Saltar al contento

Woody Guthrie

De Wikipedia, le encyclopedia libere
Woody Guthrie. Le parolas super le guitarra dice: "Iste instrumento occide fascistas"

Woodrow "Woody" Guthrie (14 de julio 1912 – 3 de octobre 1967) esseva un cantator, musico e compositor, e un conservator de musica traditional in le Statos Unite.[1][2]

Woodrow Wilson Guthrie nasceva a Okemah, Oklahoma in 1912.[1] Su parentes, Charles e Nora, le inseniava cantos traditional. Su soror habeva un morte accidental, e su matre pro un maladia genetic del cerebro debeva resider in un hospital. Le familia habeva problemas financial. Iste eventos dava a Guthrie un prospecto suspiciose del vita. In 1931 Guthrie cambiava su residentia a Texas, ubi ille sonava in duo bandas e se maritava con Mary Jennings, un filio de un membro de un banda.

Le difficultates del "Bassino de pulvere" (anglese: Dust Bowl), un grande siccitate, le qual causava grande tempestas de pulvere in le sud central del SUA, Guthrie e multe altere gente esseva fortiate a cambiar lor residentia. Multe vadeva a California, ubi esseva labores nove. Al previe californianos le "okies" non placeva, ma Guthrie deveniva famose pro su musica, inclusive per radio. Ille anque componeva multe de su proprie cantos original. Le cantos esseva popular con obreros ordinari, e ille sovente sonava pro reuniones de syndicatos.

Ille cambiava su residentia al Citate de Nove York in 1940. Totevia Guthrie con su guitarra sovente viagiava per hasardo. Su vita deveniva difficile a su familia, e ille se maritava tres vices. Ille deveniva plus e plus irate e disordinate. In 1954 ille esseva trovate de haber le mesme maladia del cerebro, que su matre habeva, e ille passava le resto de su vita in hospitales.

Ille moriva in le Citate de Nove York, in Creedmore State Hospital in Queens, le 3 de octobre de 1967.[1]

Guthrie sonava e cantava con alteres includente Pete Seeger e Leadbelly, e su filio Arlo Guthrie anque es un musico e compositor.[2]

Ille componeva plus que 1000 cantos[1][2] e un numero de designos. Su canto plus famose es "This Land Is Your Land, This Land Is My Land" ("Iste terra es vostre terra, iste terra es mi terra").[1]

Referentias

[modificar | modificar fonte]
  1. ↑ 1,0 1,1 1,2 1,3 1,4 Kenneth T. Jackson (redactor), The Encyclopedia of New York City, Yale University Press & the New York Historical Society, ©1995 by Yale University, p. 515
  2. ↑ 2,0 2,1 2,2 Don Michael Randel (redactor), The Harvard Biographical Dictionary of Music, The Belknap Press of Harvard University Press, 1996, p. 341

Ligamines externe

[modificar | modificar fonte]
 Wikimedia Commons ha files multimedia de: Woody Guthrie

https://www.woodyguthrie.org/biography.htm

Obtenite de “https://ia.wikipedia.org/wiki/Woody_Guthrie”