Nova-Suedia
![](http://178.128.105.246/cars-http-upload.wikimedia.org/wikipedia/commons/thumb/2/24/Nya_Sverige.svg/220px-Nya_Sverige.svg.png)
Nova-Suedia (sueda: Nya Sverige) esis sueda-finlandana kolonio en Nord-Amerika de 1638 til 1655, cirkum la hodiala urbo Philadelphia.
La hodiala usana stati Delaware e Pennsylvania kreskis ek ica olima sueda kolonio.
Meze dil 17ma Suedia esis europana granda povo, kun teritorio en hodiala Rusia, Finlando, Germania, Estonia e Latvia. Por cirkumirar la angla e franca komercomonopoli en Nord-Amerika, en 1637 komercokompanio fondesis proprietita da sueda, germana e nederlandana acioneri. La unesma du navi kun koloniani departis en 1637 de Göteborg ed arivis en marto 1638 en Delaware-Bayo, quo pretendesis da Nova-Nederlando. La suedi e finlandani konstruktis Fort Christina, nomizita pro rejino Kristina di Suedia, en la loko dil nuna urbo Wilmington.
Por evitar konflikto pri tero kun la nederlandani la koloniani restis weste del Delaware-rivero, ube Peter Minuit, la unesma guvernisto dil kolonio, parkompris la tero de lokala indijeni. La teritorii qui vendesis jacas en la hodiala tri stati Maryland, Delaware e sudest-Pennsylvania. Dum la sequanta dekedu yari arivis sisacent suedi e finlandani en Nova-Suedia; la kolonio konsistis en 1643 grandaparte ek farmeyi alonge la Delaware-rivero.
En 1654 Suedia probis konquestar la nederlandana kolonio per okupar Fort Casimir, ma guvernisto Peter Stuyvesant kontreluktis en 1655 e kaptis la du sueda fuorti, e tale Nova-Suedia anexesis a la nederlandana kolonio Nova-Nederlando. La suedi mantenis kelka autonomeso weste del Delaware-rivero, til ke Nova-Nederlando en oktobro 1664 vinkesis da Anglia, e la kolonio cesis existar. En 1682 la teritorio oficale adjuntesis a la stato Pennsylvania da William Penn.