Rapidia de lus

La rapidia de lus en vacua, comun indicada par $c$ , es un constante fisical universal cual es esata egal a 299 792 458 metres per secondo (aprosima 300 000 cilometres per secondo; 186 000 milias per secondo; 671 milion milias per ora). Seguente la teoria spesial de relativia, $c$ es la limita alta per la rapidia a cual materia o enerjia tradisional (e donce cualce sinial portante informa) pote viaja tra spasio.^[1]^[2]

Tota formas de radia eletromagnetal, incluinte lus vidable, viaja a la rapidia de lus. Per multe usas pratical, lus e otra ondas eletromagnetal va pare estende instante, ma per distantias longa e mesuras multe sensosa, sua rapidia finita ave efetos notable. Multe lus stelal videda sur la Tera es de la pasada distante, permetente ce umanas studia la istoria de la universo par regarda ojetos distante. Cuando on comunica con sondas spasial distante, lo pote nesesa minutos a oras per siniales ateni sua destina. En informatica, la rapidia de lus fisa la retarda minima de comunica. La rapidia de lus pote es usada en mesuras de tempo de vola per mesura distantias grande a un esatia estrema alta.

Ole Rømer ia demostra prima en 1676 ce lus no viaja instante par studia la move aparente de la luna Io de Jupiter. Mesuras plu e plu esata de sua rapidia ia veni tra la sentenios seguente. En un paper publicida en 1865, James Clerk Maxwell ia proposa ce lus ia es un onda eletromagnetal e, par esta, ia viaja a la rapidia $c$ .^[3] En 1905, Albert Einstein ia proposa ce la rapidia de lus $c$ en relata a cualce sistem de refere inertial es un constante e es nondependente de la move de la fonte de lus.^[4] El ia esplora la resultas de acel suposa par deriva la teoria de relativia e, en fa lo, ia mostra ce la parametre $c$ ia ave pertine estra la contesto de lus e eletromagnetia.

Particulas sin masa e disturbas de campo, como ondas gravital, ance viaja a la rapidia $c$ en vacua. Tal particulas e ondas viaja a $c$ no dependente de la move de la fonte o la sistem de refere inertial de la oservor. Particulas con masa de reposa nonzero pote es aselerada per prosimi $c$ ma pote nunca ateni lo, no dependente de la sistem de refere en cual sua rapidia es mesurada. En la teoria de relativia, $c$ interelata spasio e tempo e apare en la egali famosa de masa-enerjia, $E=mc^{2}$ .^[5]

En alga casos, ojetos o ondas pote pare viaja plu rapida ca lus (per esemplo, rapidias de fase de ondas, la aspeta de alga ojetos astronomial de rapidia alta, e efetos cuantal). La estende de la universo es comprendeda como esedente la rapidia de lus ultra un borda spesifada.

La rapidia a cual lus estende tra materias transparente, como vitro o aira, es min ca $c$ ; simil, la rapidia de ondas eletromagnetal en cables de filo es plu lenta ca $c$ . La proportio entre $c$ e la rapidia $v$ a cual lus viaja en un materia es nomida la indise de refrata $n$ de la materia ( $n=c/v$ ). Per esemplo, per lus vidable, la indise de refrata de vitro es tipal sirca 1,5, sinifiante ce lus en vitro viaja a $c/1,5$ ≈ 200 000 km/s; la indise de refrata de aira per lus vidable es sirca 1,0003, donce la rapidia de lus en aira es sirca 90 km/s plu lenta ca $c$ .

Referes

↑ Moses Fayngold (2008). Special Relativity and How it Works, John Wiley & Sons, p. 497. ISBN 978-3-527-40607-4.
↑ Albert Shadowitz (1988). Special Relativity, Courier Corporation, p. 79. ISBN 978-0-486-65743-1.
↑ Gibbs, Philip (1997). "How is the speed of light measured?." The Physics and Relativity FAQ.
↑ Stachel, J. J. (2002). Einstein from "B" to "Z" – Volume 9 of Einstein studies, Springer, p. 226. ISBN 978-0-8176-4143-6.
↑ Uzan, J-P; Leclercq, B (2008). The Natural Laws of the Universe: Understanding Fundamental Constants, Springer, pp. 43–44. ISBN 978-0-387-73454-5.

[1] Moses Fayngold (2008). Special Relativity and How it Works, John Wiley & Sons, p. 497. ISBN 978-3-527-40607-4.

[2] Albert Shadowitz (1988). Special Relativity, Courier Corporation, p. 79. ISBN 978-0-486-65743-1.

[3] Gibbs, Philip (1997). "How is the speed of light measured?." The Physics and Relativity FAQ.

[4] Stachel, J. J. (2002). Einstein from "B" to "Z" – Volume 9 of Einstein studies, Springer, p. 226. ISBN 978-0-8176-4143-6.

[5] Uzan, J-P; Leclercq, B (2008). The Natural Laws of the Universe: Understanding Fundamental Constants, Springer, pp. 43–44. ISBN 978-0-387-73454-5.

[1]