Copacabana
![](http://178.128.105.246/cars-http-upload.wikimedia.org/wikipedia/commons/thumb/8/86/Rio_de_Janeiro_from_Sugarloaf_mountain%2C_May_2004.jpg/250px-Rio_de_Janeiro_from_Sugarloaf_mountain%2C_May_2004.jpg)
Copacabana is 'n buurt in die suide van die Brasiliaanse stad Rio de Janeiro. Die buurt is veral bekend is vir sy gesogte, halfmaanvormige sandstrand, waarheen veral jong mense stroom.[1]
Die distrik is tot by die middel van die 18de eeu Sacopenapã genoem, en sy naam is eers na die oprigting van 'n kapel gewysig, wat 'n kopie van die standbeeld "Jonkvrou van Copacabana" in Bolivia gehuisves het. Copacabana is op 6 Julie 1892 by die stad Rio de Janeiro ingelyf.
Die huidige distrik strek van Prinses-Isabellaan tot by Posto Seis (die plaaslike lewensredders se wagtoring nommer ses) naby die vesting van Copacabana (Portugees: Forte de Copacabana) en lê digby ander gewilde woonbuurte soos Ipanema en Leblon. Met sowat 400 000 inwoners en 'n oppervlakte van slegs 5,08 vierkante kilometer is dit een van die mees digbevolkte woonbuurte ter wêreld.
Die strand van Copacabana, wat oor 'n lengte van vier kilometer strek, lok op Nuwejaarsaand miljoene besoekers wat hier die begin van die nuwe jaar, maar veral ook die fees van die Afro-Brasiliaanse seegodin Yemanjá, wat onder meer deur die plaaslike vissers vereer word, kom vier. Mense laat klein houtvlotte met offerandes soos parfuum en blomme te water om die seegodin gunstig te stem, en plaas kerse op die strand. Mees opvallend is die honderde priesteresse, die Filhas-de-Santo ("Dogters van die Heilige") met hulle tipiese wit kleredrag.
Infrastruktuur
[wysig | wysig bron]![](http://178.128.105.246/cars-http-upload.wikimedia.org/wikipedia/commons/thumb/5/53/Buildings_in_Copacabana.jpg/250px-Buildings_in_Copacabana.jpg)
![](http://178.128.105.246/cars-http-upload.wikimedia.org/wikipedia/commons/thumb/e/e6/Aerial_view_of_Copacabana_beach.jpg/250px-Aerial_view_of_Copacabana_beach.jpg)
Nog tot by die einde van die 19de eeu was Copacabana 'n afgeleë stadsbuurt tussen die Atlantiese Oseaan en die granietrotse van die omgewing, wat eers met die bou van 'n tonnel in die jaar 1892 met die suidelike stadsgebied verbind is en sodoende maklik bereikbaar geword het. 'n Tweede tonnel is in 1904 gebou.
Vanaf 1918 is Copacabana se Avenida Atlântica deur die Brasiliaanse landskapsontwerper Roberto Burle Marx (1909–1994) verfraai, en vier jaar later het die ekonomiese opswaai van die buurt met die oprigting van die luukse hotel Copacabana Palace 'n aanvang geneem. Die wettiging van dobbelary het die ontwikkeling van die plaaslike vermaaklikheidsbedryf verder aangewakker. Die periode tussen die 1930's en 1950's was die goue tydperk van Copacabanastrand, wat deur die inheemse bevolking ook Princesinha do Mar ("Klein Seeprinses") genoem word. Dit is destyds vereenselwig met rykdom en weelde en het 'n gewilde onderwerp in die internasionale musiek en literatuur geword.
Die sandstrand is in 1970 deur middel van sandophopings verbreed net soos die Avenida Atlântica, wat tot 'n sesbaansnelweg uitgebou is. Die Avenida Nossa Senhora de Copacabana, wat parallel loop, het sedert die middel van die 20ste eeu van 'n rustige residensiële straat tot een van die besigste verkeersare en winkelstrate van Rio de Janeiro ontwikkel. Daar is drie moltreinstasies wat Copacabana met ander dele van die stad verbind. Copacabana se promenade pronk met luukse hotelle, restourante, kroeë, nagklubs, rolprentteaters en woonstelblokke.
Verwysings
[wysig | wysig bron]- ↑ HAT Taal-en-feitegids, Pearson, Desember 2013, ISBN 978-1-77578-243-8