盲人門球
![](http://178.128.105.246/content-http-upload.wikimedia.org/wikipedia/commons/thumb/6/60/Goalball_vid_Paralympics_i_Aten.jpg/300px-Goalball_vid_Paralympics_i_Aten.jpg)
盲人門球(英文:Goalball)係一項畀盲人參加嘅球類運動同傷殘奧林匹克運動會比賽項目。每場賽事由三位運動員組成一隊出賽,球員要根據個波發出嘅聲音判斷個波嘅方向同速度,盡量阻止對手得分,喺20分鐘之內攞到最多分嗰隊就贏。
歷史
[編輯]盲人門球1946年起源於德國同奧地利。早期嘅盲人門球運動以康復娛樂為目的,為盲人發明嘅一種集體遊戲活動,由於呢項球類活動容易進行,加上器材簡單,成為一項喺歐美流行嘅活動 [1]。
規則
[編輯]一場盲人門球比賽由兩隊對賽,每隊由六人組成,一定要係盲人,並只有三位球員上場。而喺一場比賽裏面,每隊只有三次更換球員嘅機會(加時賽有1次機會)。由於國際殘疾人奧林匹克委會對於盲人門球並冇嚴格嘅分類,所以,運動員需要戴上紗布眼罩同遮光眼鏡,運動員需要靠住個波發出嘅聲音感覺波嘅來勢同方向。
賽事全長20分鐘,分為上、下半場,每半場都係10分鐘。喺呢20分鐘裏面,球員喺攻門嗰陣要以投擲嘅方式將個波轆到對方嘅龍門度,攻入一球得一分,較高分嗰一隊就為之贏,若果雙方喺20分鐘之內未能分出勝負,就要進行上、下半場各3分鐘嘅加時賽,首先得分嗰隊就贏,如果雙方仍然打和,就進行類似足球賽事嘅互射定點球決勝負。
犯規
[編輯]以下係盲人門球比賽嘅犯規行為。通常嚴重性較低嘅犯規會判罸定點球,犯規嗰隊要將發球權交畀對方。呢個時候,雙方只有一人可以喺比賽場地裏面﹕
- 短球﹕攻方運動員未能將個波球轆到對方區域
- 高球﹕攻方運動員喺發球嗰陣將個波拋到半空
- 第三次發球﹕一位球員只能夠喺半場裏面發球兩次,第三次就犯規
- 非法防守﹕一方球員去咗對方範圍,都係違規行為
- 掂眼罩﹕運動員喺未經裁判同意之下掂眼罩
場地同器材
[編輯]盲人門球嘅比賽場地係長18米、闊9米嘅室內硬地球場,每個半場由底線開始分為防守區、落地區同中立區三個部分,個波若果喺落地區仍然停留喺半空就屬於長球犯規。
盲人門球嘅龍門闊9米,高1.3米、門柱直徑0.15米,龍門下面嘅白線係球門線,若果個波過咗球門線就為之入咗一球。比賽用嘅波入面會有啷啷令佢發出響聲、重1250克、周長76厘米嘅橡膠波,波上面有8個1厘米嘅竉仔[2]。