Twente
Dit artikel is gesjreve (of begós) in 't Mofers. Laes hie wie v'r mit de versjillende saorte Limburgs ómgaon.
![](http://178.128.105.246/cars-http-upload.wikimedia.org/wikipedia/commons/e/e9/Twente-Position.png)
Twente is 'n streek in 't oeaste van Nederlandj die 't meis-versteielikdje, oeastelik deil vanne pervincie Euveriessel ómvatj en min of mieë wuuertj begrens dore revere de Regge enne Dinkel enne grenze mit Duutsjlandj en mitte pervincie Gelderlandj. Sómtieds wuuertj ouch 't Gelders plaetske Rietmolen bie Twente geraekendj.
In Twente ligke drie groeate stej: Ensjede, Hengelo en Almelo, die alle drie pas inne neugetieëndjen ieëf toet óntwikkeling kome. Aevenes in bao al anger Twentse plaatse koom hie de tèkstielindustrie toet óntwikkeling op gróndj vanne plaatselike hoesnieverheid enne kóms van 't spaor maakdje juus dees drie stej toete ikkenomische as van Twente. In Hengelo domineerdje de mesjienderboew. De Twentse tèkstielindustrie is allewiel verli-jjen tied.
Twente haet e vleegveldj en (halverwaeges bie Hengelo en Ensjede) 'n technische universiteit.
Twente is boete de groeate stej 'n streek mit groeate landjsjappelike kwaliteit: 't haet e kleinsjaolig coulisselandjsjap mit wichtige netuurgebiede (wie 't Lutterzand ane meanderendje Dinkel) en väöl landjgeujer. 't Gebied wuuertj van naord nao zuud door 'nen häöelrögk doorsni-jje, wovan de Tankenberg bi Oldenzaal 't hoogste puntj is. Aaj stejsjoean is veural te vinjen in 't klein Ootmarsum en in minder maot in Oldenzaal, det waal 'n hieël wichtige romaanse kirk haet. Ach Twentse plaatse kregen oeatj stadsrechte: Almelo, Ensjede, Oldenzaal, Ootmarsum, Goor, Rijssen, Diepenheim en Delden.
Geologisch is Twente ein vanne intersanter gebiede van Nederlandj. Dao kómmen aerdlaogen oet versjillige perioden op e vrie klein gebied ane oppervlakdje. Bie Losser bevindj zich 'n aope steingroof. Hengelo en Boekelo höbbe zaatwinning.
In Twente höbbe zich väöl vouksgebroeke kónnen handjhave, wie 't midwintjerhäöreblaozen en 't staoke van paosvure. In Oldenzaal, det mitte res van Naord-Twente Roeams-Katteliek is, wuuertj oetbunjing karneval gevierdj.
Plaatsen in Twente
[bewirk | brón bewèrke]Albergen -- Almelo -- Beuningen -- Boekelo -- Borne -- Bornerbroek -- Buurse -- Delden -- De Lutte -- Denekamp -- Deurningen -- Diepenheim -- Enschede -- Enter -- Fleringen -- Glanerbrug -- Goor -- Haaksbergen -- Hengelo -- Lattrop -- Lonneker -- Losser -- Mander -- Markelo -- Oldenzaal -- Ootmarsum -- Overdinkel -- Rijssen -- Rossum -- Saasveld -- Tilligte -- Tubbergen -- Usselo -- Vasse -- Vriezenveen -- Vroomshoop -- Weerselo -- Wierden -- Zenderen