薄扶林水塘
![](http://178.128.105.246/cars-http-upload.wikimedia.org/wikipedia/commons/thumb/b/b6/Pok_Fu_Lam_Reservoir_6.jpg/300px-Pok_Fu_Lam_Reservoir_6.jpg)
薄扶林水塘(粵拼:bok6*3 fu4*6 lam4 seoi2 tong4,英文:Pok Fu Lam Reservoir或Pokfulam Reservoir),《香港雜記》叫百步林水塘,係香港一水塘,亦係全港第一個水塘。水塘喺香港島西嘅薄扶林,近薄扶林村。佢集有薄扶林谷地中咁多條河涌嘅水。涌水出自扯旗山、西高山、爐峯峽、歌賦山、奇力山。水塘分上下兩塘,儲水量約為廿六萬立方米,即約莫六千八百萬加侖。水塘溢水會經薄扶林村流入瀑布灣。
史
[編輯]![](http://178.128.105.246/cars-http-upload.wikimedia.org/wikipedia/commons/thumb/5/53/Pokfulam_Reservoir_1.jpg/220px-Pokfulam_Reservoir_1.jpg)
![](http://178.128.105.246/cars-http-upload.wikimedia.org/wikipedia/commons/thumb/d/d9/Pok_Fu_Lam_No._2_Service_Reservoir_1.jpg/220px-Pok_Fu_Lam_No._2_Service_Reservoir_1.jpg)
香港開埠之初,食水來自附近山澗,或者鑿井打水。隨住人口急增,呢啲方法已不勝負荷。呢啲水源受氣候影響,間中會乾塘,又容易污染致病,例如痢疾等。開拓水源,係當時香港政府嘅急務。
香港冇大江之水,土地又有限。當時港督羅便臣費煞思量,無計可施下,香港政府喺一八五九年十月十四號,懸賞一千英鎊,求解決食水問題嘅方法,並打算撥款二萬五千英鎊,做水務經費。
一八六零年二月廿九號,當時任職英軍兵家機器師嘅羅寧(又譯盧令士;英文S.B. Rawling),建議利用薄扶林谷地勢,起水壩閘住薄扶林谷地嘅雨水,供畀全香港島。最初建議包括一個蓄水量三千萬加侖嘅水塘,同埋一條直徑十吋、長一萬七千四百呎嘅引水管,將啲水由薄扶林水塘經羅便臣道引到般含道;兩個儲水池,同埋接駁儲水池嘅輸水系統;重有供水點卅個,同埋滅火龍頭一百二十五個,擬定價格為二萬三千四百一十七英鎊。
政府接納建議,喺一八六零年七月十號通過法例,由政府負責向市民提供食水。但係為咗節省開支,政府多次削減建造費用,以致水塘容量,由原先三千萬加侖,縮到二百萬加侖。
第一個薄扶林水塘喺一八六三年竣工,是爲全香港第一個水塘。雖然水塘落成,但由於水塘容量太細,根本解決唔到食水問題。據當時估計,全港每日用水量為五十萬加侖。因此水塘一起好,就打算加高水壩同擴建水塘。後尾,工程師威爾遜建議,可以喺原址上游,起第二個水塘,以增水量。政府採納建議,擴建薄扶林水塘,一八七七年竣工,水量增至六千八百萬加侖,集水區擴至四百一十六英畝。水塘輸出流量,每日達二百萬加侖。一八六六年到一八七一年間嘅擴建工程,耗資廿二萬港元。
因為人口暴增,山頂越來越多人住。呢次擴建水塘,仍未完全解決香港��水需求。政府因而起另一個水塘,即係大潭水塘。
古建築
[編輯]薄扶林水塘有過百年之久,古物古蹟辦事處評審建築,列咗當中六項設施列為法定古蹟。詳細資料如下:
名稱 | 評級 | 落成年份 | 補充資料 |
---|---|---|---|
前看守員房舍 | 法定古蹟 | 一八六零年-一八六三年 | 新古典建築風格建築物,配搭中式瓦頂,現時係薄扶林管理中心 |
量水站 | 法定古蹟 | 一八六三年 | 監測存水流量同深度,以層列花崗石鋪築而成,設有意大利文藝復興時期建築風格嘅輸水隧道入水口。 |
石橋(四座) | 法定古蹟 | 一八六三年-一八七一年 | 位於水塘東部,以花崗岩建造,用半圓拱或平圓拱裝飾,反映意大利文藝復興風格嘅影響。 |
方形暗渠 | II | 一八六三年 | |
薄扶林水塘土堤 | II | 一八六三年 | 以黏土、碎石同沙泥起成。 |
配水庫通風口 | II | 一八六三年 | |
濾水池 | II | 一八六三年 | 位於水壩後面 |
![](http://178.128.105.246/cars-http-upload.wikimedia.org/wikipedia/commons/thumb/5/59/Pok_Fu_Lam_No._1_Service_Reservoir_3.jpg/450px-Pok_Fu_Lam_No._1_Service_Reservoir_3.jpg)
環境生態
[編輯]香港政府自二十世紀七十年代��,一直喺薄扶林水塘同郊野公園植林,家下四處林木覆蓋,係全港最好之列。綠樹林蔭,樹種有原生樹種,好似大頭茶同浙江潤楠,亦有人工種植,如濕地松、台灣相思、紅膠木、水楠、木荷、黧蒴錐、黃牙果、包衣椆、布渣葉、細葉榕等。成齡混合林同林中山澗,係兩棲動物棲息地。記錄中兩棲動物,最少七種,包括黑眶蟾蜍、短腳角蟾、香港湍蛙、小棘蛙、沼蛙、大綠蛙同斑腿泛樹蛙。
水鳥同林鳥,以水塘同涌爲濕地生境,郊野公園內常見之鳥,有麻鷹、白頭鵯、紅耳鵯、麻雀、紅咀藍鵲、鵲鴝、大山雀、翠鳥、畫眉、噪鵑、毛雞、珠頸斑鳩等。區內亦有唔少哺乳類動物,好似赤腹松鼠、箭豬、鼬獾、針毛鼠、果子狸、小靈貓、豹貓、赤麂等。
參攷
[編輯]- 香港地方;地方;香港水塘(一)香港九龍
- WSD TEXT construction
- 薄扶林郊野公園,出自 lifein.hk。
- 薄扶林水塘集水區,出自綠色力量網站。
睇埋
[編輯]出面網頁
[編輯]![](http://178.128.105.246/cars-http-upload.wikimedia.org/wikipedia/commons/thumb/4/4a/Commons-logo.svg/30px-Commons-logo.svg.png)