Amazonas
![](http://178.128.105.246/host-http-upload.wikimedia.org/wikipedia/commons/thumb/3/30/Amazonas_in_Brazil.svg/220px-Amazonas_in_Brazil.svg.png)
Amazonas (in portoghes [ɐ̃maˈzõnas]), nomm offizial Estado do Amazonas, l’è vuna di 27 unidàa federativ del Brasil, in de la Region Nord del paes. L’è el pussee grand intra i staa brasilian, cont on territori de 1.559.159,148 km2, pussee grand che la Francia, la Spagna, la Svezia e la Grecia insema, e 65 volt pussee grand de la Region Lombardia. El confina cont trè nazion - Perù, Colombia e Venezuela - e cinch alter staa brasilian - Roraima, Pará, Mato Grosso, Rondônia e Acre.
La pupart del staa (el 98%) l’è covert de la Foresta Amazzonega, che la ghe dà el nomm, e la sò popolazion l’è de domà 4 million de person, la metàa di quaj la viv in de la capital, Manaus, a la confluenza del Rio Negro cont el Rio di Amazzon. In di mont in del nord del staa, a la frontera cont el Venezuela, el se troeuva el Pico da Neblina, el mont pussee alt del Brasil.
![](http://178.128.105.246/host-http-upload.wikimedia.org/wikipedia/commons/thumb/3/3d/Manaus_vista_do_rio.jpg/220px-Manaus_vista_do_rio.jpg)
Abitaa in epoca precolombiana de tant etnii indigen, el territori del staa de Amazonas d’incoeu l’è staa descovert di europee del 1541, quand i spagnoeu Gonzalo Pizarro e Francisco de Orellana hann traversaa i And e hinn viaggiaa per el Rio di Amazzon finn al sò delta in de l’Atlantegh.