Mga Amang Kagtogdas
![](http://178.128.105.246/host-http-upload.wikimedia.org/wikipedia/commons/thumb/9/9d/Scene_at_the_Signing_of_the_Constitution_of_the_United_States.jpg/300px-Scene_at_the_Signing_of_the_Constitution_of_the_United_States.jpg)
![](http://178.128.105.246/host-http-upload.wikimedia.org/wikipedia/commons/thumb/f/f9/Declaration_of_Independence_%281819%29%2C_by_John_Trumbull.jpg/300px-Declaration_of_Independence_%281819%29%2C_by_John_Trumbull.jpg)
An Mga Amang Kagtogdas kan Estados Unidos iyo idtong mga lider pulitikal na nagpirirma sa Pamamahayag nin Katalingkasan kan 1776 o nakadamay man sa Rebolusyon Amerikano sa pag'agaw nin katalingkasan sa kapangyarihan nin Gran Britanya, o siring man idtong mga ka-rapot sa pagpanday asin pag'ama' kan Konstitusyon nin Estados Unidos kan mga taon 1787-1788. Sa mga tataramon na ini, kabali man diyan idtong mga tawong nagpatindog kan bagong gobyerno na sakop kan nasabing Konstitusyon.
Alagad, sa laog kan dakulang aripompon na tinotomoy na "Mga Amang Kagtogdas," igwang duwang mayor na grupo: an mga Kagpirma sa Pamamahayag nin Katalingkasan kan 1776 asin idtong Kagpanday (mga delegado sa Kumbensyon Federal) kan pinaghihimong Konstitusyon kan Estados Unidos.
Dakul man mga historyador tinatawan kahulogan an terminong "Mga Amang Kagtogdas" bilang mas dakulang ripondipon, kairiba na diyan bako sana idtong Kagpirma asin Kagpanday (kan Konstitusyon) kundi idtong mga naimbwelto sa kampanya sa pag'agaw nin Katalingkasan o sa pagmukna asin pagpatindog kan Estados Unidos nin Amerika, magin ini mga pulitiko, mga hurista, mga estadista, mga diplomatiko, mga soldados o mga ordinaryong namamanwaan.
An eminenteng historyador na Amerikano, si Richard B. Morris sa saiyang 1973 na libro tituladong "Seven Who Shaped Our Destiny: The Founding Fathers as Revolutionaries," pinagpili an pitong ini komo mayor na "Mga Amang Kagtogdas": Benjamin Franklin, George Washington, John Adams, Thomas Jefferson, John Jay, James Madison asin si Alexander Hamilton.