Drentsche Aa
![](http://178.128.105.246/host-http-upload.wikimedia.org/wikipedia/commons/thumb/e/e2/Drentse_Aa_RA.jpg/220px-Drentse_Aa_RA.jpg)
![](http://178.128.105.246/host-http-upload.wikimedia.org/wikipedia/commons/thumb/8/80/Drentsche_Aa_bij_de_Witte_molen.jpg/220px-Drentsche_Aa_bij_de_Witte_molen.jpg)
La Drentsche Aa esas la sola rivero en Nederlando qua (grandaparte) retenis sua originala sinuoza voyo.
Remarkinde la rivero nomesas nur en Groningen la Drentsche Aa. En Drenthe ipsa ol nomesas de la punto ube la Anreeperdiep e la Amerdiep kunvenas, intersequante: la Deurzerdiep, la Looner Diep, la Taarlosche Diep, la Oudemolensche Diep, la Schipborgsche Diep e la Westerdiep. Ibe ol divenas la frontiero inter Groningen e Drenthe e recevas sua familiara nomo. La rivero lore fluas per aquotunelo sub la Noord-Willemskanaal e pose nomesas la Oude Aa. Ico fine ekfluas aden la Schipsloot che la Friesche Veen, quo ipsa ekfluas aden la Noord-Willemskanaal.
Esas en Drenthe anke branch-rivereto, qua intersequante nomesas la Andersche Diep, la Rolderdiep e la Gasterensche Diep, ante ke ol ekfluas aden la cheffluo ube la Taarlosche Diep fluas aden la Oudemolensche Diep.
Plu mikra branch-rivereti esas la Anlooerdiepje e la Zeegserloopje qui ekfluas aden la cheffluo, rispektive en la Oudemolensche Diep ed en la Drentsche Aa.
La Hoornsediep quo fluas alonge la Paterswoldsemeer esas restajo dil rivero. En la urbo Groningen la stradonomi Hoge der A e Lage der A, la Asraat e la nomo dil kirko Der Aa ankore memorigas la rivero.
Originale la Aa ekfluis aden la Hunze proxim Adorp. En 1385 la segmento dil Aa inter Dorkwerd ed Adorp klozesis e la kanalo exkavesis de Dorkwerd a la Reitdiep, tale ke la Aa de lore ekfluas aden la Lauwerszee. La olda voyo esas pro slamizo apene rikonocebla.