Mare e fia
Senti, Marieta, mi no m'à mai piasso
che çerte robe se me tegna sconte;
ti sa 'l mio natural; col mio cuorasso
ghe dago a tuti el suo, anca le zonte.
Varda che mi farò un bruto spegasso
se no ti lassi andar.... ― Mama, l'è un conte....
― Apunto, siora si, l'è un bel pagiasso
che sarà bon de mètarte s'un ponte.
Varda se xe possibile che un sior
perda 'l so tempo.... ― Mama, el me vol ben....
― Che ben de Dio, 'l sarà tuto velen...
― El m'à zurà.... ― Si, Giuda traditor
che te dà un baso e po... ― Mama, l'è bon...
― Insoma pianzi pur, no voi bonton.
