Kostanai

Kostanai
Қостанай / Qostanai (kaz.)
Костанай (ven.)

Lidnanznam	Flag
Valdkund	Kazahstan
Eläjiden lugu (2023)	264,466 ristitud
Pind	244 km²
Pämez'	Marat Žundubaev (keväz'ku 2022—)
Telefonkod	+7−7142-xxx-xxx
Aigvö	UTC+5

Kostanai (kaz.: Қостанай / Qostanai, ven.: Костана́й, vn 1997 kezakuhusai Kustanai) om Kazahstanan lidn valdkundan pohjoižes. Se om Kostanain agjan administrativižeks keskuseks.

Eländpunktan aluz om pandud vl 1879 kuti Nikolajevsk. Vl 1895 se sai lidnan statusad Kustanai-nimenke, udesnimitihe kor'ben mödhe Tobolan randal. Vl 1913 raudte tuli lidnha Čeläbinskaspäi (sijadase 260 km lodeheze orhal). 1950-nzil vozil ristitišt ližadui stepin haumhen otandan kävutamižhe taguiči.

Kostanai šingotase sauvondmaterialiden tehmižel, sömtegimištol, mašiništonsauvomižel (dizel'tegim, agromašinad) i tekstilin da kengiden edheotandoil (kezerduztrikotažine fabrik, omblendfabrik, kan'goiden ajandfabrik).

Lidn sijadase agjan pohjoižes, Tobol-jogen (kaz.: Тобыл) hural randal, 156 m keskmäižel korktusel valdmeren pindan päl. Matkad Astan-pälidnhasai om 571 km suvipäivnouzmha orhal vai 770 km avtotedme, Kurganhasai (Venäma) om 307 km pohjoižhe avtotedme. Edel vn 2024 keväz'kud lidn sijazihe UTC+6-aigvönes.

Klimat om ven kontinentaline kuivahk. Voden keskmäine lämuz om +3,8 C°, kezakun-elokun +19,0..+20,8 C°, tal'vkun-uhokun −12,5..−14,9 C°. Ekstremumad oma −47,8 C° (uhoku) i +42,5 C° (heinku). Kezaaigan minimum om −2,2 C° (kezaku), tal'ven maksimum om +6,8 C° (tal'vku). Ei voi panda halad heinkus vaiše (minimum om +2,9 C°). Paneb sadegid 352 mm vodes, enamba heinkus (52 mm), vähemba vilukus-keväz'kus (17..20 mm kus).

Vl 2022 kaik seičeme žilod alištuiba lidnan akimatale Kostanain ližaks: Amangel'di, Družb (Sebruz), Kaid Raižu (ven.: Узкая Колея), Koreiskii, Kostanai-2, Kunai, Sarikol' (läz Družbad).

Edeližed lidnan pämehed (akimad) oma Kairat Ahmetov (uhoku 2019 — keväz'ku 2022), Bazil Žakupov (Базыл Жақыпов, sügüz'ku 2015 — viluku 2019).

Vn 2009 Kazahstanan rahvahanlugemižen mödhe lidnan eläjiden lugu oli 214 961 ristitud. Kaik 239 652 eläjad oli lidnas vl 2018. Kaikiš suremb lidnan eläjiden lugu oli 233 900 ristitud vl 1991 i om nügüd'.

Rahvahad (enamba 0,4 % vl 2018): venänikad — 43,5 %, kazahlaižed — 39,3 %, ukrainalaižed — 7,1 %, saksalaižed — 2,3 %, totarlaižed — 2,0 %, vaugedvenälaižed — 1,3 %, korejalaižed — 1,2 %, azerbaidžanlaižed — 0,5 %, toižed rahvahad — 2,8 %.

Islaman (sunnizm) i ortodoksižen hristanuskondan pühäpertid, sinagog i katoline kostöl oma saudud lidnas.

Avtobusad i taksid oma kundaližeks transportaks lidnas. Lidn ühtenzoitase raudtedme ezilidnoidenke i Kazahstanan suridenke lidnoidenke Kostanai-päraudtestancijaspäi.

Rahvahidenkeskeine lendimport Ahmet Baitursinov-kelentedomehen nimed^[1] (kaz.: Халықаралық Ахмет Байтұрсынұлы Әуежайы / Halyqaralyq Ahmet Baitūrsynūly Äuejaıy, edel vn 2022 kezakud Kostanai, KSN / UAUU / kir. КТН, 190 tuh. passažiroid vl 2018) sijadase kahtes kilometras suvipäivlaskmha lidnaspäi. Tehtas reisid Moskvha, Kazahstanan surihe lidnoihe (Almati, Astan, Šimkent, Turkestan), om sezonreisid Gannoverha (Saksanma), čarterreisid mail'man populärižihe lebutahoiže (Antal'j, Šarm-eš-Šeih, Phuket).

1. ↑ Kostanain rahvahidenkeskeižen lendimportan sait (airkst.kz). (ven.)

• Lidnan akimat oficialižel gov.kz-portalal. (kazah.) (ven.) (angl.)

Kostanai Vikiaitas