Chudería de Zaragoza
![](http://178.128.105.246/cars-http-upload.wikimedia.org/wikipedia/commons/thumb/7/76/Calle_Mateo_Flandro.jpg/230px-Calle_Mateo_Flandro.jpg)
L'alchama chodiga de Zaragoza estió una d'as comunidaz hebreas más importants d'Al-Andalus, a comunidat chodiga más important d'o Reino d'Aragón y, dimpués d'os rebolicios de 1391, d'a Corona d'Aragón.
Situación
[editar | modificar o codigo]Inicialment l'alchama se trobaba dentro d'as murallas romanas d'a ciudat, pero en l'anyo 1273 Chaime I permitió que los chodigos s'instalasen tamién en a zona contigua difueras d'a muralla, amán d'o Coso, en o que se clamaría la chudería nueva u d'os callizos. En zaguerías d'o sieglo XIII a chudería viella ocupaba la cantonada sudoriental de l'antigo recinto romano, extendendo-se per lo norte dica las proximidaz d'a carrera Mayor y la Madalena, y plegando per l'ueste dica la carrera Sant Chil, estando rodiada en a parti interior a la muralla per un muro de ladriello. Se comunicaba con a resta d'a ciudat per meyo de seis puertas que se zarraban per a nueit y mientres a Semana Santa. L'acceso prencipal se reyalizaba a traviés d'a clamada Puerta Ferriza, que se trobaba en o Coso, a l'altura de l'actual carrera Santo Dominguito.
Descripción
[editar | modificar o codigo]![](http://178.128.105.246/cars-http-upload.wikimedia.org/wikipedia/commons/thumb/a/a3/Juder%C3%ADa_de_Zaragoza.svg/250px-Juder%C3%ADa_de_Zaragoza.svg.png)
L'alchama contaba con a lo menos cinco sinogas amás de hespitals y centros de beneficencia, centros d'ensenyanza, banyos publicos y rituals, fornos, carnecerías, tabiernas y, difuera d'a ciudat, en un tozal de Miralbueno, un fosal. L'edificio más important de l'alchama yera la Sinoga Mayor, que tot y con estar gran acabó no estando prou pa toz los fidels, con os cuals s'habilitoron atras sinogas: a sinoga menor, a sinoga de Bicurholim, a sinoga de Talmud Torá y a sinoga de Bienbenist.[1]
Historia
[editar | modificar o codigo]Dominio musulmán
[editar | modificar o codigo]A tolerancia inicial d'os invasors musulmans enta las atras relichions d'o libro permitió la florada d'as comunidaz chodigas en a peninsula. Zaragoza, capital d'a suya propia taifa, atrayió y alochó una d'as comunidaz chodigas más importants d'Al-Andalus. Entre los sieglos X y XI destacoron figuras como Yoná Ibn Yanáh, medico y escritor; Yekutiel ben Isaac, poeta que plegó a aconseguir la dignidat de gran visir; lo suyo disciplo lo poeta y filosofo Solomo Ibn Gabirol; lo tamién poeta y filosofo Ibn Paquda; lo medico y botanico Ibn Buqlaris; y lo poeta Yehuda Halevi.
Dominio cristian
[editar | modificar o codigo]![](http://178.128.105.246/cars-http-upload.wikimedia.org/wikipedia/commons/thumb/6/6e/Casa_de_los_Morlanes_%28detalle_Menorah%29.jpg/250px-Casa_de_los_Morlanes_%28detalle_Menorah%29.jpg)
A suya población chodiga creixió en o sieglo XII como consecuencia d'a plegada de refuchiaus que fuyiban d'o fundamentalismo almuade. O reinau de Chaime I veyió l'acceso de chodigos zaragozanos a beluns d'os puestos más altos d'o reino, como Jahudá d'a Cavallería que estió baile de Zaragoza. Atros linaches chodigos importants de Zaragoza estioron los Alazar y los Alconstantín.
L'alchama tamién creixió como resultau la plegada de chodigos franceses dimpués de succesivas expulsions d'os chodigos d'ixe reino. Asinas se calcula que en l'anyo 1369 a población yera de bels 1500 vecins.
O sieglo XV marcó la baixada d'a comunidat a causa d'a creixent persecución y discriminación, rematando con a expulsión de 1492 que acabó con l'alchama chudía de Zaragoza, con muitos d'os suyos miembros exiliaus y atros convertius, pero no per ixo acceptaus plenament en a sociedat cristiana.
Os chodigos de Zaragoza s'exilioron enta dos destins. Un d'éls estió lo norte d'Africa a on plegoron familias como los "Nathan" y los "Benisti". L'atro estió la ciudat de Tesalonica que yera alavez baixo dominio turco.[2]
Medicina
[editar | modificar o codigo]Os chodigos zaragozanos destacoron per a suya medicina. Asinas, a-saber-los reis d'Aragón contaban con o servicio de medicos chodigos zaragozanos como per eixemplo Jucef Almerech que asistiba a Chaime I, Jucef Ibn Cemero y Mosé Alatzar que asistiban a Chuan I, Junez y Salomón Trigo que asistiban a Alifonso IV. En 1469 Abiatar Ibn Crescas operaba con exito d'ungletas a Chuan II qui en agradeiximiento ordenaría la construcción d'o Reyal Monesterio de Santa Engracia.[3]
Referencias
[editar | modificar o codigo]- ↑ (es) Blasco Martínez, Asunción (2005). «Los judíos de Zaragoza en los siglos XIII-XIV». Aragón Sefarad (Diputación Provincial de Zaragoza), p.213
- ↑ (es) A.C. Sefarad Aragón (2008), "La desaparecida judería de Zaragoza"
- ↑ (es) Canellas López,Ángel (1974). "La judería zaragozana". Cuadernos de Zaragoza, n°2, p.17
![]() | |
Alagón · Albarrazín · Almunia de Donya Godina · Almonecir de la Sierra · Alcanyiz · Almonecir de la Sierra · Ayerbe · Balbastro · Belchit · Biel · Borcha · Calatayú · Carinyena · Casp · Chaca · Daroca · Epila · Exeya d'os Caballers · Fariza · Fraga · Illueca · Íxar · Luesia · Luna · Magallón · Mallén · Monclús · Mont Albán · Monzón · Fraga · Frago · Ruesca · Sadaba · Sarinyena · Sos d'o Rei Catolico · Tamarit de Litera · Tarazona · Taust · Teruel · Uesca · Uncastiello · Zaragoza |