于中小学生统一校服的理性思考 互聯網檔案館嘅歸檔,歸檔日期2020年3月28號,. 中國校長
- ↑ 中国的校服为什么是运动服?