Shabat
El shabat, sabá o sabbad es el sieteno diya de la semana i se topa entre el viernes i el alhad. El su nombre da orijin ala ekspresion en lingua latina sábbatum i en mizmo tiempo de la ekspresion en ebreo שבת, shabbat ke sinyifika deskanso. Endemas de esto, el sábbatum es el kriador de la etimolojiya del biervo "sábado" en la lingua kastilyana. Enel djudaismo, los diyas estan definidos al paso del sol; los diyas tienen su empesijo i su fin en la tadre, kuando el sol se eskonde, i no ala media nochada komo en Oksidente. Ansina, el sieteno diya de la semana, el Shabat, tiene el su empesijo el viernes, kuando el sol se eskonde, i eskapa la nochada del sabado. Esta idea tiene el su orijin en la kriasion del 'olam [1]. En esa istorya, El Dio kria el 'olam i todo durante sesh diyas. Enel sieteno diya, El Dio desha de lavorar. De esta manera, los djudios kale ke lavoren los primeros sesh diyas de la semana i diskues deskansar enel Shabat.
En la Tora se melda ke esta defendido lavorar en Shabbat[2], deke es un diya para deskansar i ambezar la Tora. D'akodro kon la Alaha, en Shabat es el diya de fiesta mas emportante de los djudios, ainda mas emportante ke Rosh Ashana i Yom Kippur [3]. Los mistikos djudios dizen ke el diya de Shabat apresenta un 'olam perfekto; en este 'olam, todos konosen a El Dio i le dan kavod i amor. Eyos dizen ke este tipo de olam no es konosido desde Ganeden i no va pueder ser mirado fina la arivada del Mashiah.[4]
"Guadrar" i "akodrarsen" del Shabat
[trocar | trocar el manadero]Egzisten dos versiyones de las aseret adiberot de la Tora; estas versiyones uzan diferentes biervos. La versiyon en Shemot dize "akodrate del Shabat para santifikarlo", mientres ke la versiyon de Dvarim dize "Guadra el Shabat para santifikarlo". La tradision djudia dize ke "akodrarsen" sinyifika "fiestar" el Shabat, mientres ke "guadrar" sinyifika deskansar, no lavorar ni azer bisnes.
Fiestar el Shabat
[trocar | trocar el manadero]![](http://178.128.105.246/host-http-upload.wikimedia.org/wikipedia/commons/thumb/d/df/Shabbat_Candles.jpg/290px-Shabbat_Candles.jpg)
![](http://178.128.105.246/host-http-upload.wikimedia.org/wikipedia/commons/3/31/GOOD_SHABBES_-.jpg)
Shabat es un diya orozo. Egzisten munchos evenementos ke azen ke el diya seya fiestado kon alegriya.
- Kandelas de Shabat: En la Alaha se puede meldar ke esta defendido azer huego diskues del empesijo del Shabat. Por modre de esto, una persona de kada kaza prende las kandelas justo antes del empesijo del Shabat. Jeneralmente, es la mujer de la kaza la kuala prende las kandelas, ma asigun la tradision sefardi, si la mujer no esta en kaza, o si es un mansevo ke no esta espozado, kale ke el ombre prenda las kandelas. Estas kandelas kale ke no se amaten fina la kumida de la nochada de Shabat.
- Beraha ensima del vino: Un pasuk del livro de Teilim dize "El vino aze feliz al korason de una persona"; por modre de esto, los djudios djeneralmente fiestan kon vino. Las dos primeras kumidas de Shabat tienen su empesijo kon una beraha ke es dicha ensima de una kupa de vino. La majorita de las vezes, la kupa uzada para dezir esta beraha es endiamantada i en vezes de oro o plata. La beraha dicha es yamada kidush.
- Tres kumidas de Shabat: En kada Shabat, los judios azen tres kumidas; la primera es ala nochada, diskues de meldar Kabalat Shabat i Arvit en la esnoga; la dosena kumida es al medio diya, diskues de meldar Shahrit i Musaf, mientres ke la tresera kumida es echa ala tarde, djusto antes de la fin del Shabat. Kada kumida tiene su empesijo enel kidush ensima del vino i diskues es dicha otra beraha ensima del pan, el kualo es jeneralmente echo en forma de Hala. En la Tora, El Dio entrego a los djudios dos kumidas de mana kada viernes, kon el buto de no azerlos lavorar enel Shabat. En kada kumida de Shabat se tienen dos panes, para akodrarse de las dos kumidas de mana. Para estas kumidas de Shabat, los djudios aprontan la amijor kumida ke pueden merkar; uzando endemas sus amijores platos; en kada kumida son kantadas kantikas espesialas de Shabat, yamadas zemirot, en onor del Shabat. Las dos primeras komidas son grandes i la tresera es djeneralmente mas chika.
- Tefilot de Shabat: Las tefilot de Shabat estan organisadas del mismo modo ke las de los diyas de la semana, ma kon alkunos trokamientos, komo por enshemplo:
- Una tefila espesiala, Kabalat Shabat ("Aresivida del Shabat") es ajustada entre la Minha de la tadre del viernes i la tefila de la nochada.
- La Amida es trokada en Shabat. Durante la semana, la Amida tiene treze berahot demandando el ayudo de El Dio. En Shabat, son trokadas por una unika beraha ke rengrasia a El Dio por el diya del Shabat.
- Los teilim ke son meldados al empesijo de las tefilot de la manyana son engrandesidos en Shabat.
- La parashat ashavua es meldada kon boz alta meldando de un Sefer Tora.
- Una Amida espesiala, yamada Musaf ("tefila adisionada"), es ajustada kaji ala fin de la tefila de Shahrit; es meldada en lugar de la ofrenda adisionala ke era yevada al Bet Amikdash en Yerushalayim kada Shabat.
- Durante las tefilot de Minha de la tarde, el empesijo de la parashat ashavua de la semana proksima es meldado en boz alta.
Endemas, egziste otro tipo de evenemento, yamado Oneg Shabat, el kualo sinyifika "Gozar del Shabat". ALkunas de las formas en la skualas los djudios gozan del Shabat son endemas de las yamadas antes, uzar vistidos bonikos, avlar i partajar momentos espsialos kon amigos i famiya, , deskansar i ainda durmir, meldar la Tora i otros livros relijozos i tener sekso entre el espozo i la mujer.
Guadrar el Shabat
[trocar | trocar el manadero]Tener plazer del Shabat es muy emportante, ma Shabat es un diya santo; egzisten leyes i mitsvot de la Tora, la Mishna i el Talmud ensima de lo ke los djudios pueden i no pueden azer en Shabat. Todas estas leyes azen ke los djudios kudien i guadren el Shabat komo un diya santo.
- 39 kateggorías defendidas de lavoro: La Mishna konta 39 kateggorías de lavoro (ivrit: melahá) ke los djudios ko pueden azer en Shabat. Estas leyes ensima de las aksiyones ke egzisten en kada kateggoria son kompleksas. Todas las kateggorías avlan de azer kozas muevas o de enderechar o alimpiar alkuna koza vieja para ser uzado otra vez. Aki se topa una lista chika de las kateggorías de lavoro defendidas enel Shabat:
- Asender un huego
- Yevar alkuna koza en un lugar publiko ande no seya topado un eruv
- Kozinar
- Alimpiar, egzepto un pko de shavon para alimpiarse las manos antes de la kumida o una kurtada freska en la pyel
- Viajar mas de 3 Km de la sivdad o de la kaza
- Eskrivir
- Lavorar la tierra
- Kozer i azer vistidos en djeneral
- Fraguar o destruyir una kaza
- Empedimientos: Los empedimientos (ivrit: Shvut) son aksiyones ke no azen parte de dinguna d elas 39 kateggorías del lavoro defendidas en Shabat, ma ainda estan defendidas. Los hahamim tienen defendidas estas aktivitas kon el buto de ke los djudios no lavoren indirektamente en dinguna de las 39 kateggorías, ainda por aksidente, por enshemplo:
- Merkar i vender kozas kon paras esta defendido, deke por enshemplo, el merkader puede eskrivir un aresivo o azer este lavoro en un lugar publiko.
- Elektrisita en Shabat: El uzo de la elektrisita es muncho mas muevo ke las leyes del Shabat; por esto, los hahamim ambezaron muncho para pueder entender komo el uzo de la elektrisita puede enderecharse d'akodro kon las leyes del Shabat. Se tienen eskritos munchos livros ensima de este tema, ma kaji todos los hahamim ortodokses del 'olam tienen akodrado ke:
- El uzo de elektrisita para kalentar, komo un forno o una lampa es igualado a asender un huego o a kuzinar. Por tanto, esta defendido ansina.
- Jenralmente para la majorita de las kozas esta defendido uzar elektrisita, komo avlar por telefon o uzar n komputer.
- Alkunos aparatos de kaza, komo las lampas i la buziera, pueden estar asendidas si el asendido es echo antes de Shabat.
- Salvar una vida: Los djudios ambezaron de Vayikra 18:05 ke kale pasar por enriva de las leyes de Shabat para salvar la vida de un benadam. MUnchas vezes, egzisten dos o mas maneras de azerlo; en estos kazos, la persona kale eskojer la forma ke menos vola el Shabat, ma esto no es siempre ansina, por kestyones de tyempo. Ainda si no se esta asegurado de pueder salvar la vida del benadam en perikolo, kale azerlo, por enriva de las leyes de Shabat.
El Shabat enel djudaismo no-ortodokse
[trocar | trocar el manadero]Enel djudaismo konservador es ambezado ke los djudios no pueden azer dinguna aktivita de las 39 kateggorías defendidas de lavoro (melahá). Los Hahamim konservadores ainda son menos duros kon respekto a las melahot ke los hahamim ortodokses. Los hamamim konservadores endemas, son muncho menos duros enel program de kudio (Shvut) ke los hahamim ortodokses; por enshemplo, los hahamim konservadores deshan a los djudios uzar elektrisita en Shabat para munchas kozas, anke tienen defendido uzar elektrisita para kualunke de las 39 kateggorías de lavoro. Munchos de los fiyeles de las esnogas konservadoras de la Amerika del Nord no kudian estas leyes.
El djudaismo reformista no aksepta la Alaha komo hobá; estos djudios pueden dekansar en Shabat, ma no siempre kudian de no azer melahot o Shvut.
Eskapando Shabat: La Avdala
[trocar | trocar el manadero]El Shabat eskapa diskues de la eskondida del sol, ya en la nochada; la eskapada del Shabat esta markada en un evenemento yamado "Avdalá"(הַבְדָּלָה); el su nombre viene de un biervo en Ivrit ke sinyifika "partajamiento" i en vedrad, es un evenemento ke partaja el dia del Shabat de la semanada nueva. Las berahot de la Avlada son dichas ensima de una kupa de vino, un golor bueno i una kandela kon muchas mechas. Diskues de la Avdalá, se pueden azer kualunke de las 39 melahot, deke ya no se esta en Shabat.
Kostumbres
[trocar | trocar el manadero]El shabat es el dia mas emportante de la semana; esto es deke guadrar el shabat es la unika mitzva ke se topa en los 10 aseret adiberot dichas a Moshe Rabenu por El Dio, ansina komo se puede meldar en la Tora.
Reflanes del dia shabat
[trocar | trocar el manadero]- No es shabat, ni el dukado esta en basho.
- Saba lo aharvaron, Alhad yoro.
Referensias
[trocar | trocar el manadero]- ↑ Bereshit 2:2: "Enel sieteno siya, El Dio eskapo todo su lavoro. Deskanso enel sieteno dia de todo el su lavoro"
- ↑ Shemot 20:8-9: "Vas azer todo el tu lavoro los primeros sesh diyas de la semana. El sieteno diya es Shabat de El Dio. Este diya dinguno va azer dingun lavoro"
- ↑ Shabbat. Judaism 101
- ↑ Shabbat as Preview of the Perfected World. Rebi Theodore Friedman
Dias de la semana |
Aljhad - Lunes - Martes - Mierkoles - Djueves - Viernes - Shabat |
Fiestas i konmemorasiones djudias i de Medinat Yisrael
|
---|