火炬
![](http://178.128.105.246/content-http-upload.wikimedia.org/wikipedia/commons/thumb/5/5f/Disambig_gray.svg/25px-Disambig_gray.svg.png)
![](http://178.128.105.246/content-http-upload.wikimedia.org/wikipedia/commons/thumb/b/b8/Lewes_Bonfire%2C_discarded_torch.jpg/220px-Lewes_Bonfire%2C_discarded_torch.jpg)
![](http://178.128.105.246/content-http-upload.wikimedia.org/wikipedia/commons/thumb/1/18/Himure_hachimangu07s3200.jpg/220px-Himure_hachimangu07s3200.jpg)
![](http://178.128.105.246/content-http-upload.wikimedia.org/wikipedia/commons/thumb/3/37/Liberty-statue-from-below.jpg/220px-Liberty-statue-from-below.jpg)
![](http://178.128.105.246/content-http-upload.wikimedia.org/wikipedia/commons/thumb/6/63/Lewes_Bonfire%2C_fox_figures.jpg/220px-Lewes_Bonfire%2C_fox_figures.jpg)
火炬(粵拼:fo2 geoi6),又叫火把(fo2 baa2),係一種光源,照明用嘅。火炬要手揸,點着火先用得,最簡單嘅火炬就係點着支乾柴就噉揸。火炬嘅樣係要有一條長嘅棒棍狀物體,一頭手揸,另一頭用來點火,爲咗燒耐啲、容易點着、無咁易熄,一般放啲易燃物喺點火嗰處,比如話裁塊布落來,浸啲松香,然後捲喺點火嗰頭。
未有電燈之前,西洋諸如城堡、教堂等石構建築以及地牢呢啲地方係用火炬照明嘅,即係喺走廊、房嘅牆壁高啲嘅地方安啲凸出嘅燭臺(sconce,又可以嗌做壁燈),而支火炬就插喺嗰度。
除咗可以夜時照光,喺世界好多地方火炬重象徵光明,上面嘅火睇做聖火,火炬變成祭祀時嘅祭器。而有啲地方重以火做主題,玩火來慶節,比如日本嘅火祭,佢哋呢種習俗源自於夏天���田上面有害蟲飛,要舞支大火炬來燒佢哋,呢種驅蟲風俗嗌做「蟲送」、「蟲追」,後來呢種農事演變爲火祭,兼且多咗祈求五穀豐登、無火燭、無蟲災嘅祈願。
火炬呢個詞又可以調轉寫做炬火,除咗可以指火把,又有「點着火把」嘅意思[1];此外又有個無咁常用嘅詞,叫松明(cung4 ming4),噉係因爲啲山松油脂多,劈開再點着可以照明[2]。
祭祀、儀式用嘅火炬
[編輯]好多地方過節祭神時用到火炬,可以用佢來天黑照明,又可以傳遞聖火。比如話夜晚時着起成排嘅火炬,照光條路,亦可以畀啲人睇清啲儀式,同時火炬本身可以用來搞儀式,比如嗰啲玩火嘅節慶,有啲將好多支柴紮埋燒,整成支巨型火炬,搞大個場面,亦有啲成班人一人一支火炬來舞來舞去。類似嘅同火有關嘅儀式重有送火、河燈。一般來講以火做主題嘅祭祀儀式大多喺晚黑舉行,係爲咗酬神或者祭啲死人,呢點係世界各國民族共通嘅,無論係亞洲(比如日本)定係歐洲(比如古希臘、羅馬)。
運載聖火最出名嘅火炬係奧運聖火,奧運聖火係開奧運會時燒着嘅聖火,從採火之後一直燒,燒到閉幕爲止,採火地點都係希臘,再經過聖火傳遞行渾各國,最後到達奧運主辦國,呢個傳遞嘅過程就係靠支火炬。呢個活動係自1936年柏林奧運會開始搞起,之後成爲奧運傳統。
除咗奧運,其他一啲體育賽事都會用火炬。市面上亦有得賣,呢種火炬入面裝有專用燃料,有火焰式同無焰式兩種。
喺日本,舊時啲神社燒火炬係用麻木嘅,不過到咗昭和二十三年(1948年)強化施行大麻取締法,之後就無乜點用,而家喺日本得返兩間神社重會燒麻木。
入水火炬
[編輯]喺火炬點火嗰頭溝啲硫磺同石灰再點着,噉樣就算入咗水啲火都唔會熄。噉樣嘅火炬喺古羅馬時就已經用緊。
入水用嘅火炬除咗西方有,東亞亦有。比如日本舊時啲忍者用火藥整嘅火炬,稱之爲「忍者松明」、「水松明」,佢就係用竹筒裝啲火藥整成嘅,潛咗入水都唔熄火。比如而家有嘅實物,就係支70厘米長、7厘米粗嘅火炬,佢表面包住層竹皮,而隻把手係桐木整嘅,兼且支柄度有文化十二年(1815年)嘅筆墨題字[3]。入水火炬除咗可以水中照明,亦可以打仗時愛來放火,因爲佢淋水唔熄,做放火火種啱曬。
具體嘅整法有各家秘方,其中有啲喺兵書度記低咗。比如話日本上泉信綱所傳嘅《訓閱集》(以戰國風改編嘅大江家兵書)卷四《戰法》中就有《用火秘方》,其中就講到「無論水中定豪雨,火都唔熄嘅火炬」,實則上就同忍者用嘅水松明類似,都係喺竹筒內放啲特殊火藥,呢種火藥係「一掂水就着火」,稱爲「不知火秘方」。
表演用火把
[編輯]用喺雜技嘅火把係空中拋物表演嘅常用道具。一般表演時,將支火把掟到半空,再喺佢跌落時空手接返住,技藝高嘅,甚至可以連續循環噉拋接。拋火把嘅表演方法同拋大棍、飛刀一樣,而火把因爲啲火舞來舞起嘅景象、以及啲火劃過空中嘅聲,能夠畀觀眾好刺激深刻嘅印象。不過因爲用到火,所以幾牙煙下,初學者玩唔到呢味嘢,就算係熟手,亦要隨時留心無畀火傷到。
火炬除咗用喺專業表演外,好似露營燒着營火後亦可以攞來玩,不過要注意安全,小心火燭。
象徵上嘅火炬
[編輯]火炬一般象徵住光明,有「驅除黑暗」、「照光一切、引領世界」嘅寓意。比如話右手高舉火炬嘅自由女神像又有遞個名做「自由照耀世界」(Liberty Enlightening the World)。不過火炬亦可以象徵住黑暗同死亡,喺古希臘、古羅馬嘅神話度,死神他拿度斯(Thanatos)就係揸住火炬,唔同尋常在於支火炬係倒轉揸嘅[4],倒轉交叉嘅火炬亦係古希臘羅馬文化當中喪禮嘅象徵。火炬向下象徵住死,掉返轉,向上嘅火炬象徵生命、真理,而熄咗着返嘅火炬象徵返生、復興。
作爲驅除黑暗象徵嘅火炬,經常畀啲政治團體、政黨用來做自身符號。比如英國保守黨曾經用一隻揸住火炬嘅手作爲佢嘅黨標,同時英國工黨喺1983年嘅嘜頭亦用到火炬,呢個嘜頭將象徵農民嘅鋤頭同火炬一齊交叉。剛果前身薩伊嘅國旗就係將隻揸住火炬嘅手擺喺國旗正中,呢隻手就係象徵革命同自由[5]。
攷
[編輯]- ↑ 〈詞語「炬火」的解釋〉. 漢典. 喺2014年11月9號搵到.
- ↑ 〈詞語「松明」的解釋〉. 漢典. 喺2014年11月9號搵到.
- ↑ 見於《伊賀町史》(1979年)254頁到255頁嘅張相。
- ↑ 〈死亡天使(Angels of Death)——象徵主義之中的死神形象〉. 藝術天堂. 喺2015年2月3號搵到.
- ↑ 〈剛果民主共和國〉. 全球旗幟. 2009年1月25號. 喺2015年2月3號搵到.