Pagina:Luigi Cappello - Dai rovinassi del campanil, 1905.pdf/33

Ancuo so andà anca mi, da bravo fio,
     a visitar l'Esposizion dei fiori,
     e so restà incantà proprio colpio
     al gran profumo, a tuti quei colori.

Oh quanta poesia, qual ben de Dio
     sparpagnà su la tera fra i splendori
     de un Sol de Magio e l'alegro cìo-cìo
     dei oseleti inamorai fra lori!

Ma, a completar quel splendido bochè
     gavarave volesto el caro fior
     de belezza che xe i me nevodini;

quei sì, xe fiori che, no so 'l parchè,
     ve inamora co tuti i so sostini
     anca se i spande in casa.... tropo odor!